දැනට ක්රියාත්මක වන ත්රස්තවාදය වැළැක්වීමේ පනත සංශෝධනය කර ඒ වෙනුවට ජාත්යන්තර සම්මුතීන්වලට ගැලපෙන ආකාරයේ ජාතික ආරක්ෂාව පිළිබඳව නව නීති ස්ථාපිත කරන බවට විදේශ අමාත්ය අලි සබ්රි අද (12) එක්සත් ජාතීන්ගේ මානව හිමිකම් සමුළුවේදී පොරොන්දු විය. අද ජිනීවා හි පැවැත්වෙන එක්සත් ජාතීන්ගේ මානව හිමිකම් කවුන්සිලයේ (UNHRC) 51 වැනි නිත්ය සැසිවාරයට ශ්රි ලංකාව වෙනුවෙන් ප්රකාශයක් කළ විදේශ අමාත්ය සබ්රි මහතා ශ්රි ලංකාවට එරෙහිව ඉදිරිපත්ව ඇති 46/1 යෝජනාව ද ශ්රී ලංකාව තරයේ ප්රතික්ෂේප කරන බව පැවසීය.
එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලයේ ශ්රී ලංකාව පිළිබඳ වාර්තාව ඉදිරිපත් කරනු ලැබුවේ වැඩබලන මානව හිමිකම් මහ කොමසාරිස් නාඩා අල්-නෂිෆ් විසිනි.වාර්තාව ඉදිරිපත් කරමින් වැඩ බලන කොමසාරිස් කියා සිටියේ ශ්රී ලංකාවේ තත්ත්වය බිඳෙනසුලු බවත් මානව හිමිකම් කඩවීම් සම්බන්ධයෙන් වගවීම ඉල්ලා සිටින බවත්ය.
එක්සත් ජාතීන්ගේ මානව හිමිකම් කවුන්සිලය අමතමින් විදේශ අමාත්ය අලි සබ්රි පැවසුවේ 46/1 යෝජනාව ශ්රී ලංකාවේ ජනතාවගේ ස්වෛරීභාවය සහ එක්සත් ජාතීන්ගේ ප්රඥප්තිය උල්ලංඝනය කරන බැවින් ශ්රී ලංකාව තරයේ ප්රතික්ෂේප කරන බවයි. එක්සත් ජාතීන්ගේ මානව හිමිකම් පිළිබඳ මහ කොමසාරිස්වරයාගේ යෝජනාවට සහ නිර්දේශවලට අදාළ පසු විපරම් ක්රියාමාර්ග ප්රතික්ෂේප කිරීමට ශ්රී ලංකාවට බල කෙරෙනු ඇති බව ඔහු වැඩිදුරටත් පැවසීය.
මානව හිමිකම් ඉදිරියට ගෙන යාම, සුරක්ෂිත කිරීම සහ ආරක්ෂා කිරීම සඳහා ශ්රී ලංකා රජයේ නොසැලෙන කැපවීම ද අමාත්ය අලි සබ්රි යළි අවධාරණය කළේය.
ත්රස්තවාදය වැළැක්වීමේ පනත (PTA) වෙනුවට ජාත්යන්තර හොඳම භාවිතයන්ට අනුකූලව ජාතික ආරක්ෂක නීති සම්පාදනය කරන බව ද ශ්රී ලංකාවේ විදේශ අමාත්යවරයා පැවසීය.
