ජනාධිපති රනිල් වික්රමසිංහ පැමිණීමට නියමිත දිනයක මිහින්තලය නගරයේ පැවැත්වීම නියමිත ගොවි විරෝධයක් වළක්වාලමින් තහනම් නියෝගයක් නිකුත් කරන්නැයි පොලිිසිය අධිකරණයෙන් කළ ඉල්ලීමක් අද (12) අධිකරණය විසින් ඉවත දැම්මේය.
අනුරාධපුර අතිරේක මහේස්ත්රාත් රුද්ධිකා ද සිල්වා හේවාවසම් අද පොලිසිය කළ ඉල්ලීම ප්රතික්ෂේප කර තිබුණාය.
මේ මස 15 වැනිදා ජල ව්යාපෘතියක් විවෘත කිරීම සඳහා ජනාධිපතිවරයා මිහින්තලය ප්රදේශයට පැමිණෙන බැවින් එහිදී ගොවීන් පිරිසක් විරෝධතා ව්යාපාරයක නිරතවීමට සැලසුම් කර ඇති බැවින් එය වළක්වාලමින් තහනම් නියෝගයක් නිකුත් කරන්නැයි මිහින්තලේ පොලිසිය අධිකරණයෙන් ඉල්ලා තිබිණි.
මිහින්තලය පොලිසිය අධිකරණයෙන් මෙම ඉල්ලීම කර ඇත්තේ ජනාධිපතිවරයා ඇතුළු ප්රභූන්ගේ ආරක්ෂාවට මෙම උද්ඝෝෂණය තර්ජනයක් බව පවසමිනි.
මිහින්තලේ ජනතා අයිතිවාසිකම් වෙනුවෙන් පෙනී සිටි නීතිඥ භාග්ය ශ්රී හේරත් අධිකරණයට කරුණු දක්වමින් පැවසුවේ ආණ්ඩුක්රම ව්යවස්ථාවෙන් මහජනයාට ලබා දී ඇති මූලික අයිතිවාසිකමක්වන සාමකාමීව රැස්වීමේ නිදහස භාෂණයේ නිදහස ඇතුළු අදහස් පල කිරීමේ නිදහ සීමා කිරීමට නොහැකි බවත් ප්රභූන්ගේ ආරක්ෂාව සැපයීම ප්රභූ ආරක්ෂක අංශවල වගකීමක් බවත්ය.
ඒ තර්කය පිළිගත් අධිකරණය පොලිසියේ ඉල්ලීම ඉවත දැමේය.
