ශ්රියානි විජේසිංහ –
සිංහල දෙමළ අලුත් අවුරුදු කාලයේ සියයට 36 ක් හදිසි අනතුරු සිදු වනුයේ ගිනිකෙළි භාවිතය නිසා බව සමීක්ෂණ වාර්තාවලින් අනාවරණය වී ඇතැයි සෞඛ්ය ලේකම් විශේෂඥ වෛද්ය පාලිත මහීපාල පැවසීය.
රතිඤ්ඤා හා ගිනිකෙළි භාවිතය නිසා සියයට 17 ක් අක්ෂි ආබාධ වාර්තා වන බවත් එම අනතුරු සියල්ලක්ම සිදු වනුයේ අනාරක්ෂිත භාවිතයන් නිසා බවත් ඔහු ප්රකාශ කළේය.
සිංහල දෙමළ අලුත් අවුරුදු උදාවත් සමග විවිධාකාරයේ අනතුරු නිසා ඇසට සිදු වන අනතුරුවල වර්ධනයක් ඇතැයි ද, රතිඤ්ඤා, ගිනිකෙළි, ගෘහස්ථ අනතුරු හා මාර්ග අනතුරු වැඩිවීම මීට හේතු වී ඇතැයි ද ඔහු පැවසුවේය.
සමීක්ෂණ දත්ත අනුව ගිනිකෙළි ද්රව්ය නිසා ඇති වන අනතුරු අතරින් වඩාත්ම බහුල වනුයේ අත් සහ ඇගිලිවලට සිදු වන අනතුරු ය. සියයට 46 ක් හදිසි අනතුරු තුවාලවලින් සියයට 17 ක් ඇස්වලටත්, සියයට 17 ක් මුහුණ හිස ඇතුළු ප්රදේශ ආශ්රයටත් සිදු වන බවට ද දත්ත වාර්තා වේ.
මෙම අනතුරු නිසා නව අවුරුද්දේ ආරම්භය රෝහල්ගත කිරීමේ සිට ජීවිතාන්තය දක්වා දෑස් අහිමි වීම හෝ ස්ථිර පෙනීම අඩු වීමක් සිදු විය හැකි බව ද වෛද්යවරයා ප්රකාශ කළේය.
කුඩා පිරිමි දරුවන් හා තරුණයින් බහුතරයක් අනතුරට ලක්වන්නන්ගේ ගණයට ගැනෙන අතර එම දත්ත අනුව වඩාත්ම අනතුර ඇති කර තිබෙනුයේ සියයට 32 ක් ලෙස රතිඤ්ඤාවලින් බවත් අහස්කූරු, බඹර චක්ර, රොකට් හැඩයේ පුපුරණ ද්රව්ය සහ නිලාකූරුවලින් අනතුරු සිදු වන බවත් ඔහු පැවසුවේය.
පත්තු කළ රතිඤ්ඤා පත්තු නොවීම නිසා නැවත පත්තු කිරීමට යාමෙන් සිදු වන අනතුරු ඉහළ යන බවට වෛද්යවරු පවසති.
අනවශ්ය ලෙස රතිඤ්ඤා හා ගිනිකෙළි භාවිතය නිසා අනතුරු සිදු වීම වළක්වා ගත යුතු බවත් මෙම භාවිතය අවම කර ගැනීමට සමාජය දැනුවත් කළ යුතු බවත් හෙතෙම පැවසීය.
