දිනසේන රතුගමගේ –
කච්චතීව් දූපතේ පිහිටි ශාන්ත අන්තෝනී දෙව් මැදුරේ වාර්ෂික මංගල්ලය ඉන්දියාවේ පළාත් කීපයක බැතිමතුන්ගේ සහභාගිත්වයකින් තොරව හෙට ( 23 ) ආරම්භ වෙයි.
මෙම මංගල්ලය 23 දා රාත්රී සහ 24 දා උදාසන පැවැත්වෙන විශේෂ දේව මෙහෙයන් දෙකෙන් පසුව අවසන්වන අතර පූජාවන් අවසන් වීමෙන් පසුව නාවික හමුදාවට හැර වෙනත් කිසිදු පාර්ශ්වයකට කච්චතීව් දූපත තුළ රැදි සිටීමට අවසර නොලැබෙයි.
ශාන්ත අන්තෝනී මුනිදුන් ධීවර කර්මාන්තයට අධිපති දෙවියන් ලෙස සැලකේ. වර්ෂ 1973 දක්වා කච්චතීව් දූපත ඉන්දියාවට අයත්ව පැවතිනි. බැවින් ඉන්දීය බැතිමතුන් මෙම මංගල්ලයට සහභාගී වීම මංගල්ලය ඇරඹුන දා සිටම සිදුවිය.
මෙවර එම මංගල්ලයට ඉන්දීය බැතිමතුන් 4000 කට හා ශ්රී ලංකාවේ බැතිමතුන් 4000 කට පමණක් අවසර ලැබුණි.
නාවික හමුදාව විසින් අත් අඩංගුවට ගත් ඉන්දීය ධීවරයින් නිදහස් නොකොට ඔවුන්ව බන්ධනාගාර ගත කිරීමට විරෝධය පල කරමින් රාමේස්වරන් ඇතුළු පළාත් කීපයක ධීවර සංගම් විසින් ආරම්භ කළ විරෝධතාවයත් සමගම එම සංගම්වලට අයත් ධීවරයෝ කච්චතීව් වාර්ෂික මංගල්ලයට සහභගී නොවන බව නිවේදනය කළහ.
එම විරෝධතාවය තාවකාලිකව ඊයේ (21) සිට අතහැර දමා ඇතත් කච්චතීව් මංගල්ලයට සහභාගී නොවන බව රාමෙස්වරන් ධීවර සංගම් හා එම පළාතේ මීසම බාර පූජකවරු නිවේදනය කොට ඇත.
