දිනසේන රතුගමගේ –
පොලීසියේ හා ආරක්ෂ අංශවල වැළැක්වීම් මධ්යයේ යාපනයේ විශ්වවිද්යාලය අසලින් මඩකලපුව දක්වා විරෝධතා රැලිය අද ( 4 ) දා ගමන් ආරම්භ කළේය.
විරෝධතාවයේ නිරත පිරිස කලු කොඩි රැගෙන සටන් පාඨ කියමින් පෙළපාළියේ ගමන් කළ අතර පෙළපාළියට සහභාගී නොවූ පිරිස මග දෙපස සිට ඔවුන්ව දිරිමත් කළහ.
මෙම විරෝධතා රැලිය දින හතරක් තිස්සේ උතුරු නැගෙනහිර පළාත් හරහා ගමන් කොට මඩකලපුවට ගමන් කිරීමට නියමිතව ඇති අතර යාපනයෙන් ආරම්භ වූ පෙළපාලිය පරන්තන් විශ්වමඩු හාරහා මුලතිව් දක්වා ගමන් කොට එතැනින් ත්රිකුණාමලයට ළඟා වී හතර වන දිනයේදී අම්පාර නගරයේ ජන හමුවක් පවත්වා මඩකලපුවට ළඟා වීමට නියමිතය.
කලු විරෝධතා රැලිය ලෙස නම් කොට ඇති මෙම විරෝධතා රැලියේ මූලික අරමුණ වී ඇත්තේ උතුරු නැගෙනහිර පළාත්වල ජනයාට කිසිදු නිදහසක් නොමැති බව කියමින් ජාතික නිදහස් දිනය ශෝකී දිනයක් බවට ප්රකාශයට පත් කිරීමය.
මෙම විරෝධතා රැලිය ආරම්භවන දිනය තුළ උතුරු නැගෙනහිර වැසියන්ට පූර්ණ හර්තාලයක් ලෙස සලකා කටයුතු කරන ලෙස දැණුම් දී තිබූ අතර ඒ හේතුවෙන් සැලකිය යුතු වෙළඳ සැල් ප්රමාණයක් වසා දමා තිබුණි.
වසා දමන වෙළඳසැල්වල කලු කොඩි ඔසවන ලෙස සංවිධායකයින් ඉල්ලීමක් කොට තිබූ නමුත් යාපනය විශ්ව විද්යාලයේ හැරුණු විට වෙනත් ස්ථානවල කලුකොඩි ඔසවා තිබීමක් ගැන වාර්තා නොවීය.
විරෝධතා රැලියේ ගමන් කරන පිරිස අත කලුකොඩි හා විරෝධතා පුවරු විශාල ප්රමාණයක් තිබුණි.
