කලාප අධ්යක්ෂවරු මාර්ගයෙන් හෙට (21) පාසල් නොපැමිණෙන ගුරු විදුහල්පතිවරුන්ගේ නාම ලේඛනය ගෙන්වා ගැනීමෙන් පසු ඔවුන්ගේ නොවැම්බර් මස වැටුප කපා හරින බවට වයඹ පළාත් ආණ්ඩුකාරවරයා කළ ප්රකාශයත් සමග හෙට පාසල් පැමිණීමට සූදානමින් සිටි අති බහුතරයක් වයඹ ගුරුවරු ද පාසල් නොපැමිණීමට තීරණය කර ඇති බව වාර්තා වේ.
මාධ්ය හමුවක් කැඳවමින් වයඹ ආණ්ඩුකාරවරයා කීවේ වෘත්තීය සමිතිවලට රාජ්ය ආයතන විවෘත කෙරෙන දින තීරණය කල නොහැකි බවත්, 21 හා 22, පාසලට නොපැමිණෙන ගුරු විදුහල්පති වරුන්ට 25, දින පාසලට ඇතුළු වීමට තමා ඉඩ නොදෙන බවත් ඔහු කීවේය.
ලංකා ගුරු සේවා සංගමයේ වයඹ පළාත් ශාඛාවේ ලේකම් එම්. ඒ. විමලසිරි අද මාධ්ය අමතා පැවසුවේ මෙවැන්නකි.
”පුළුවන්නම් මේ මාසයේ වැටුප නවත්තන්න අපි ඒවාට ගත යුතු සියලු ක්රියාමාර්ග ගන්න අපි ලෑස්තියි.“
ලංකා ගුරු සංගමයේ කුරුණෑගල දිස්ත්රික් සභාපති සරත් ප්රේමසිරි ආණ්ඩුකාරවරයාට අභියෝග කර කියා සිටියේ, ”කවුරු මොනවා කිව්වත් අපි 21 වර්ජනය නිරත වෙනවා. 22 අපි ඉස්කෝලේ යන්නේ නැහැ. අපි 25 ඉස්කෝලේ යනවා. පුළුවන්නම් ගුරුවරු නවත්තන්න” කියාය.
වෘත්තීය අරගලය පැත්තක තබා හෙට පාසල් විවෘත කිරීමට සූදානම් වූ විදුහල්පතිවරයෙක් ලංකසර ඇමතුවේය. ඔහු කීවේ මේ අශිෂ්ඨ ප්රකාශ තමන් ඇතුලු විදුහල්පතිවරුන් ගණනාවකගේ හෙට පාසල් ගමන වැළැක්වූ බවය.
“ මේ කතාව නිසා මා දන්නා තරමින් විදුහල්පතිවරු විතරක් නෙමෙයි වයඹ පළාතෙ ගුරුවරුන් ගණනාවක් හෙට පාසලට එන එක නැවැත්තුවා. ආත්ම ගෞරවයක් ඇතිව කොහොම ද අපි වැඩ කරන්න යන්නේ මේ වගේ හැසිරෙන දේශපාලකයො එක්ක. ගුරු සටන වෙනුවෙන් නෙමෙයි, ආත්ම ගෞරවය වෙනුවෙන් අපි අපේ නොවැම්බර් වැටුප දෙන්න ලෑස්තියි.“
ඔහු කීවේය.
මේ අතර වයඹ ආණ්ඩුකාර රාජා කොල්ලුරේ සභාපතිත්වය දරණ ශ්රී ලංකාවේ කොමියුනිස්ට් පක්ෂයම ඔහුගේ ප්රකාශය හෙළා දුටුවේය.
එම පක්ෂය අද නිවේනදය කළේ, නැවත පාසල් අධ්යාපනය ආරම්භ කළ හැකි ආකාරයේ එකඟතාවක් ඇතැයි පෙනී යන අතර ඇතැම් පාර්ශ්ව ප්රකෝපකාරී ප්රකාශ කරමින් ගොඩනැගෙමින් ඇති යහපත් හා සුබවාදී පසුබිම විනාශ කිරීමට කටයුතු කරන ආකාරයක් පෙනී යන බවය.
ගුරු විදුහල්පති වෘත්තිකයින් ඉලක්ක කර නැගෙන සියලු ආකාරයේ තර්ජනාත්මක ප්රකාශ පිළිකුලෙන් යුතුව හෙළා දකින බව පක්ෂයේ ප්රධාන ලේකම් විශේෂඥ වෛද්ය ජී. විරසිංහ මහතාගේ අත්සනින් නිකුත්කළ නිවේදනයේ සඳහන් ය.
වැටුප් අත්හිටුවීම් හෝ විනය ක්රියාමාර්ග පිළිබඳ තර්ජනවලට වඩා අවශ්යව ඇත්තේ රජය සහ ගුරු විදුහල්පති ප්රජාව එක්ව ක්රියාකොට පාසල් අධ්යාපන ක්රියාවලිය නැවත පණගැන්වීම බව ද ශ්රී ලංකාවේ කොමියුනිස්ට් පක්ෂය අවධාරණය කර තිබේ.
