විදෙස් ගමන් තහනම් කිරීමෙන් අනතුරුව අද (2) දින අපරාධ පරීක්ෂණ දෙපාර්තමේන්තුව හමුවේ පෙනී සිට ප්රකාශයක් ලබාදෙන ලෙස හිටපු සෞඛ්ය අමාත්ය කෙහෙළිය රඹුක්වැල්ලට මාලිගාකන්ද මහෙස්ත්රාත් ලෝචනා අබේවික්රම ඊයේ (01දා) නියෝග කරන්නේ කුප්රකට ඉමියුනොග්ලොබියුලීන් වංචාව පිළිබඳව ප්රකාශයක් ලබා දීම සඳහා ඉකුත් 31 වැනිදා ඔහුව කැඳවූ පසු බොරු කියා අපරාධ පරීක්ෂණ දෙපාර්තමේන්තුවට පැමිණීම මග හැරීම නිසා බව වාර්තා වේ.
සිද්ධිය සම්බන්ධයෙන් ප්රකාශයක් ලබාදීම සඳහා ඉකුත් 31 වැනි දින අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස දන්වා කෙහෙළිය රඹුක්වැල්ලට නීතිපතිවරයා දැනුම්දී ඇති නමුත් ඒ සඳහා හැකියාව තිබියදීත් ඔහු එම ප්රකාශ දීම හිතාමතාම මඟහැර ඇති බැවින් ඔහුට අද (02දා) දිනයේ අපරාධ පරීක්ෂණ දෙපාර්තමේන්තුවට ගොස් ප්රකාශයක් ලබාදීම සඳහා නියෝගයක් ලබාදෙන ලෙස හා ඔහුගේ විදෙස් ගමන් තහනම් කරන ලෙසට ඉල්ලා නීතිපති දෙපාර්තමේන්තුව වෙනුවෙන් පෙනී සිටි නියෝජ්ය සොලිසිටර් ජනරාල් ලක්මිණී ගිරිහාගම අධිකරණයට කළ දැනුම් දීම සලකා බලමින් මහේස්ත්රාත්වරිය මේ නියෝගය නිකුත් කර ඇත.
සිද්ධිය සම්බන්ධයෙන් කරුණු දක්වමින් නියෝජ්ය සොලිසිටර් ජනරාල්වරිය අධිකරණය හමුවේ කියා සිටියේ මෙම නඩුවේ අගතියට පත් පාර්ශ්වය ලෙස ඇතුළුවීමට උත්සාහ කළ හිටපු අමාත්යවරයකු වන කෙහෙළිය රඹුක්වැල්ලට පෙරේදා (31දා) දිනයේදී අපරාධ පරීක්ෂණ දෙපාර්තමේන්තුවට ගොස් ප්රකාශයක් ලබාදෙන ලෙසට නීතිපතිවරයා නියෝගයක් නිකුත් කර තිබූ බවය.
අඑදින පෙරවරු 9.00ට මහාධිකරණයේ නඩුවක් සඳහා පෙනී සිටීමට සිදුව ඇති බැවින් ප්රකාශයක් ලබාදීම සඳහා එම වෙලාවට අපරාධ පරීක්ෂණ දෙපාර්තමේන්තුව හමුවේ පෙනී සිටීමට නොහැකි බවද අධිකරණ කටයුතුවලින් පසුව එදිනම පස්වරුවේ අපරාධ පරීක්ෂණ දෙපාර්තමේන්තුව වෙත ගොස් ප්රකාශයක් ලබා දෙන බවට ඔහු එම දෙපාර්තමේන්තුව වෙත ලිඛිතව දන්වා ඇති බවද ඇය ප්රකාශ කළාය.
මහාධිකරණයේ නඩුව සඳහා පෙනී සිටීමෙන් අනතුරුව ඔහු එදින ප.ව. 01.00ට පමණ අධිකරණයෙන් පිටත්ව ගොස් ඇති බවට මාධ්යවේදියකු සමඟ සිදුකළ ප්රකාශයකින් අනාවරණය කරගත් බවද සොලිසිටර් ජනරාල්වරිය අධිකරණයට පෙන්වා දුන්නාය.
එසේ පිටත්ව ගොස් ඇති කෙහෙළිය රඹුක්වැල්ල අමාත්යවරයා එදින නැවත වතාවක් අපරාධ පරීක්ෂණ දෙපාර්තමේන්තුව වෙත ලිපියක් යොමු කරමින් තමන්ට ජනාධිපතිවරයාගේ ප්රධානත්වයෙන් පැවැත්වෙන රාජ්ය වියදම් කළමනාකාර අමාත්ය මණ්ඩල අනුකමිටු රැස්වීමට සහභාගිවීමට සිදුව ඇති බැවින් පෙබරවාරි මස 6, 8, 12 යන ඕනෑම දිනයක අපරාධ පරීක්ෂණ දෙපාර්තමේන්තුව හමුවට පැමිණ ප්රකාශයක් ලබාදීම සඳහා අවස්ථාව ලබා දෙන ලෙසට ඉල්ලමින් එම දෙපාර්තමේන්තුවේ අධ්යක්ෂවරයා වෙත ඔහු ලිපියක් යොමු කර ඇති බවද ඇය සඳහන් කළාය.
කෙහෙළිය රඹුක්වැල්ල අමාත්යවරයා කරන ලද ප්රකාශය සත්යද අසත්යයද යන්න පිළිබඳව කඩිනම් විමර්ශනයක් ආරම්භ කළ බවද ඒ අනුව එම රැස්වීම එදින ප.ව. 3.05ට ජනාධිපති කාර්යාලයේ පවත්වා ඇති නමුත් කෙහෙළිය රඹුක්වැල්ල අමාත්යවරයා ඒ සඳහා සහභාගි වී නොමැති බවටද ජනාධිපති ලේකම්වරයා ලිඛිතව දන්වා ඇති බව ඇය හෙළි කළාය.
අමාත්යවරයා අපරාධ පරීක්ෂණ දෙපාර්තමේන්තුවේ හමුවේ ප්රකාශයක් ලබාදීමට පෙනී නොසිට අසත්ය කරුණු දක්වමින් අපරාධ නඩු විධිවිධාන සංග්රහයේ 109 (6) වගන්තිය යටතේ හිතාමතාම නියෝගයක් පැහැරහැර ඇති බැවින් අපරාධ නඩු විධාන සංග්රහයේ 124 වගන්තිය ප්රකාරව අපරාධ පරීක්ෂණ දෙපාර්තමේන්තුව හමුවේ අද (2දා) පෙරවරු 9.00ට පෙනී සිට ප්රකාශයක් ලබාදීමට ඔහුට නියෝගයක් නිකුත් කරන ලෙසද සොලිසිටර් ජනරාල්වරිය අධිකරණයෙන් ඉල්ලීමක් කළාය. – මව්බිම
