දැනට පවතින කෘෂි කෘෂිරසායන හිඟය ඉක්මනින් අවසන් කර ඉදිරි කන්න සඳහා ගොවීන්ට අවශ්ය කෘෂි රසායන ද්රව්ය ඉක්මනින් ගෙන්වාගැනීමේ අරමුණින් එම කෘෂි රසායන ගෙන්වාගැනීම සඳහා අමාත්යාංශ ලේකම්වරුන් තිදෙනෙකුගෙන් සැදුම්ලත් ඉහළ පෙළේ කමිටුවක් පත් කිරීමට රජය තීරණය කර ඇති බව වාර්තාවේ.
කෘෂිකර්ම ආරංචි මාර්ග අනාවරණය කරන ආකාරයට දැනට කෘෂි රසායන ද්රව්ය ගෙන්වීම හා නියාමනය කිරීමේ බලය පවතින පළිබෝධනාශක රෙජිස්ට්රාර්වරයා අභිබවමින් මෙම ඉහළ පෙළේ නිලධාරීන් ඒ සඳහා අවශ්ය කටයුතු කිරීමට කැබිනට් මණ්ඩල පත්රිකාවක් සකස් ව ඇතැයි ආරංචි මාර්ග පවසයි.
එම කැබිනට් පත්රිකාව හෙට (01) පැවැත්වෙන කැබිනට් රැස්වීමට ඉදිරිපත් කිරීමට නියමිත බව ද වාර්තා වේ.
මේ අනුව කෘෂිකර්ම, සංචාරක සහ වැවිලි කර්මාන්ත අමාත්යාංශ 3හි ලේකම්වරුන් මෙම කැබිනට් පත්රිකාව මගින් නියෝජ්ය ආනයන හා අපනයන පාලක තත්ත්වයට පත්කොට මෙම ද්රව්ය ඉක්මනින් ගෙන්වා ගැනීමට අවශ්ය කටයුතු සම්පාදනය කිරීමට මෙවැනි මේ වනවිට පියවර ගෙන ඇතැයි එම ආරංචි මාර්ග තවදුරටත් සඳහන් කළේය.
මුදල් අමාත්යංශය මගින් කැබිනට් පත්රිකාව සකස් කරනු ලැබ ඇති අතර එහි අරමුණ වී ඇත්තේ මහ කන්නයට අවශ්ය, දැඩි ආන්දෝලනයට ලක්ව පවතින කෘෂි රසායන ද්රව්ය අවශ්ය ආකාරයට ගෙන්වා මෙරට ගොවීන් අතර ඉක්මනින් බෙදා දීම ය.
එම කැබිනට් පත්රිකාවට අනුව අදාළ ලේකම්වරුන් කෘෂිරසායන ද්රව්ය ගැන්වීමට අවශ්ය බලපත්ර නිකුත් කිරීම මිලදී ගැනීම හා බෙදා හැරීමේ ක්රියාවලිය සඳහා මැදිහත් වීමට අවශ්ය බලතල පවරා ඇත.
මෙම තත්ත්වයට හේතු වී ඇත්තේ පලිබෝධනාශක රෙජිස්ටාර්වරයා හරහා මෙම කටයුතු සිදු කර ගැනීමට යාමේදී විය හැකියි සංකීර්ණතාවයන් හා ප්රමාදයන් වළක්වා ගැනීමට බව සඳහන් වේ.
