දින 10කට ප්රමාණවත් ඩීසල් සහ දින 14කට සරිලන පෙට්රල් තොග මේ වනවිටත් රට සතුව ඇති නමුත් රටේ පවතින තත්වය තුළ ඉදිරි දින තුන තුළ එම ඉන්ධන බෙදා හැරීමට නොහැකි බරපතල තත්ත්වයක් නිර්මාණය වී ඇතැයි බලශක්කති ඇමති කාංචන විජේසේකර පවසයි.
ඊයේ දිනයේ සියලුම දිස්ත්රික් ආවරණය වන පරිදි තෙල් බවුසර 534ක ප්රමාණයක් ඉන්ධන ලබා ගැනීමට පැමිණි නමුත් පැවති තත්වය තුළ ඉන් සියයට පනහක් පමණක් බෙදා හැරිය බව ඇමතිවරයා කීවේය.
මේ බෙදා හැරීමේ ජාලය අඩපණ වීම ප්රකාශ වනුඇත්තේ ජීවිතවලින් බවත්, රෝහල් ගණනාවක් තමන්ගෙන් මේ වනවිට ඩීසල් සැපයුම පිළිබඳ විමසා ඇති බවත් කී ඇමතිවරයා තත්ත්වය උග්රවීම පැහැදිලි කරමින් ප්රකාශ කළේ අද වනවිට පැමිණ ඇත්තේ ඉන්ධන ප්රවාහන බවුසර 46ක් පමණක් බවත් පෙන්වා දුන්නේය.
මේ පිළිබඳව අප කළ විමසීමක දී ලංකා ඛනිජතෙල් පෞද්ගලික ටැංකි රථ හිමියන්ගේ සංගමයේ ප්රකාශකයෙක් පැවසුවේ රටපුරා පවතින උද්ඝෝෂණ හේතුවෙන් තමන්ගේ ටැංකිරථවලට ආරක්ෂාවක් නොමැති බැවින් සිය ටැංකි රථවලට ආරක්ෂාව ලබාදෙන්නේ නම් සේවයට වාර්තා කළ හැකි බවය.
උද්ඝෝෂණ හේතුවන් සිය ටැංකි රථ දැඩි අනාරක්ෂිත තත්ත්වයකට පත්ව ඇති බව ඔවුහු කීහ.
අද පාර්ලිමේන්තුවේ දී බලශක්ති ඇමතිවරයා ප්රකාශ කළේ මේ වනවිට දුම්රියෙන් ඉන්ධන ප්රවාහනය කිරීම සඳහා ගුවන් හමුදා ආරක්ෂාවත්, ඉන්ධන බවුසර ප්රවාහනය කිරීම සඳහා හමුදා ආරක්ෂාවත් ඉල්ලා ඇති බවය.
