-
ක්රිකට් ආයතනයේ උප සභාපතිවරයකුගේ ක්රීඩා සමාජයක ක්රීඩා කරන ක්රීඩකයන් 03යි…
-
ක්රිකට් ආයතනයේ සේවය කරන දෙදෙනකුගේ දරුවො දෙන්නයි…
-
දකුණු පළාතේ දිස්ත්රික් සංගමයක සභාපති වරයකුගේ පුතයි… සංචිතය සම්පූර්ණයි…
ශ්රී ලංකාවෙන් ගිලිහී දකුණු අප්රිකාවට ගිය යොවුන් ලෝක කුසලාන තරගාවලිය සඳහා නම් කරන ලද ශ්රී ලංකා 19 න් පහළ ක්රිකට් පිල හෙට (11) දිවයිනෙන් පිටත්ව යාමට නියමිතය.
රාජකීය විදුහලේ සිනෙත් ජයවර්ධන මෙහි නායකත්වය දරණ අතර ගාල්ල රිච්මන්ඩ් විදුහලේ මල්ෂ තරුපති උප නායකත්වය උසුලයි.
පසුගියදා ඩුබායිහි පැවති යොවුන් කුසලාන තරගාවලියේදී ජපාන පිල පැරදවුවද එක්සත් අරාබි එමීර් හා බංග්ලාදේශ කණ්ඩායම් වෙතින් පරාජය ලබා අවසන් පූර්ව වටයටද සුදුසුකම් ලැබීමට අපොහොසත්වූ කණ්ඩායම කිසිදු වෙනස් කමක් නොමැතිව ලෝක කුසලානයටද නම් කර තිබීම විශේෂත්වයකි.
ක්රිකට් ආයතනයේ උප සභාපතිවරයකුගේ ක්රීඩා සමාජයක ක්රීඩා කරන ක්රීඩකයන් තිදෙනෙකුම මෙම කණ්ඩායමට තෝරාගෙන තිබීමද කැපී පෙනේ.
එසේම ක්රිකට් ආයතනයේ සේවය කරන දෙදෙනකුගේ හා දකුණු පළාතේ දිස්ත්රික් සංගමයක සභාපති වරයකුගේ පුත්රයන් තිදෙනෙකුද එහි සිටීම විශේෂත්වයකි.
මොවුන් කණ්ඩායමට නම් කර ගැනීම සඳහා ක්රිකට් ආයතනයේ ඉහළින්ම බලපෑම් සිදු වී ඇති බව මේ අතර වාර්තා වේ.
එසේම දක්ෂ වමත් වේග පන්දු යවන්නන් තිදෙනකුම සංචිතයේ සිටියදී පිට පළාත් පාසල් වල ක්රීඩකයන් වූ ඔවුන්ගෙන් කිසිවකු නොමැතිව දකුණත් වේග පන්දු යවන්නන් පමණක් කණ්ඩායමට තෝරා ගෙන ඇති බවද වාර්තා වේ.
මෙම කණ්ඩායමේ පුහුණුකරු ලෙස කටයුතු කරන්නේ ජෙහාන් මුබාරක් ය.
වෙනත් රටවල කණ්ඩායම් එකිනෙකා සමග මේ වන විට තරග කරමින් හොඳ සූදානමකින් පසු වද්දී අපේ යොවුන් ක්රීඩකයන්ට පුහුණු වන්නට හොඳ මැද තණ තීරුවක් සහිත ක්රීඩාංගණයක් සොයා ගත නොහැකිව අපහසුතා රැසකට මුහුණ දුන් බව එක් පුහුණුකරුවකු ලංකාසරට පැවසීය.
මෙම කණ්ඩායමට උපදේශක සනත් ජයසූරියද පසුව එක්වීමට නියමිතය.
