දිනසේන රතුගමගේ –
මෙවර කච්චතිව් වාර්ෂික මංගල්ලයට ලංකාවෙන් සහභාගී වීමට ඉඩ දී ඇත්තේ 4000කට පමණක් බවත් එක්වන බැතිමතුන්ට ආහාර පාන සපයා දීමක් සිදු නොවන නිසා අවශ්ය ආහාර ද්රව්ය රැගෙන එන ලෙසත් යාපනය දිසාපති යාපනය දිසාපති අම්බලවානර් සිවපාලසුන්දරම් නිවේදනයක් නිකුත් කරමින් දන්වා ඇත.
මංගල්ලයට සහභාගී වන බැතිමතුන් වෙනුවෙන් මෙවර යාපනයේ කූරිකඩ්ඩුවාන් ජැටියෙන් බෝට්ටු ධාවනය වීම මේ මස 23 දා අළුයම 5 සිට දහවල් 12 දක්වා පමණක් ක්රියාත්මක වන බව ද යාපනයේ සිට කච්චතීව් දක්වා ධාවනය වන බෝට්ටුවක එක් ගමන් වාරයක් සඳහා ගාස්තුව රුපියල් 150 ක් බව ද එම නිවේදනයේ දැක්වේ.
කච්චතීව් බලා යාමට යාපනයේ කූරිකඩ්ඩුවාන් ජැටියට යාම සඳහා ලංගම හා පෞද්ගලික බස් රථ 100 ක් යාපනය ප්රධාන බස් නැවතුම් පලේ සිට යොදවා ඇති අතර සෑම විනාඩි 15 කට වරක්ම එක් බස් රථය බැගින් ධාවනය කරවීමට පියවර ගෙන ඇති බවද එම නිවේදනයේ දක්වා ඇත.
යාපනය දිසාපති අම්බලවානර් සිවපාලසුන්දරම් සඳහන් කොට ඇත්තේ මෙවර කච්චතීව් මංගල්ලය පෙබරවාරී මස 23 හා 24 යන දිනවලදී පැවැත්වෙන අතර ඊට සහභාගී වන බැතිමතුන් සංඛ්යාව ශ්රී ලංකාවෙන් 4000ක් සහ ඉන්දියාවෙන් 4000ක් ලෙස 8000 කට සීමා කොට ඇති බවයි.
කච්චතීව් මංගල්ලයෙන් පසුව ඊට සහභාගී වූ බැතිමතුන් සියළුම දෙනා පෙබරවාරී මස 24 වෙනිදා දහවල් 12 වන විට කච්චතීව් දූපතෙන් ඉවත් විය යුතු බවද දිසාපතිවරයාගේ නිවේදනයේ වැඩිදුරටත් සඳහන් කොට තිබේ.
කච්චතීව් මංගල්ලය විශේෂ දේව මෙහෙයක් නිසා මත්පැන් පානය කොට එම උත්සවයට සහභාගී වීමත් මත්පැන් රැගෙන යාමත් සම්පූර්ණයෙන්ම තහනම් කොට ඇත.
