පකිස්ථානයේ හිටපු අගමැති ඉම්රාන් ඛාන් සහ ඔහුගේ බිරිය බුෂ්රා බීබී අතර වර්ෂ 2018 දි සිදුවූ විවාහය ඉස්ලාමීය නීතිය උල්ලංඝණය කළ බවට තීන්දු කරමින් ඔවුන් දෙදෙනාට වසර හතක නව සිර දඬුවමක් පැනවීමට පකිස්ථානයේ අධිකරණයක් නියෝග කර තිබේ.
ඊයේ (03) මෙම තීන්දුව ප්රකාශ කර තිබුණේ ඛාන් සිරගත කර සිටින රාවල්පින්ඩි නගරයේ අඩියාලා බන්ධනාගාරය තුළ පිහිටුවා ඇති සිවිල් අධිකරණයේ දී ය. ඛාන් සහ බිරිය ඉදිරියේ දඬුවම ප්රකාශයට පත් කළ අධිකරණය ඔවුන්ට රුපියල් මිලියනයක (ඩොලර් 3,560) දඩයක් ද නියම කළේය.
මෙම නඩුව පසුගිය වසරේ දී පනවා තිබුණේ බුෂ්රා බීබී ගේ පෙර සැමියා වූ ඛාවර් මෙනේකා විසිනි. ඛාන් සමඟ විවාහ වීමට පෙර තමන්ගෙන් දික්කසාද වූ බිරිය ඉස්ලාමීය නීතිය යටතේ අවශ්ය මාස තුනක විවේකය අනුගමනය නොකළ බවට චෝදනා කරමින් ඔහු මෙම යුවළට එරෙහිව උක්ත නඩුව ගොනු කර තිබිණි.
2017 නොවැම්බරයේදී ඔහු තම බිරිය දික්කසාද කළ බව මනේකා ප්රකාශ කරයි. ඛාන් 2018 පෙබරවාරි මාසයේදී බිබී සමඟ ඔහුගේ තෙවැනි විවාහය නිවේදනය කළේ ඔහු අගමැති වීමට මාස කිහිපයකට පෙරය.
බ්රහස්පතින්දා පැවැත්වෙන මහ මැතිවරණයට පෙර මේ සතිය තුළ දී ඉම්රාන් ඛාන්ට එරෙහිව දඬුවම් දෙන ලද තුන්වන අවස්ථාව මෙය ය. සතිය තුළ ඔහුගේ බිරියට පැනවූ දෙවැනි දඬුවම මෙයය.
ඛාන් අගමැතිව සිටියදී ඔවුන්ට ලැබුණු තෑගි නීති විරෝධී ලෙස විකිණීම සම්බන්ධ නඩුවකදී ඛාන් සහ බිබීට වසර 14ක සිර දඬුවමක් සහ රුපියල් බිලියන 1.5ක (ඩොලර් මිලියන 5.3ක) දඩයක් නියම විය.
බීබී අත්අඩංගුවට ගන්නේ ඛාන්ගේ ඉස්ලාමාබාද් නිවසේදීය.
ඛාන්ගේ පකිස්තාන් ටෙහ්රීක්-ඊ-ඉන්සාෆ් (පීටීඅයි) පක්ෂයට අයත් නිලධාරියෙකු වන සයිඩ් සුල්ෆිකාර් බුහාරි අල් ජසීරාට පැවසුවේ ඛාන්ට එරෙහි විනිශ්චයන් “නීතිය සමච්චල් කිරීමක්” බවට පත් කළ බව ය.
“මෙම නඩු විභාග පැවැත්වෙන ආකාරය පෙබරවාරි 8 මැතිවරණය සම්බන්ධයෙන් විශාල ප්රශ්නාර්ථයක් ඉතිරි කරනවා. මෙය පකිස්තානයේ ඉහළ අධිකරණයේ ස්වරූපය පරීක්ෂා කළ නඩුවක් ”ඔහු ප්රකාශ කළේය.
විවාහ නඩුව “ව්යාජ” ලෙස හඳුන්වමින් අධිකරණය එය භාර ගැනීම ගැන ඔහු ප්රශ්න කළේය.
“එය එක්තරා ආකාරයකට ඉම්රාන් ඛාන්ගේ ජයග්රහණයක්. ඔහුට එල්ල වී ඇති අනෙක් සෑම චෝදනාවක්ම අසත්ය බව එයින් ඔප්පු වන්නේ ඔහුට එරෙහිව මෙවැනි විකාර නඩු සහ දඬුවම් පමුණුවන බැවින්. අනෙකුත් රටවල් ආර්ථික ප්රගතිය කෙරෙහි අවධානය යොමු කරද්දී අප පකිස්ථානය තුළ ක්රියාත්මක වන්නේ කුමන මට්ටමෙන්ද කියලා එයින් පෙන්නුම් කෙරෙනවා,” ඔහු වැඩිදුරටත් පැවසීය.
පකිස්තාන් ටෙහ්රීක්-ඊ-ඉන්සාෆ් (පීටීඅයි) පක්ෂයේ සභාපති ගොහාර් අලි ඛාන් පැවසුවේ විවාහ නීති නඩු විභාගය “ලැජ්ජා සහගත” බවය. ඔහු කීවේ මෙම තීන්දුව “අපේක්ෂා කළ” එකක් බවය. මෙම දඬුවම සම්බන්ධයෙන් තම පාර්ශවය ඉහළ අධිකරණයක අභියාචනයක් ඉදිරිපත් කරන බව ඔහු පැවසීය.
ඛාන්ට එරෙහිව ඉදිරිපත් කර ඇති මෙම චෝදනා මාලාව ඔහුට පෙබරවාරි 08 මැතිවරණය සඳහා තරග කිරීම තහනම් කර තිබේ. පකිස්තාන් ටෙහ්රීක්-ඊ-ඉන්සාෆ් (පීටීඅයි) පක්ෂයට එරෙහිව දැඩි මර්දනයක් මධ්යයේ ඡන්ද විමසීම ද පැවැත්වෙන අතර පක්ෂයේ මැතිවරණ ලාංඡනය භාවිතා කිරීම ද තහනම් කර තිබේ. මේ වනවිට පකිස්තාන් ටෙහ්රීක්-ඊ-ඉන්සාෆ් (පීටීඅයි) අපේක්ෂකයින්ට ස්වාධීනව තරඟ කිරීමට බල කර ඇත.
එහෙත්, බොහෝ සමීක්ෂණවලින් පෙන්නුම් කරන්නේ ඛාන් රටේ ජනප්රියම නායකයා ලෙසයි. (අල්-ජසීරා)
