කොරියාවේ සිට පැමිණි සිය ඥාති පුත්රයා රැගෙන ඒමට කටුනායක ගුවන්තොටුපලට ගිය අමාත්ය කෙහෙළිය රඹුක්වැල්ලගේ උපදේශක හිමිනමක් සන්තකයේ තිබූ රුපියල් ලක්ෂ හැත්තෑ දෙකකට අධික මුදලක් එම හිමිනම සහ රියදුරු මත් කරවා කොල්ල කෑ බව කියන තරුණියක් සම්බන්ධව විශේෂ පොලිස් විමර්ශනයක් ආරම්භ වී තිබේ.
විමර්ශන ආරම්භ වී ඇත්තේ ඊයේ (16) එම හිමිනම විසින් කළ පැමිණිල්ලක් පදනම් කරගනිමිනි.
වාර්තාවන පරිදි සිද්ධිය මෙසේය.
උක්ත හිමිනමගේ ඥාති පුත්රයා කොරියාවේ සිට පැමිණෙන බැවින් පෙරේදා (15) ඔහුව රැගෙන යෑම සඳහා හිමිනම රියදුරු ද සමග කටුනායක ගුවන්තොටුපලට පැමිණ තිබේ. තරුණයා පිළිගැනීම සඳහා කොරියාවේ සිටිය දී මුහුණුපොතින් දැන හඳුනාගත් තරුණියක් ද ගුවන්තොටුපලට පැමිණ ඇත.
මේ අතර අදාල තරුණයා නඩුවකට පෙනී නොසිට වරෙන්තු වී සිටීම නිසා ගුවන්තොටුපලින් පිටවීමේ පර්යන්තයේ දී ඔහුව අත්අඩංගුවට ගෙන මීගමුව උසාවියට ඉදිරිපත් කර තිබේ. එහිදී තරුණයා සතුව තිබූ ලක්ෂ හැත්තෑ දෙකකට අධික මුදල් ප්රමාණයක් මෙම හිමිනමට භාර දී ඇත.
හිමිනම පොලිසියට පවසා ඇත්තේ තමන්ට සහ රියදුරුට තරුණයා මුහුණුපොතින් හඳුනාගත් තරුණිය බීමට සිසිල් පැන් ගෙනත් දුන් බවය. එය පානයෙන් පසු මද වේලාවක් යනතුරු තමාටත් රියදුරු තැනටත් යම් මත් ගතියක් ඇති වූ බවය. එහෙත් ටික වේලාවකින් ඒ මත් ගතිය පහ වී ගිය බවත් අදාල තරුණිය ද රියෙහි නන්වාගෙන පැමිණ ඇයව දෙමටගොඩින් බැස්සවූ බවත් හිමිනම පොලිසියට කියා ඇත.
පසුව බලද්දී සිය ඥාති පුත්ර තරුණයා තමන්ට භාර දුන් මුදල් තමන් තැබූ ස්ථානයේ නොතිබුණු බව හිමියන් පොලිසියට ප්රකාශ කර තිබේ.
තරුණිය පිළිබඳ කිසිම නිශ්චිත තොරතුරක් තවම සොයා ගත නොහැකි වූ බවත් මෙය සංවිධානාත්මක අපරාධ කල්ලියක වැඩක් දැයි විමර්ශන අංශ සොයා බලන බවත් පොලිසිය පවසයි.
