සූරියවැව නුවන් ජයසේකර –
වසර 22කට පෙර අම්බලන්තොට කඩවරහිදී පිහියකින් ඇණ පුද්ගලයෙකු ඝාතනය කිරිම හා තවත් පුද්ගලයෙකුට මරණීය තුවාල සිදුකිරීමට චූදිතයන් වූ අයියා මලෝ දෙදෙනෙකුට හම්බන්තොට පුර්වගාමී මහාධිකරණ විනිසුරු තාමර තෙන්නකෝන මහතා අද (18) මරණීය දණ්ඩනය නියම කළේය.
මෙලෙස මරණීය දණ්ඩනය නියම කෙරුණේ අම්බලන්තොට,කොග්ගල්ල පදිංචි 42 හැවිරිදි එක් දරු පියෙකු වු ජේ.එල්.බන්ධුල (අයියා) හා සිව් දරු පියෙකු වන 38 හැවිරිදි ජේ.එල්.ධම්මික (මල්ලී) නැමති අයියා මලෝ දෙදෙනෙකුටය.
චූදිතයින් දෙදෙනා විසින් 2000.06.23 වන දින අම්බලන්තොට කඩවරහිදී 22 හැවිරිදි හේවා විමුනිගේ ආරියතිලක නැමති අයව ඝාතනය කර තවත් පුද්ගලයෙකුට මරණීය තුවාල සිදුකර තිබේ. සිදුවීම වනවිට අයියාගේ වයස අවුරුදු 20කි. මල්ලිගේ වයස අවුරුදු 16යකි.
අම්ලන්තොට ප්රදේශයේ සිය ඥාති නිවසක පැවති මංගල සාදයක් අතරතුරදී එක් අයෙකු ඇඟේ වැදීම හේතුවෙන් ඇති වු ආරවුලක් දුර දිග යාමෙන් මෙම ගැටුම හටගෙන තිබේ. එහිදි චුදිතයින් දෙදෙනා සහ තවත් පුද්ගලයින් සිව් දෙනෙකු එක්ව පුද්ගලයෙකුට පරදී පිහියෙන් ඇණ ඝාතනය කර තවත් පුද්ගලයෙකුට මරණීය තුවාල සිදුකර තිබේ.
සිද්ධියට අදාලව අම්බලන්තොට පොලසිය විසින් සැකකරුවන් හය දෙනෙකු අත්අඩංගුවට ගෙන හම්බන්තොට මහේස්ත්රාත් අධිකරණයට ඉදිරිපත් කිරීමෙන් පසු පැවති මුලික නඩු විභාගයෙන් අනතුරුව නිතිපති වරයා විසින් සැකකරුවන් හය දෙනාට එරෙහිව චෝදනා 05ක් යටතේ හම්බන්තොට මහාධිකරණය හමුවේ අධිචෝදනා බාර දෙනු ලැබිය.
ඒ අනුව පැවති දීර්ඝ නඩු විභාගය අතර තුරදී එක් සැකකරුවෙකු මියගොස් ඇති අතර ඉතිරි සැකකරුවන් 05 දෙනාට එරෙහිව නඩු විභාගය පැවැතිණි.
එහිදී ඉදිරිපත් වු සාක්ෂි සළකා බැලු හම්බන්තොට පුර්වගාමී මහාධිකරණ විනිසුරු තාමර තෙන්නකෝන් මහතා 3,5 හා 6 චුදිතයින් අදාල චෝදනා වලින් නිදොස් කොට නිදහස් කෙරුණු අතර 1 හා 2 චුදිතයින් අදාල චෝදනාවන් සදහා වැරදිකරු බවට තහවුරු කෙරුණි.
ඒ අනුව හේවා විමුනිගේ ආරියතිලක නැමති අයව ඝාතනය කිරීමේ චෝදනාවට අදාල චුදිතයින් දෙදෙනාට මරණීය දණ්ඩණය නියම කෙරුණි. නිතිපතිවරයා වෙනුවෙන් රජයේ අධිනීතීඥ ශෙහාන් මුස්තාපා පැමිණිල්ල මෙහෙයවන ලදි.
මරණීය දණ්ඩනය නියම කෙරුණු චුදිතයින් දෙදෙනාට ජනාධිපතිවරයා විසින් මරණීය දණ්ඩනය පමුණුවන තෙක් ආරක්ෂිතව රැගෙන ගොස් වැලිකඩ බන්ධනාගාරයේ රඳවා තබන ලෙසටද මහාධිකරණ විනිසුරු වරයා නියෝග කළේය.
