දිනසේන රතුගමගේ –
පළාත් පාලන මැතිවරණය කඩිනමින් පවත්වා ගැනීම සඳහා මේ අවස්ථාවේදී දෙමළ දේශපලන පක්ෂ ඉන්දියාවේ සහය ලබා ගෙන ඒ හරහා ශ්රී ලංකා රජයට බලපෑම් ඇති කළ යුතුව ඇතැයි දෙමළ ජාතික සන්ධානයේ වන්නි දිස්ත්රික් පාර්ලිමේන්තු මන්ත්රී සෙල්වම් අඩෙයිකලනාදන් මන්ත්රීවරයා ඊයේ ( 27 ) වවුනියාවේදී පැවසීය.
වවුනියාවේ පිහිටි ටෙලෝ දේශපාලන පක්ෂ කාර්යාලයේ පැවති මාධ්ය හමුවකදී ඔහු මේ බව කියා සිටියේය.
ජනාධිපතිවරයා ඉතාම සැහැල්ලු ලෙස සිතා මැතිවරණය කියා දෙයක් නැතැයි ප්රකාශ කිරීම බුද්ධි සම්පන්න ප්රකාශයක් නොවන බව සියලු දෙනාම පිළිගන්නා බව කී මන්ත්රීවරයා මැතිවරණය පැවැත්වීම සඳහා මුදල් නොමැති බව ඊට පෙර ප්රකාශ කළ යුතුව තිබු තත්ත්වයක් බවද පැවසීය.
නාම යෝජනා බාර ගැනීමෙන් පසුව මැතිවරණය නොපැවැත්වීම නිසා රට තුළ වෙනත් ප්රශ්න ගණනාවක් නිර්මාණය වී ඇති බව කී මන්ත්රීවරයා මෙම මැතිවරණයට ඉදිරිපත්වීම සඳහා බොහෝ පාර්ලිමේන්තු මන්ත්රීවරුන් සිය මන්ත්රීධූර වලින් පවා ඉවත්වූ බවද පෙන්වා දුන්නේය.
මැතිවරණයක් පැවැත්වීම ප්රජාතන්ත්රීය ලක්ෂණයක් මෙන්ම ජනතාවගේ අයිතිවාසිකමක් ලෙස සියලු දෙනාම සලකන බව කී සෙල්වම් අඩෙයිකලනාදන් මන්ත්රීවරයා මැතිවරණය නොපැවැත්වීම තුළින් මේ සියලු දේ කාබාසිනියා වන බවද පැවසුවේය.
පළාත් පාලන මැතිවරණයට පසුව පළාත් සභා මැතිවරණය පැවැත්වීමට සිදු වන බව කී මන්ත්රීවරයා 13 වෙනි ආණ්ඩුක්රම ව්යවස්ථා සංශෝධනය නිසා එම මැතිවරණයට මෙතරම් හෝ ඉඩක් නොලැබෙන බවද ප්රකාශ කළේය.
දකුණේ ජාතිවාදී බලවේග හා සිංහල බෞද්ධ බලවේග 13 වෙනි ව්යවස්ථා සංශෝධනයේදී උතුරු නැගෙනහිරට බලතල විශාල වශයෙන් ලබා දෙන බව කියමින් එම මැතිවරණය නොපැවැත්වීමට පසුබිමක් නිර්මාණය කරණ බව මන්ත්රීවරයා මෙහිදී වැඩිදුරටත් සඳහන් කළේය.
