කළුතර මහ නගර සභාව සඳහා සමගි ජන බලවේගය පක්ෂයෙන් ඉදිරිපත් වූ අපේක්ෂකයෙකු වන බන්දුල ප්රසන්න ඉලක්ක කරගනිමින් ඊයේ (07) රාත්රීයේ එල්ල වූ වෙඩි තැබීමේ උත්සාහයක් ව්යර්ථ වී ඇති බව පොලීසිය පවසයි.
අදාල පුද්ගලයා නාගොඩ හන්දිය ප්රදේශයේ හෝටලයක් පවත්වාගෙන යන අයෙකි. මීට පෙර සිදුවූ ඝාතන තැත හේතුවෙන් ඔහුගේ ආරක්ෂාවට හෝටලය ඉදිරිපිට පොලිස් මුරපොලක් ද පවත්වාගෙන යද්දීත් මෙම ඝාතන උත්සාහය සිදුකර තිබීම වැදගත්ය.
ඝාතකයින් පිස්තෝල ගිනි අවියකින් වෙඩි තැබීමට ගත් උත්සාහයේ දී ගිනි අවිය ක්රියාත්මක නොවුන බවත් තමන් කෑ ගසාගෙන පලා යද්දී ඝාතකයා තමන්ගේ පසුපසින් පන්නාගෙන පැමිණ යළි යළිත් වෙඩි තැබීමට උත්සාහ කළ බවත් වින්දිතයා ප්රකාශ කරයි.
සිද්ධිය වූ ස්ථානය පරීක්ෂා කිරීමේදී පොලීසියට වැදගත් සාක්ෂි කිහිපයක් හමුවී තිබේ. පිස්තෝල සඳහා භාවිතා කරන ජීව උණ්ඩයක් බිම වැටී තිබියදී සොයාගෙන ඇත. එමෙන්ම සැකකරුවන් පලායන අවස්ථාවේදී ඔවුන් සතු ජංගම දුරකථනයක් ද එම ස්ථානයේ වැටී තිබී පොලිස් භාරයට ගෙන තිබේ.
බන්දුල ප්රසන්න මහතා ඉලක්ක කරගනිමින් මීට මාස 9කට පෙර ද මෙවැනිම වෙඩි තැබීමේ උත්සාහයක් සිදුවූ අතර, එය ද ව්යර්ථ වී තිබුණි. මෙම ප්රහාරයට හේතුව තවමත් අනාවරණය වී නැත.
කළුතර කොට්ඨාසය භාර ජ්යෙෂ්ඨ පොලිස් අධිකාරීවරයාගේ උපදෙස් මත විශේෂ පොලිස් කණ්ඩායමක් මේ වන විට විමර්ශන ආරම්භ කර ඇත. ප්රදේශයේ සවිකර ඇති CCTV කැමරා පද්ධති පරීක්ෂා කරමින් සැකකරුවන් හඳුනා ගැනීමට කටයුතු කරන බවත්, හමුවූ ජංගම දුරකථනය ඔස්සේ විමර්ශන ඉදිරියට ගෙන යන බවත් පොලීසිය වැඩිදුරටත් සඳහන් කළේය.
