ජයකාන්ත ලියනගේ –
අහුන්ගල්ල, කරිජ්ජපිටිය අමුණ අසල කිරිල්ල ඇලේ ගිල්වා තිබූ ස්කූටර් වර්ගයේ යතුරුපැදියක් ඊයේ (01) රාත්රී අහුන්ගල්ල පොලීසිය මගින් සොයා ගෙන තිබේ.
මෙම යතුරු පැදිය ඊයේ (01) දහවල් අහුන්ගල්ල ‘රියු’ හෝටලය අසලදී පුද්ගලයෙකුට වෙඩි තබා ඝාතනය කිරීමෙන් පසු වෙඩික්කරුවන් පලාගිය යතුරු පැදිය බවට හඳුනාගෙන තිබෙන බව අහුන්ගල්ල පොලීසිය කියයි.
වෙඩි තැබීම සම්බන්ධයෙන් පරීක්ෂණ පැවැත්වූ පොලිස් විශේෂ කාර්ය බළකාය විසින් මෙම යතුරු පැදිය සොයාගෙන තිබෙන අතර අහුන්ගල්ල පොලීසියේ නිලධාරින් හා එක්ව එය ඇලෙන් ගොඩගෙන අහුන්ගල්ල පොලීසියට රැගෙන විත් තිබේ.
ඊයේ (01) දහවල් 12.30 ට පමන අහුන්ගල්ල ‘රියු’ හොටලය අසලදී ස්කූටර් වර්ගයේ යතුරුපැදියකින් පැමිණි පුද්ගලයන් දෙදෙනෙකු මෙම වෙඩි තැබීම සිදුකර තිබිණි.
මෙම වෙඩි තැබීමෙන් මියගොස් ඇත්තේ නො – 07, පාසැල් මාවත, හිද්දරුව, කොස්ගොඩ පදිංචි ජෝතිමුණි නීල් කුසුම් කුමාර මැන්ඩිස් නොහොත් ‘පච්චා මංජු’ නැමැති 45 හැවිරිදි අයෙකි.
මියගිය අයගේ පශ්චාත් මරණ පරීක්ෂණය අද (02) දහවල් බළපිටිය මූලික රෝහලේ අධිකරණ වෛද්ය නිලධාරිනී එස් ජී එස් දන්ගහවත්ත විසින් බළපිටිය මූලික රෝහලලේදී පවත්වා තිබේ. මියගිය අයගේ බෙල්ලට, වම් ඇහැට උඩින් හා වම් කන පැත්තෙන් වෙඩි පහර 03 ක් එල්ල කර තිබූ බව පශ්චාත් මරණ පරීක්ෂණ වාර්තාවේ සඳහන් වේ.
මෙම වෙඩි පහරවල් 03 ම මාරාන්තික පහරවල් බවත් හිසට සිදු වූ බරපතල හානි, බාහිර හා අභ්යන්තර රුධිර වහනය හේතුවෙන් මරණය සිදුව තිබෙන බවත් එම වාර්තාවේ වැඩි දුරටත් සඳහන් වේ.
සිද්ධිය වූ අවස්ථාවේම බළපිටිය මහේස්ත්රාත් ආර් ඩී ජනක විසින් සිද්ධිය වූ ස්ථානයට පැමිණ ස්ථානීය පරීක්ෂාවක් කර පශ්චාත් මරණ පරීක්ෂණය සදහා මෘතදේහය බළපිටිය මූලික රෝහලට ගෙන යෑමට උපදෙස් ලබා දුන්නේය.
පශ්චාත් මරණ පරීක්ෂණයෙන් පසු මෘතදේහය, ඝාතනයට ලක් වූ අයගේ බිරිය වන නො – 07, පාසැල් මාවත, හිද්දරුව, කොස්ගොඩ ලිපිනයේ පදිංචි මුතුවාහන්දි දිනූකා ද සිල්වා (40) නැමැති අයට බාර දීමටත් කොස්ගොඩ, හෑගල්ල පොදු සුසාන භුමියේදී භූමදානය කිරීමටත් මහේස්ත්රාත්වරයා විසින් දැනුම් දී තිබේ.
ඝාතනයට ලක් වූ අය අහුන්ගල්ල’රියු’ හෝටලය ආසන්නයේ ත්රීරෝද රථ රියදුරෙකු ලෙස කටයුතු කරමින් සිටින බව පොලිස් පරීක්ෂණ වලදී තහවුරු වී තිබේ. රිවෝල්වර් වර්ගයේ ගිනි අවියකින් මෙම වෙඩි තැබීම සිදුකර තිබෙන බවත් වෙඩික්කරුවන්ගේ ඉලක්කය වී තිබුණේ ඉදිකෙරෙමින් පවතින වෙළෙඳසැලක් අසල සිටි පුද්ගලයෙක් බවට සීසීටීවී කැමරා දර්ශන මගින් තහවුරු වන බවත් අහුන්ගල්ල පොලීසිය කියයි.
වෙඩි තැබීම සඳහා වෙඩික්කරුවන් පැමිණෙන ආකාරය, වෙඩික්කරු අදාළ වෙළඳසැල අසලට පැමිණ යතුරුපැදියෙන් බැස වෙළෙඳ සැලට යන ආකාරය, වෙළෙඳසැල තුළ සිටි අයෙක් පැමිණ යම් කිසි දෙයක් පවසා එම ස්ථානයෙන් දිවයන ආකාරය සහ වෙඩික්කරු වෙළෙඳසැල තුළට දිව ගොස් වෙඩි ප්රහාරයන් එල්ල කර ඔවුන් පැමිණි ස්කූටි වර්ගයේ යතුරු පැදියෙන්ම පලායන ආකාරය සිද්ධිය වූ ස්ථානය ආසන්නයේ ඇති සීසීටීවී කැමරා දර්ශන මගින් පැහැදිලි වන බවද අහුන්ගල්ල පොලීසියේ ප්රකාශකයෙක් සඳහන් කළේය.
වෙඩි ප්රහාරයන් ඝාතනයට ලක් වූ පුද්ගලයාගේ හිසටම එල්ල කර තිබූ බවත් ඔහු එම ස්ථානයේදීම ජීවිතක්ෂයට පත්ව තිබූ බවත් අහුන්ගල්ල පොලීසිය විසින් තහවුරු කරගෙන තිබුණි.
ඝාතනයට ලක් වූ අය දැනට ඩුබායි හි සිටින බව කියන ගරුමුණි සුජිත් ද සොයිසා (36) නොහොත් ‘කොස්ගොඩ සුජී’ නම් පාතාල කල්ලි සාමාජිකයාගේ ඥාතී සහෝදරයෙකු බවද පොලිස් පරීක්ෂණ වලදී තහවුරු වූ තිබේ. මියගිය අය කොස්ගොඩ සුජීගේ පියාගේ නැගණියගේ පුතා බවට තහවුරු වූ බවද අහුන්ගල්ල පොලීසිය කියයි.
කොස්ගොඩ සුජී සමග අහුන්ගල්ලේ ලත්තුවාහන්දි සුජීව රුවන් කුමාර ද සිල්වා (34) නොහොත් ‘ලොකු පැටී’ නමින් හදුන්වන අයෙකු අතර කාලයක් තිස්සේ පවතින විරසකය හේතුවෙන් මෙම ඝාතනය සිදුව තිබෙන බවද අහුන්ගල්ල පොලීසිය කියයි. ලොකු පැටී නැමැති අයද ඩුබායි සැඟවී සිටින බව පොලීසියේ මතය වී තිබේ.
පසුගියදා බෙලිඅත්තේදී සිදු වූ අපේ ජනබල පක්ෂයේ නායක සමන් පෙරේරා ඇතුළු පංච පුද්ගල ඝාතනයට පළි ගැනීමක් ලෙස මෙම ඝාතනය සිදුකරන්නට ඇතැයිද පොලීසිය විශ්වාස කරයි. මෙම පංච පුද්ගල ඝාතනය සිදුකර තිබෙන්නේ කොස්ගොඩ සුජීගේ පාර්ශවයෙන් බවද පොලිස් පරීක්ෂණ වලදී තහවුරු වී තිබේ.
බෙලිඅත්තේ පංච පුද්ගල ඝාතනයෙන් මියගිය සමන් පෙරේරා ඇතුළු පිරිස අහුගල්ලේ ලොකු පැටී හා රත්ගම විදුරගේ පාර්ශවයේ පුද්ගලයින් බවද අහුන්ගල්ල පොලීසියේ ප්රකාශකයෙක් සඳහන් කළේය. මෙම දෙපාර්ශවය අතර දිගුකලක සිට මෙම මරා ගැනීම සිදුවන බවද එම ප්රකාශකයා වැඩිදුරටත් සදහන් කළේය. මෙම කොන්තරයේ ආරම්භය මීට අවුරුදු 30 කට ආසන්න සිද්ධියක් බවද එයින් මේ වන විට දෙපාර්ශවයේම 20 කට ආසන්න පිරිසක් ඝාතනයට ලක් ව තිබෙන බවද පොලීසිය කියයි.
කෙසේ වෙතත් ඊයේ (01) ඝාතනයට ලක් වූ පුද්ගලයාට කිසිදු අපරාධමය චෝදනාවක් නොමැති අහිංසකයෙකු බවත් කොස්ගොඩ සුජීගේ ඥාතියෙකු වීම ඝාතනය හේතුවන්නට ඇතැයි විශ්වාස කරන බවත් පොලීසියේ මතය වී තිබේ.
අහුන්ගල්ල පොලිස් ස්ථානාධිපති ප්රධාන පොලිස් පරීක්ෂක හරිත් හල්විට මහතා ප්රමුඛ පොලිස් නිලධාරීන් පිරිසක් පරීක්ෂණ පවත්වයි.
