ගාසා තීරයේ පවතින යුද්ධයේ ඇතැම් අවස්ථාවල දී ඊශ්රායලය ජාත්යන්තර මානුෂීය නීති කඩ කරමින් ඇමරිකාව විසින් සපයන ලද අවි ආයුධ භාවිත කර ඇති බව පසුගිය සිකුරාදා (10) වාර්තාවක් ඉදිරිපත් කරමින් එක්සත් ජනපදය පවසා තිබෙනවා.
එක්සත් ජනපද රාජ්ය දෙපාර්තමේන්තුව සඳහන් කර ඇත්තේ සපයන ලද අවි ආයුධ ඊශ්රායලය ඔවුන්ගේ වගකීම් වලට නොගැලපෙන අයුරින් භාවිත කර ඇති බවට තක්සේරු කිරීම සාධාරණ බවයි. කෙසේ වෙතත් තක්සේරුව සඳහා එක්සත් ජනපදයට සම්පූර්ණ තොරතුරු නොමැති නමුත් දිගටම ඒ සම්බන්ධව අවධානයෙන් පසුවන බවද සඳහන් කර තිබෙනවා.
ඇමරිකානු ජනාධිපති ජෝ බයිඩන් විසින් පසුගිය පෙබරවාරි මස මුලදී නිකුත් කරන ලද නව ජාතික ආරක්ෂක සංදේශයක් යටතේ කොන්ග්රසයට, රාජ්ය දෙපාර්තමේන්තු වාර්තාවක් මගින් මෙම තක්සේරුව සිදු කර ඇති බවත් ඊශ්රායලය රෆා නගරයට පහරදීම සම්බන්ධව මිත්ර පාක්ෂික රටවල් විරුද්ධ වන අවස්ථාවක මෙවන් චෝදනාවක් මගින් ඊශ්රායලය සමග වන සබඳතා පළුදු වීමේ අවධානමක් ඇති බවත් විදෙස් මාධ්ය දක්වා තිබෙනවා.
මෙම වාර්තාව නිකුත් වී ඇත්තේ, හමාස් සංවිධානයේ අවසන් බලකොටුව ලෙස සැලකෙන මිලියනයකට අධික පලස්තීනුවන් රැඳී සිටින රෆා නගරයට ප්රහාරයක් එල්ල කිරීමට ඊශ්රායලය පියවර ගතහොත් ආයුධ බෙදා හැරීම නතර කරන බවට එක්සත් ජනපද ජනාධිපති ජෝ බියිඩන් ප්රසිද්ධියේ තර්ජනය කිරීමෙන් දින කිහිපයකට පසුවය. කෙසේ නමුත් වාර්තාව ප්රකාශයට පත් කිරීමට ටික වේලාවකට පෙර ඊශ්රායල අගමැති බෙන්ජමින් නෙතන්යාහු, ජනාධිපති බයිඩන් සිදුකළ අනතුරු ඇඟවීම් ප්රතික්ෂේප කර තිබෙන අතර අවැසි වුවහොත් ඊශ්රායලය තනිව සිටින බවට ප්රකාශයක් සිදුකර තිබෙනවා.
එක්සත් ජාතීන්ගේ සංවිධානය පවසන පරිදි පසුගිය දින කිහිපය තුළ 80,000 කට වැඩි පිරිසක් රෆා නගරය වෙතින් පලා ගොස් තිබෙනවා.ඊශ්රායල හමුදා ඔවුන්ගේ මෙහෙයුම ආරම්භයේදී ඊජිප්තුව සමඟ වන රෆා නගරයේ හරස් මාර්ගය පාලනය කර වසා දමා තිබෙන බවද සඳහන් වනවා.
ගාසා තීරයේ යුද්ධය ආරම්භයේ සිට මේ දක්වා පුද්ගලයින් 34,900 කට අධික පිරිසක් මිය ගොස් ඇති අතර පුද්ගලයන් 252 ක් ප්රාණ ඇපකරුවන් ලෙස සිටින බව විදෙස් මාධ්ය වැඩිදුරටත් සඳහන් කර තිබෙනවා.
