දිනසේන රතුගමගේ –
යාපනයේ ක්රියාත්මක ” ආවා කල්ලියේ ” නායකයා බවට සැක කෙරෙන ප්රසන්න නල්ලලිංගම් ටොරෙන්ටෝ පොලිස් අත් අඩංගුවට පත්වී ඇති අතර ඔහු වහාම කැනඩාවෙන් පිටුවහල් කරන ලෙස කැනඩාවේ ටොරෙන්ටෝ නුවර අධිකරණය 16 දා නියෝග කොට තිබේ.
2021 වසරේදී යාපනයෙන් ප්රංශයට පලාගොස් ඇති මොහු 2022 වසරේදී ප්රංශයේ පැරිස් නුවර අසලදි පුද්ගලයින් පිරිසකට මාරාන්තික ප්රහාරයක් එල්ල කොට එක් පුද්ගලයෙකු මරා දමා පසුව ඔහු ඇමරිකාව හරහා කැනඩාවට ගොස් ඇත.
2022 සැප්තැම්බර් මාසයේදී ප්රංශයේදී මැර කල්ලියක් මෙහෙයවමින් සහ අපරාධය සැලසුම් කරමින් අබිරාමන් බාලකිරිෂ්ණන් නැමැති පුද්ගලයෙක් ඝාතනය කිරීම සහ තවත් පුද්ගලයෙකු ඝාතනය කිරීමට තැත් කිරීම සම්බන්ධව ප්රංශ පොලිසිය ඔහුට එරෙහිව චෝදනා ගොනු කර තිබිණි. අභිරාමන් බාලක්රිෂ්නන් යනු යාපනයේ ක්රියාත්මක අවා කල්ලියට ප්රතිවිරුද්ධ එල්.සී බෝයිස් නැමැති සංවිධානයක ක්රියාකාරිකයෙක් බව හෙළි වී ඇත.
ඔහු ප්රංශයේ ජීවත්ව සිටියදීත් කැනඩාවට යාමෙන් පසුවත් එම රටවල් දෙකේදීම මිනිසුන් බිය ගන්වා මුදල් කප්පම් වශයෙන් ලබා ගැනීමත් මංකොල්ල කෑමත් කුලියට අපරාධ සිදු කළ බවටත් ඔහුට එරෙහිව චෝදනා ඉදිරිපත් වී ඇත.
කැනඩාවේ ටොරෙන්ටෝ නුවර ඔහු තාවකාලිකව පදිංචි වී සිටියදී ඔහුව ටොරෙන්ටෝ පොලීසිය විසින් අත් අඩංගුවට ගෙන තිබේ.
එම සිදුවීම සම්බන්ධයෙන් ඔහුගෙන් කළ ප්රශ්න කිරීම් වලදී කැනඩාවේ තවත් අපරාධ රැසකට ඔහු සම්බන්ධ බවට තොරතුරු අනාවරණය වී ඇති අතර එම සිද්ධීන් සම්බන්ධයෙන් පැවති නඩු විභාග වලින් පසුව ටොරෙන්ටෝ අධිකරණය ඔහුව කැනඩාවෙන් පිටුවහල් කිරීමට නියෝග කොට ඇත.
එම නියෝගයට අනුව ආවා කල්ලි නායකයා බවට සැක කෙරෙන එම පුද්ගලයාව දින 30 ක් ඇතුළතදී කැනඩාවෙන් පිටුවහල් කරන ලෙස නියෝග කොට තිබේ.
යාපනයෙන් ඔහු කැනඩාවට යාමට පෙර ප්රංශයේ ජීවත් වී සිට ඇති අතර ඔහුගේ ලිපිනයද ප්රංශයේ ලිපිනයක් වන නිසා ඔහුව පිටුවහල් කළ යුත්තේ ප්රංශයට බවද නඩු තීන්දුවේ සඳහන් වෙයි.
