මනම්පිටිය නිමල් ජයරත්න –
-
වැලිකන්ද කොට්ඨාසයේ මහසෙන්පුර ප්රාථමික විද්යාලයේ තුන ශ්රේණියේ දරුවන් අනාථයි… දිඹුලාගල කලාප කාර්යාලය වටලා මව්පියවරු උද්ඝෝෂණයක…
වැලිකන්ද කොට්ඨාසයේ මහසෙන්පුර ප්රාථමික විද්යාලයේ තුන්වෙනි ශ්රේණියේ ඉගැන්වීමට සිටි ගුරුවරිය ඊයේ (29 ) විදුහල්පතිවරයාගේ ජංගම දුරකථනයට whatsapp පණිවිඩයක් යොමුකර හිඟුරක්ගොඩ අධ්යාපන කලාපයට මාරුවීමක් ලබා ගැනීමත් සමග සිය දරුවන් අසරණ කර ඇති ආකාරයට විරෝධය පාමින් අද එම විද්යාලයේ දරුවන්ගේ දෙමව්පිය පිරිසක් දිඹුලාගල අධ්යාපන කලාපයේ ප්රධාන ගේට්ටුව අවහිර කරමින් විරෝධතාවයක නිරත වූහ.
මීට වසර දෙකහමාරකට පෙර පැමිණි මෙම ගුරුවරිය වැලිකන්ද කලාප කාර්යාලය හෝ දැනුම්වත් නොකර මෙම මාරුව ලබා ගෙන ඇත්තේ සේවයේ වසර පහක් සම්පූර්ණ වීමටත් පෙර බවත්, උතුරු මැද පළාත් ආණ්ඩුකාරවරයා සමග ගුරුවරිය සහ ඇයගේ ස්වාමියාගේ පවතින සම්බන්ධතාවයක් මත ඇය මෙම මාරුවීම ලබාගෙන ඇති බවත් දෙමවුපියෝ චෝදනා කරති.
වැලිකන්ද මහසෙන්පුර සිරි මහසෙන් විහාරාධිපති පූජ්ය අලුත්වැවේ සේනාලංකාර නාහිමියන්ද පෙරටු කොට ගනිමින් කළ මෙම විරෝධතාවය අතර නාහිමියන් සහ දෙමව්පියන් කීප දෙනෙක් දිඹුලාගල අධ්යාපන කාර්යාලයට ගොස් සාකච්ඡා කිරීමේ දී එම කලාප කාර්යාලයේ නිලධරීන් පවසා ඇත්තේ අදාල ගුරුවරියගේ මාරු වීම සම්බන්ධව කලාප කාර්යාලය කිසිම දැනුම්වත් විමක් නොමැති බවය.
මහසෙන්පුර ප්රාථමික විද්යාලයේ එක වසරේ සිට පහවසර දක්වා දරුවන් 139 දෙනකු අධ්යාපනය ලබන අතර ඒ සඳහා ගුරුවරු හතරක් සේවය කරති.
වැලිකන්ද කොට්ඨාසයේ දුෂ්කර පාසලක් වුවත් පසුගිය වසරේ හොඳම ශිෂ්යත්ව ප්රතිඵල පෙන්වූ තම සිසුන්ට ඉගැන්වීම් කටයුතු සඳහා අවශ්ය උපකරණ ලබාදීමට විශාල වෙහෙසක් දැරීමට සිදුව ඇති බවත්, දරුවන්ට අධ්යාපනය ලබාදීමට වෙනත් පාසලට යැවීමට ආර්ථික වත්කමක් නොමති බවත්, මෙම තත්ත්වය මත විද්යාලයේ ගුරු පුරප්පාඩුව ඉතා කඩනිමින් පියවීමට කටයුතු කරන ලෙසත් දෙමව්පියවරු ඉල්ලීමක් කළහ.
ගුරු හිඟයට විසඳුමක් ලෙස ඉදිරියේදී ගුරුවරියක ලබාදෙන බවට බලධාරීන් ලබාදුන් පොරොන්දුවක් සමග විරෝධතාවය අවසන් විය.
