දිනසේන රතුගමගේ
උතුරු දුම්රිය මාර්ගය නවීකරණය කිරීමෙන් පසුව යොදවා ඇති දුම්රිය ප්රමාණය හා සකස් කොට ඇති දුම්රිය කාල සටහන උතුරේ ජනතාව දැඩි අපහසු තත්ත්වයකට පත් කරන්නක් බවට පත්ව ඇතයි උතුරේ වැසියෝ ප්රකාශ කරති.
උතුරු දුම්රිය මාර්ගයේ ජනප්රියම දුම්රිය යාල්දේවී දුම්රිය වූවත් දැන් එම දුම්රිය උතුරේ ජනතාව ප්රතික්ෂේප වූ තත්ත්වයකට පත්ව ඇති බව උතුරේ ජනතාව කියා සිටිති.
කළින් මෙම දුම්රිය කන්කසන්තුරේ සිට කොළඹට රාත්රී 7 වන විට ළගා වූවත් නව කාල සටහනට අනුව එම දුම්රිය කොළඹට ළගා වන්නේ රාත්රී දහයෙන් පසුව නිසා යාපනයේ සිට කොළඹට යන ජනතාවට කොළඹ කිසිදු ස්ථානයකට යාමට බස් නොමැති වන බව එම ජනතාව කියා සිටියි.
මීට හේතුව වී ඇත්තේ කන්කසන්තුරේ හා කොළඹ අතර යාල් දේවී දුම්රිය වශයෙන් එක් දුම්රියක් පමණක් යොදවා එය දෙපැත්තට ධාවනය කරවීම නිසා බව උතුරේ ජනතාව කියා සිටියි.
අළුයම 3.30 ට කන්කසන්තුරේ සිට කොළඹ දක්වා ධාවනය වූ නගරාන්තර සුඛෝපභෝගී දුම්රිය අවලංගු කොට ඇති අතර ගල්කිස්සෙන් අළුයම ධාවනය වූ අයිස් නැමති අති සුඛෝපභෝගී දුම්රිය සංචාරක දුම්රියක් බවට පත් කොට එය සෙනසුරාදා හා ඉරිදා පමණක් ධාවනය කරවීමට පියවර ගෙන තිබීම නිසා උතුරේ සිට කොළඹට ගොස් රාජකාරී කරණ පිරිසටත් දකුණේ සිට යාපනයට පැමිණ සිටින රජයේ සේවකයින්ටත් විශාල අසාධාරණයක් වී ඇතයි උතුරේ ජනතාව කියා සිටියි.
රජරට රැජින දුම්රිය 1976 දී ආරම්භ කලේ වවුනියාවේ සිට කොළඹ කොටුව දක්වා වූ දුම්රියක් වශයෙන් වූවත් එය මේ වන විට අනුරාධපුරයට පමණක් සීමා කොට තිබීමද උදෑසන සීඝ්රගාමී දුම්රියක් කොළඹ කොටුවේ සිට අනුරාධපුරයට පමණක් ධාවනය වීමත් උතුරේ දුම්රිය මගීන්ට සිදුව ඇති දැඩි ආසාධාරණයක් බව ඔවුහු ප්රකාශ කොට සිටිති.
යුද සමයේදී පවා රජරට රැජින දුම්රිය වවුනියාව දක්වා ගමන් කලා සේ දැනට බෙලිඅත්තට යන එම දුම්රිය වවුනියාවෙන් ගමන් ආරම්භ කරවීමට පියවර ගන්නා ලෙස උතුරේ වැසියෝ ඉල්ලා සිටිති.
එමෙන්ම දැනට උදෑසන කොළඹ සිට අනුරාධපුරයට පමණක් ධවනය කෙරෙන සීඝ්රගාමී දුම්රිය වවුනියාව දක්වා දීර්ඝ කොට එතැන් සිට යාපනයට යාමට යාල් රාණී දුම්රිය සම්බන්ධ කොට දෙන ලෙසද උතුරේ වැසියෝ ඉල්ලීමක් කොට සිටියි.
දැනට ධාවනය වන දුම්රිය වලින් සාමාන්ය ගාස්තු යටතේ ගමන් කළ හැක්කේ දුම්රිය දෙකක පමණක් නිසා තුන් වන පන්තියේ දෙවන පන්තියේ දුම්රිය මැදිරි වැඩි කොට සාමාන්ය ගාස්තු අය කෙරෙන නව දුම්රියක් කන්කසන්තුරේ හා කොළඹ අතර ධාවනය කරවීමට පියවර ගැනීම ඉතා කාලෝචිත පියවරක් බව උතුරේ වැසියෝ දුම්රිය දෙපාර්තමේන්තුවට මතක් කොට සිටිති.
අධික මුදලක් වැය කොට උතුරු දුම්රිය මාර්ගය පිළිසකර කළද දුම්රිය සංඛ්යාව හා අලුතින් සකස් කළ දුම්රිය කාල සටහන නිසා දුම්රිය ගමනාගමනය උතුරේ ජනතාවට ඉතා අප්රසන්න වීමට පටන් ගෙන ඇති බව කියන එම වැසියෝ එය එසේ නොකොට කාලාන්තරයක්ම උතුරේ වැසියාට ජනප්රිය ගමනාගමන මාධ්ය වූ දුම්රිය ඉතා ජනප්රිය ගමනාගමන මධ්ය බවට පත් කරන ලෙසද ඉල්ලීමක් කරයි.
දුම්රිය නිලධාරීන් හා බලධාරීන් සාමාන්ය ජනතාවගේ හඩට කන් නොදී ඔවුන්ගේ අභිමතය පරිදි දුම්රිය යෙදවීම හා කාල සටහන් සකස් කිරීම නිසා උද්ගතව ඇති ගැටලුකාරී තත්ත්වය වහාම මග හරවා දෙන ලෙසද උතුරේ වසියන් දුම්රිය බලධාරීන්ගෙන් ඉල්ලා සිටිති.
