අද (03) උදෑසන 6.45ට පමණ නාඳුනන වෙඩික්කරුවන් දෙදෙනෙක් යතුරුපැදියකින් පැමිණ ටී 56 ගිනි අවියකින් වෙඩි තබා පුද්ගලයෙකුට තුවාල සිදුකර පලායන ආකාරය දැක්වෙන සීසීටීවී දර්ශන මේ වනවිට නිකුත් වී තිබේ.
ගන්දර පොලිස් වසමේ දෙවුන්දර, කපුගම, ආරච්චිගේවත්ත ප්රදේශයේ නිවසක සිටි ජී.එච්. ප්රසාද් නිශාන්ත නැමැති 49 හැවිරිදි පුද්ගලයෙක් ප්රහාරකයන්ගේ ඉලක්කය වී ඇත. ඔහු සොයා එන යතුරුපැදිකරුවන් දෙදෙනෙකුගෙන් පසු පැදිකරු යතුරුපැදියෙන් බැස ජැකට් එක තුළ සඟවාගෙන ඇති ටී 56 ගිනි අවිය ගෙන පා ගමනින් පසුපසට විත් වෙඩි තබා පලා යන ආකාරය සීසීටීවී දර්ශනවල පෙනේ.
ප්රහාරයට ලක් වූ තුවාලකරු මාතර රෝහලට ඇතුළත් කර ඇත. අපරාධ විමර්ශකයින් වෙඩි තැබූ ස්ථානයේ තිබී ටී56 උණ්ඩ 03ක් සොයාගෙන ඇත.
මූලික විමර්ශනවලින් හෙළි වී ඇත්තේ මේ සිද්ධිය පසුපස මත්ද්රව්ය ජාවාරමකට අදාල ගනුදෙනුවක් ඇති බවය. විමර්ශන අංශ පවසන්නේ මෙම වෙඩි ප්රහාරයට ලක් වී තුවාල ලද පුද්ගලයාගේ පුතෙකුගේ දකුණු උරහිසෙහි පසුගිය මාර්තු 21 වැනිදා දෙවුන්දර ශ්රී විෂ්ණු දේවාලයේ දකුණු වාහල්කඩ අසල දී වෙඩි තබා ඝාතනය කළ තරුණයින් දෙදෙනාගේ රූප කොටා තිබුණු බවය. එම පච්චා කෙටූ තරුණයා මේ වනවිට ඉන්නේ ඩුබායි රාජ්යයේ බව විමර්ශන අංශ පවසයි.
එමෙන්ම තුවාල කරුගේ බිරිද ගේ වැඩිමල් සහෝදරියගේ පුතකු ද මේ වනවිට රැඳී ඉන්නේ ඩුබායි රාජ්යයේ බව වාර්තා වේ.
අද වෙඩි ප්රහාරයට ලක් වූ පුද්ගලයාට බස් රථ දෙකක් සහ බහුදින යාත්රා 03ක් ඇති බව විමර්ශන අංශ පවසයි. මූලික විමර්ශනවලින් අනාවරණය වී ඇත්තේ මෙම වෙඩි ප්රහාරයට හේතු වී ඇත්තේ පසුගිය මාර්තු 21 දෙවිනුවර ශ්රී විෂ්ණු දේවාලය අසල ඝාතනය වූ තරුණයින් ගේ පාර්ශවය සමග දිගටම සම්බන්ධතා පැවැත්වීම බවය.
ගන්දර පොලිසිය වැඩි දුර විමර්ශන පවත්වයි.
