සූරියවැව නුවන් ජයසේකර –
දින දෙකක් තුළ හම්බන්තොට හා අම්බලන්තොට යන ප්රදේශවලදි පුද්ගලයන් දෙදෙනෙකු වන අලි ප්රහාර වලින් මිය ගොස් ඇති බව හම්බන්තොට හා අම්බලන්තොට පොලිසියෙන් වාර්තා වෙයි.
අද (12) අම්බලන්තොට පොලිස් බළ ප්රදේශයට අයත් උතුරු කඩවර ප්රදේශයේ දී 58 හැවිරිදි පුද්ගලයෙකු වන අලි ප්රහාරයට ලක්ව මියගොස් ඇති බව අම්බලන්තොට පොලිසිය පැවසිය.
මෙලෙස මියගොස් ඇත්තේ දකුණු කඩවර, කොග්ගල්ල, අම්බලන්තොට ලිපිනයේ පදිංචි 58 හැවිරිදි එම්.ජී. සෝමපාල නැමති අයෙකි. මරණකරු සිය වගා භූමියට ගොස් සිටියදි 12 දින අළුයම් කාලයේ වන අලි ප්රහාරයට ලක්ව තිබේ.
එමෙන්ම ඊයේ (11) හම්බන්තොට දක්ෂිණ අධිවේගී මාර්ගයේ මත්තල සිට හම්බන්තොට දක්වා ඇති අලි වැට නඩත්තු සේවකයෙකු රාජකාරියට යමින් සිටියදි හම්බන්තොට සීනුක්කුගල ප්රදේශයේදී වන අලි ප්රහාරයකට ලක්ව මිය ගොස් ඇති බව හම්බන්තොට පොලිසිය පවසයි.
වන අලි ප්රහාරයෙන් මියගොස් ඇත්තේ 27 හැවිරිදි ගිහාන් අතපත්තු නැමති තරුණයෙකි. අලි වැට නඩත්තුව සදහා සේවකයින් කිහිප දෙනෙකු යොදවා ඇති අතර මේ වන විට ඔවුන් කිසිවෙකු වෙනුවෙන් කිසිදු ආරක්ෂිත ක්රියාමාර්ගයක් ගෙන නොමැති බවත්, ඒ හේතුව නිසා මෙම මරණය සිදුව ඇති බවත් සේවකයන් පැවසීය.
ප්රෙද්ශයේ ජනතාව පවසන්නේ දිගින් දිගටම ඉවක් බවක් නොමැතිව හම්බන්තොට කැලෑ ඉඩම් හෙළි කර ඇති නමුත් වන අලින් වෙනුවෙන් කිසිදු වැඩ පිළිවෙළක් සංවිධානය නොකිරීම මෙලෙස වන අලි ගැටලුව උග්රවිමට හේතුවක් වි ඇති බවයි.
ගෙවුණු මාස තුනක කාලය තුළදි පමණක් හම්බන්තොට දිස්ත්රික්කයේ පමණක් වන අලි පහරදීම් හේතුවෙන් පුද්ගලයන් සිව් දෙනෙකු මරණයට පත්ව ඇති බව ඔවුහු පවසති.
දිගින් දිගටම බළධාරීන්ගේ නිහඩව සිටීම හමුවේ අලි මිනිස් ගැටුම උග්ර අතට පත්වෙමින් පවතින බව ජනතාව චෝදනා කරති.
