ඉඳුනිල් කහටපිටිය –
මහා නායක හිමියන් අවධාරණය කළේ අලුත් අවුරුද්දක් එළඹී පසු කිරි උතුරුවා ප්රතිඥා දෙමින් වැඩ ආරම්භ කර ටික දිනකින් පුරුදු රටාවටම වැඩ කරන පාලකයින්ගෙන් රටට ජනතාවා දී වෙනස්කම් බලාපොරොත්තු විය නොහැකි බව මල්වතු පාර්ශවයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියෝ අද (02) පැවසූහ.
සාධාරණ සමාජයක් සඳහා වූ ජාතික ව්යාපාරයේ සභාපති, හිටපු කතානායක, කරූ ජයසූරිය අද (02) මල්වතු මහා විහාරයට ගොස් මහනායක හිමිපාණන් බැහැ දැක ආශිර්වාද ලබාගත් අවස්ථාවේ උන්වහන්සේ මේ බව ප්රකාශ කළහ.
ජනාධිපති ධූරයට පත් වූ පසු විධායක ජනාධිපති ක්රමය අහෝසි කිරීමට තමන් වහන්සේ හමුවී පොරොන්දු දුන් දේශපාලන නායකයන් ගේ හැසිරීම මහානායක ධූරයට පත්ව ගෙවුණු විසි වසරක කාලය තුළම තමන් අත් අත් දුටු බව උන්වහන්සේ කීහ.
මල්වතු නාහිමියන් පවසන්නේ එ් සියලුම දේශපාලකයින් තමන් වහන්සේ හමුවී ලබා දුන් පොරොන්දු ජනාධිපති ධූරයට පත් වූ පසු කඩ කළ බවය.
මේ රටේ සිංහල හා දෙමළ ජන කොටස් තාමත් ජීවත් වෙන්නේ එකිනෙකා කෙරෙහි අවිශ්වාසයෙන් බවත් පටු අදහස් දරන කණ්ඩායම් මෙම ජන කොටස් දෙකේම සිටින බවත් මෙහි දී අදහස් දැක්වූ කරූ ජයසූරිය කීවේය.
දෙමළ ඩයස්පෝරාව නියෝජනය කළ පිරිස මෙතෙක් කල් රටට එරෙහි මතයක සිටියත් ඔවුන් මේ වනවිට රටේ සංවර්ධනය වෙනුවෙන් සහය දීමට එකඟතාව පළකර තිබෙන බැවින් ඔවුන් ගේ මතය එක්වරම ප්රතික්ෂේප නොකර ඒ සම්බන්ධව සාකච්ඡා කර පොදු මතයකට ඒම වැදගත් බවත් ඔහු පැවසුවේය.
විධායක ජනපති ධූරය අහෝසි කරන්න ගත් උත්සාහය සෑම අවස්ථාකම ව්යර්ථ වූයේ පටු දේශපාලනය නිසා යැයි ද කරු ජයසූරිය කීවේය.
