ඉන්දියාව සමග ව්යාපාරික ගනුදෙනු කළ කාන්තාවක් අතුළු තිදෙනෙක් පැහැරගෙන ගොස් කෝටි ගණනින් මුදල් සහ රන් භාණ්ඩ කොල්ලකා සැඟවී සිටින කැලණිය කොට්ඨාස අපරාධ විමර්ශන අංශයේ පොලිස් කණ්ඩායමක්, විවිධ ව්යාජ වටලීම් සංවිධානය කර සිදු කළ කොල්ලකෑම් රැසක තොරතුරු විමර්ශනවලින් හෙළිවෙමින් ඇතැයි පොලිස් ආරංචි මාර්ග කියයි.
උප පොලිස් පරීක්ෂකවරයෙක්, සැරයන්වරයෙක් සහ කොස්තාපල්වරු දෙදෙනෙකුගෙන් සමන් විත මෙම කොල්ලකල්ලිය පුද්ගලික වෑන් රථයකින් ගොස් මෙම කොල්ලකෑම් සිදුකර ඇති බව පොලීසිය කියයි.
මෙම පොලිස් කොල්ලකරුවන් හෙළිදරවු වන්නේ ඉන්දියාවට ගොස් රෙදි පිළි රැගෙන පැමිණෙමින් සිටි ඉහත කී කාන්තාව ඇතුළු තිදෙනා පැහැරගෙන යෑමෙන් අනතුරුවය.
කටුනායක ජාත්යන්තර ගුවන්තොටුපොලත් පෑලියගොඩ වනවාසලත් අතර කොටසේදී පසුගිය 10 වෙනිදා අලුයම් කාලයේ ව්යාජ පරීක්ෂාවක් කර සිදුකර මෙම කොල්ලකෑම සිදුකර තිබිණි.
මෙම කාන්තාව ඇතුළු පුද්ගලයින් තිදෙනා ගුවන් තොටුපොලේ සිට ගමන් කරමින් සිටි වෑන් රථය මග හරස්කර ඔවුන්ව පොලිස් නිලධාරීන් සිටි වෑන් රථයට නන්වාගෙන ඉන්දියාවේ සිට නීති විරෝධී ලෙස රත්තරන් රැගෙන පැමිණ ඇතැයි පවසමින් පොලිස් කොල්ලකරුවන් විසින් ඔවුන් සතුව තිබුණු රන් භාණ්ඩ සහ මුදල් ඇතුළු වත්කම් සිය භාරයට ගෙන තිබේ.
අනතුරුව මෙම කොල්ලකාර පොලිස් නිලධාරීන් අලුයම් කාලයේ දී මෙම තිදෙනා පෑලියගොඩ පොලිස් ස්ථානයටද රැගෙන ගොස් ඇත. පසුව රන් භාණ්ඩ හා දේපොල කොල්ලකාගෙන ඔවුන්ව මුදාහැර තිබේ.
මේ සම්බන්ධව බස්නාහිර පළාත් උතුරු දිසාව භාර නියෝජ්ය පොලිස්පති රොහාන් ප්රේමරත්නට ලද පැමිණිල්ලකට අනුව විමර්ශන ආරම්භ වී තිබේ.
එම විමර්ශනවලදී හෙළි දරවු වී ඇත්තේ නීති විරෝධී ජාවාරම්වල නිරතව සිටින පුද්ගලයින් හඳුනාගෙන ඔවුන්ව කොල්ල කෑම මෙම පොලිස් කණ්ඩායම විසින් සංවිධානාත්මකව සිදුකර ඇති බවය.
මොවුන්ගේ කොල්ල කෑමට ඉලක්ක වී ඇත්තේ පිට රටවල්වල සිට නීති විරෝධීව මෙරට රන් භාණ්ඩ ඇතුළු භාණ්ඩ වර්ග රැගෙන එන ජාවාරම්කරුවන්, උණ්ඩියල් ඡාවාරම්කරුවන්, පුරා විද්යාත්මක ද්රව්ය සහ ගජමුතු ජාවාරම්කරුවන් වැනි පුද්ගලයින්ය.
මෙම පොලිස් කණ්ඩායම විසින් ව්යාජ වැටලීම් මගින් මේ පිරිස් අත්අඩංගුවට ගෙන ඔවුන් සතු මුදල් හා දේපොල කොල්ලා ඇතැයි හෙළි වී තිබේ.
මෙම පොලිස් කොල්ලකරුවන් අමෙරිකානු ඩොලර් 3800ක්, විස්කි බෝතල් 09ක් සහ පවුම් 56.25ක රන් භාණ්ඩ තොගයක් ඇතුළු කොල්ලකෑ දේපල වල මුළු වටිනාකම රුපියල් එක්කෝටි දෙලක්ෂ තිස්පන්දහස් හාරසියයක් ලෙස ගණනය කර තිබේ. .
ආරම්භ කර ඇති විමර්ශනයත් සමඟ පොලිස් නිලධාරීන් සිව් දෙනා පළාගොස් ඇත. මේ වනවිට ඔවුන්ගේ වැඩ තහනම් කිරීමට පියවර ගෙන තිබේ.
