මනම්පිටිය නිමල් ජයරත්න –
රසායනික පොහොර ලබා දෙන ලෙසට රජයට බලකරමින් ඇලහැර හා මොරගහකන්ද ගොවිජන ව්යාපාරයේ ගොවි සංවිධාන හතළිස් එකක් ඒකාබද්ධව බකමූණ නගරයට ආසන්නව ආරම්භ කර තිබෙන අඛණ්ඩව උපවාසයට සහාය පළ කිරීමට දිවයිනේ ගොවි සංවිධාන නියෝජිතයින් සහ ගොවීන් මෙන්ම මහා සංඝ සංඝරත්නයත් අද (01) එක් වූහ. අනතුරුව මේ පිරිස් බකමූණ නගර මධ්යයේ දැවැන්ත උද්ඝෝෂණයක නිරතවූහ.
වාරි සුමිතුරෝ , ගොවි හඬ ජාතික ව්යාපාරය, පරාක්රම සමුද්ර ගොවිජන ව්යාපාරය එක්ව සංවිධානය කරන ලද මෙම දැවැන්ත උද්ඝෝෂණ ව්යාපාරය සඳහා මාවිල්ආරු, එප්පාවල, දේව්හුව, ගිරිතලේ, මින්නේරිය, කවුඩුල්ල, රාජාංගනය, වෑවල, දඹුල්ල, කැකිරාව, කණන්ඩලම, මාදුරුඔය, මාතලේ හා දඹුල්ල යන ප්රදේශවලින් ගොවි සංවිධාන වල නියෝජිතයින් මෙන්ම ගොවීන් 3000කට ආසන්න පිරිසක් එක්ව සිටියහ.
මෙම අඛණ්ඩ ගොවි උපවාසයටත්, දැවැන්ත උද්ඝෝෂණටත් සහාය පල කිරීම සහ ආශිර්වාද කිරීම සඳහා දිඹුලාගල බුද්ධ ශ්රාවක සංඝ සභාවේ ලේඛකාධිකාරී පූජ්ය දිඹුලාගල රාහුලාලංකාර නාහිමියන්, ගල්තඹරාව විහාරාධිපති පූජ්ය කන්තලේ රාහුල, සෙවනපිටිය දක්ෂිණගිරි විහාරාධිපති පොලොන්නරුවේ නාරද හිමියන් ඇතුළු ප්රදේශයේ විහාරස්ථානවල විහාරාධිපති ස්වාමීන් වහන්සේලා කිහිප නමක් ද වැඩම කර සිටියහ.
මෙහිදී ගොවිජන නියෝජිතයින් කිහිපදෙනෙකුම පැමිණ සිටි විරෝධතාකරුවන් අමතමින් පවසා සිටියේ රජයේ රසායනික පොහොර සහනාධාරය සීයට 50 ක් හෝ ලබා දෙනතුරු මෙම අඛණ්ඩ උපවාසය ක්රියාත්මක කරන බවයි.
තමන් මෙන්ම ගොවීන් කාබනික පොහොරවල වටිනාකමත්, ඒවායින් වගාකරන බෝග වර්ග පරිභෝජනය කිරීමේ දී ශරීරයට හිතකර බවත් කෘෂි විශේෂඥවරුන්ට වඩා හොඳින් දන්නා බව කී ඔවුහු රජයේ කාබනික පොහොර වැඩපිළිවෙළ ගොවියා තුළට රැගෙන එන ක්රමය වැරදි බවත් ගොවි නියෝජිතවරු මෙහිදී පෙන්වා දුන්හ.
මෙම තත්ත්වය සැලකිල්ලට ගෙන තවත් කන්න කීපයකින් මෙම කාබනික පොහොර ක්රමය ගොවීන්ට හඳුන්වා දී මෙවර මහ කන්නයේ පමණක් හෝ රසායනික පොහොර 50% වත් ලබාදීමට ජනාධිපතිවරයාත් අගමැතිවරයාත් කෘෂිකර්ම ඇමති ඇමතිවරයාත් කටයුතු කරනු ඇතැයි තමන් විශ්වාස කරන බව ද මෙහි දී ගොවි නියෝජිතවරු සඳහන් කළහ.
මෙහිදී ගොවි උද්ඝෝෂකයින් ඇමතූ දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර හිමියෝ මෙසේ කීහ.
“මේ රටේ සඟ පරපුර මෙන්ම, අනෙකුත් ව්යාපාර සහ ජනතාව රැකෙන්නේ ගොවියා වී ගොවිතැන් සිදු කළොත් පමණ යි. ඔවුන් ගොවිතැන අත්හැරියොත් හෙට දවසේ රටවැසියන්ට සාගතේ මැරෙන්න වේවි. මෙම තත්ත්වය සැලකිල්ලට ගෙන රජය වහාම ගොවියාට සවන් දී ඔවුන්ගේ ඉල්ලීම් කරන ලෙස අපි රජයට බලකර ඉල්ලා සිටිනවා.“ නා හිමියෝ කීහ.
තව දින කිහිපයකින් රජය ගොවියාගේ සාධාරණ ඉල්ලීම් වලට ඇහුම්කන් නොදී, ගොවියා තව තවදුරටත් තලාපෙළා දමන්නේ නම් දිඹුලාගල බුද්ධ ශ්රාවක සංඝ සභාව මෙන්ම පොලොන්නරුවේ සියලු භික්ෂූන් වහන්සේලා ඒකරාශී වී සමස්ත ගොවි ජනතාව වෙනුවෙන් දැවැන්ත අරගලයක් බකමූණ නගර මධ්යයේ ආරම්භ කරන බවද රාහුලාලංකාර නාහිමියෝ කීහ .
අඛණ්ඩ උපවාසයේ නිරත ගොවි නියෝජිතයින් සඳහන් කළේ තමන් උපවාසය නිරත අට්ටාලයට පොලොන්නරුවේ එක්තරා දේශපාලන පක්ෂයකයක මැරයින් පිරිසක් ප්රහාරයක් එල්ල කිරීමට සැලසුම් කර ඇති බවත්, ඊට මුහුණ දීම සඳහා ඇලහැර හා මොරගහකන්ද ගොවිජන ව්යාපාරයේ සියලු ගොවීන් සූදානම් බවත් ය.
මෙම විරෝධතා ව්යාපාරය පැය තුනක පමණ කාලයක් පැවැති අතර එම මාර්ගයේ ගමන් කරන රථවාහනවලට බකමූණ පොලිස් නිලධාරින් විසින් විකල්ප මාර්ග භාවිතා කිරීමට කටයුතු සලසා තිබුණි.
