මනම්පිටිය නිමල් ජයරත්න –
පොළොන්නරුව කන්දකාඩු පුනරුත්ථාපන මධ්යස්ථානයේ රැඳවියන් දෙපිරිසක් අතර ඇතිවූ ගැටුමින් අනතුරුව වැලිකන්ද පොලිසිය මගින් අත්අඩංගුවට ගත් රැඳවියන් 14 දෙනකු පොළොන්නරුව මහේස්ත්රාත් අධිකරණයට ඉදිරිපත් කිරීමෙන් අනතුරුව ඔවුන් පෙබරවාරි 8 වෙනිදා දක්වා රක්ෂිත බන්ධනාගාරගත කරන ලෙස පොළොන්නරුව මහේස්ත්රාත් 2 ජී.පී.ඩී. සඳරේකා ඊයේ (05) නියෝග කළාය.
මෙම ගැටුමෙන් තුවාල ලැබූ රැඳවියන් දහදෙනෙකු සහ ගැටුම සමථයකට පත් කිරීමට මැදිහත් වූ යුද හමුදා සෙබලෙකු වැලිකන්ද හා පොළොන්නරුව රෝහල්වල තවදුරටත් ප්රතිකාර ලබමින් සිටින බව වැලිකන්ද පොලිසිය සඳහන් කරයි.
කන්දකාඩු පුනරුත්ථාපන මධ්යස්ථානයෙන් පලාගොස් සෝමාවතිය පුදබිම ආසන්නයේ සංචාරක නිවාඩු නිකේතනයේ නවතා තිබූ බස් රථය මංකොල්ල කෑමට තැත් කිරීම සහ ආරක්ෂක නිලධාරීයාට පිහියෙන් ඇන පහරදී තුවාල සිදුකර ඔහු සතුව තිබූ රුපියල් පනස්දාහක මුදල සහ ජංගම දුරකථන දෙකක් පැහැරගැනීමට සම්බන්ධව අත්අඩංගුවට ගත් රැඳවියන් විසි එක්දෙනෙකු පුලස්තිපුර පොලිසිය මගින් පොළොන්නරුව මහේස්ත්රාත් අධිකරණයට ඉදිරිපත් කිරීමට නියමිතව තිබිණි.
කන්දකාඩු පුනරුත්ථාපන මධ්යස්ථානයේ රැඳවියන් ගැටුමට යොදාගත් යකඩ පොලූ මුගුරු ඇතුළු කතුරු රැසක් මෙන්ම ඔවුන් සතුව තිබූ දුම්කොල, දුම්වැටි හා මත්ද්රව්ය තොගයක් ද වැලිකන්ද පොලිසිය මගින් අත්අඩංගුවට ගෙන තිබේ.
කන්දකාඩු පුනරුත්ථාපන මධ්යස්ථානයේ නිතර ගැටුම් ඇති කරගන්නේ මත්ද්රව්ය ජාවාරම්වලට සම්බන්ධ පිරිස් බවද එම මධ්යස්ථානයේ උසස් හමුදා නිලධාරියකු අප කළ විමසීමකදි සඳහන් කළේය.
කන්දකාඩු පුනරුත්ථාපන මධ්යස්ථානයේ ආහාර ගැටලු මුල් කරගනිමින් මීට පෙර අවස්ථා කිහිපයකදීම රැඳවියන් එම මධ්යස්ථානයෙන් පලාගිය අතර ඔවුන් අත්අඩංගුවට ගෙන අධිකරණ ක්රියාමාර්ග ගැනීමට ආරක්ෂක අංශ මෙන්ම පොලිසිය සමත් වූහ.
කන්ඩකාඩු පුනරුත්ථාපන මධ්යස්ථානයේ තත්ත්වය සම්පූර්ණයෙන් පාලනය කර තිබෙන අතර මේ එම මධ්යස්ථානයේ මේ වනවිට රැඳවියන් 202 නෙකු පුනරුත්ථාපනය වෙමින් සිටිති.
විවිධ ප්රදේශවලින් පැමිණි මත්ද්රව්ය ජාවාරම්කරුවන් මෙහි ගැටුම් ඇතිකර ගනිමින් පාලනය තම අතට ගැනීමට උත්සාහ දරමින් සිටින බවත්, එවැනි තත්ත්වයන් හමුවේ ඒ ඒ පිරිස් අතර පහුගිය කාල පුරා ගැටුම් ඇතිකර තිබෙන බවට තොරතුරු ලැබී තිබෙන, පුනරුත්ථාපන කොමසාරිස් ජෙනරාල් විශ්රාමික මේජර් ජෙනරාල් දර්ශන හෙට්ටිආරච්චි සඳහන් කළේය.
