පසුගිය අඟහරුවාදා (05) ගම්පොල බෙන් හිල් ජාත්යාන්තර පාසලේ පාසල් කාලයේ දිවා විවේක කාලය තුළ සෙල්ලම් කරමින් සිටිය දී කඩා වැටුන කුඩුදවුල ගසකට යටවී අසාධ්ය තත්ත්වයේ නුවර ජාතික රෝහලේ ප්රතිකාර ගනිමින් සිටි දෙවැනි දරුවාත් මිය ගොස් තිබේ.
සිද්ධිය වූ අගහරුවාදා සිට අද (10) දක්වා දින 05ක් මහනුවර ජාතික රෝහලේ දැඩි සත්කාර ඒකකයේ ප්රතිකාර ලබමින් සිට මෙසේ මිය ගොස් තිබුණේ මොහොමඩ් අයිම් නැමැති අවුරුදු පහයි මාස හයක් වයස නොදරුවෙකි.
රෝහල් ආරංචි මාර්ග පැවසුවේ දරුවාගේ මොළයට බරපතල ලෙස හානි සිදුව තිබූ බවත් ඔහුගේ ජීවිතය බේරා ගැනීමට යෙදියහැකි උපරිම පරිශ්රමය යෙදූ නමුත් ව්යර්ථ වූ බවත්ය.
දරුවා අද පෙරවරු 10ට පමණ මිය ගොස් තිබිණි. ඇත්ගාල පොලිසිය පැමිණ සාක්ෂි මෙහෙයවා මරණ පරීක්ෂණ කටයුතු නිමා කර දරුවාගේ දේහය පවුලේ ඥාතීන් වෙත භාර දී තිබිණි.
සිද්ධිය වූ දිනයේම එනම් පසුගිය අඟහරුවාදා (05) බෙන් හිල් ජාත්යාන්තර පාසලේ පෙර පාසල් ඒකකයේ අධ්යාපනය ලද 5 හැවිරිදි දරුවෙක් වූ මෙහොමඩ් සෙයිම් අස්වී මිය ගියේය.
අනතුරින් තවත් දරුවෙක් ගම්පොල රෝහලේ ප්රතිකාර ලබමින් ඇත.
සිද්ධිය පිළිබඳ පරීක්ෂණ පවත්වන ඇත්ගාල පොලිසිය පවසන පරිදි ගම්පොල බෙන් හිල් ජාත්යන්තර පාසල පෙර පාසලේ සිට උසස් පෙළ දක්වා පන්ති පැවැත්වෙන්නේය.
පසුගිය 05 වැනිදා දහවල් පෙර පාසල් විවේක කාලය තුළ එයින් එක් පන්තියක සිටි ළමුන් තිස් එක් දෙනකු මිදුලේ සෙල්ලම් කරමින් සිට ඇත. ඒ අතර සුළඟක් හමා ගොස් තිබේ. එම හුළඟට අනාරක්ෂිතව පැවති කුඩු දවුල ගසක් ළමුන් අතරට කඩා වැටී ඇත. දෙමව්පියන් පවසන්නේ පාසල් බැම්මෙන් එපිට තිබූ මෙම ගස අනාරක්ෂිතව පැවති බවය.
සිද්ධියෙන් තුවාල ලද දරුවන් තිදෙනෙක් ගම්පොල රෝහලට ගෙනියන විටත් ඉන් එක් දරුවෙක්වූ මෙහොමඩ් සෙයිම් අස්වී මිය ගොස් තිබුණේය. අද මිය යන මෙහොමඩ් අයිම් දරු පැටියා දින 10ක් මහනුවර මහ රෝහලේ දැඩි සත්කාර ඒකකය තුළ ජීවිතය සමග පොරබදමින් ජීවිතය හැරදා යන්නට ගියේ.
මේ වනවිට අනතුරින් දරුවන් දෙදෙනෙක් මිය ගොස් ඇත. සිද්ධිය පිළිබඳ ඇත්ගාල පොලිසිය පරීක්ෂණ පවත්වයි.
