අම්බලන්ගොඩ දෙල්දූව ප්රදේශයේ අවන්හලකට පැමිණි ඝාතකයෙක් එහි ඉහළ මහලේ රැඳි සිටි පුද්ගලයෙකුට වෙඩි තබා ඝාතනය කර තිබේ. ඝාතනය වුන අය සමග සිටි තවත් පුද්ගලයෙකුට වෙඩි වැදී බරපතල තුවාල සහිතව රෝහල්ගත කර ඇත.
කාර් රථයකින් පැමිණි ඝාතකයා ටි 56 ගිනි අවියකින් අද රාත්රී 8.30ත් 9ත් අතර මෙම ඝාතනය සිදුකර ඇත.
පොලිස් විමර්ශන අංශ සැක කරන්නේ මෙම ඝාතනය අම්බලන්ගොඩ ඥාති දෙපාර්ශවයක් අතර සිදුවන දාම ඝාතනයක දිගුවක් බවය.
මෙම ඝාතන දාමය අලුතින් ආරම්භ වන්නේ පසුගිය ජූලි මස 26 වැනිදා අම්බලන්ගොඩ දී වසන්ත සොයිසා නැමැත්තා ඝාතනයත් සමගය.
මෙම ඝාතනයට මුල් වන්නේ අම්බලන්ගොඩ දී බූරු අජිත් නැමැත්තා ඝාතනය කිරීමේ සිද්ධිය ය. බූරු අජිත් ඝාතනය වන්නේ 2020 අගෝස්තු 22 දාය. එම ඝාතනයේ ප්රධාන සැකකරු වූයේ වසන්ත සොයිසාය.
වසන්ත සොයිසා බූරු අජිත් ඝාතනය සම්බන්ධව අත්අඩංගුවට පත් වී බන්ධනාගාරගතව සිට ඇප මත නිදහස්ව සිටි අයෙකි. එම ඝාතනය සම්බන්ධව බලපිටිය උසාවියේ පැවති නඩු වාරයට ගොස් යළි පැමිණෙමින් සිටියදී අම්බලන්ගොඩ ඌරාවත්ත ප්රදේශයේ දී යතුරු පැදියකින් පැමිණි ඝාතකයින් දෙදෙනෙක් විසින් ඔහුව පසුගිය 26 වැනිදා වෙඩි තබා මරා දැම්මේය.
ඊට පසුදා එනම් ජූලි 27 අම්බලන්ගොඩ, ගලගොඩ ප්රදේශයේ මළ ගෙදරකට පැමිණි තුවක්කු කරුවෙක් එම මළ ගෙදර සිටි පුද්ගලයන් දෙදෙනෙකුට වෙඩි තබා ඝාතනය කළේය. එසේ ඝාතනය කරනු ලැබුවේ ඌරවත්තේ දී වසන්ත සොයිසාට වෙඩි තැබූ තැනැත්තාගේ සහෝදරයා බව කියැවිනි. ඔහු විජිත් සොයිසා නැමැති අයෙකි.
අද දෙල්දූවේ දී ඝාතනය වන්නේ වසන්ත සොයිසාගේ බාප්පාගේ පුතෙකි. එම ඝාතනය සිදුවන්නේ ගලගොඩ මළගෙදර දී සිදුවන ඝාතනයේ පලිය ගැනීමට විය හැකි බව විමර්ශන අංශ සැක පහළ කරයි.
අම්බලන්ගොඩ පොලිසිය පරික්ෂණ පවත්වයි.
