මනම්පිටිය නිමල් ජයරත්න –
මේ වනවිට සහල් නිෂ්පාදනය කිරීම සඳහා ප්රමාණවත් පරිදි වී තොග තිබුණද ආනයනික සහල් මිල සමග තරග කිරීමට නොහැකි නිසා දේශීය සහල් නිෂ්පාදකයින් 75% කට වැඩි ප්රමාණයක් ඔවුන්ගේ කර්මාන්ත වසා ඇති බව එක්සත් සහල් නිෂ්පාදකයින්ගේ සංගමයේ සභාපති මුදිත් පෙරේරා පැවසීය.
ගොවියාත් කර්මාන්ත කරුවාත් වළ පල්ලට යවන වී අර්බුදයට හේතුව රජය අනවශ්ය පරිදි විදේශීය රටවලින් සහල් ආනයනය කිරීම බව ඔහු වැඩිදුරටත් පැවසුවේය.
සභාපතිවරයා මේ බව සඳහන් කළේ අද (16) පෙරවරුවේ පොළොන්නරුව සේවාගම ප්රදේශයේ පැවති මාධ්ය හමුවක් පවත්වමිනි.
ඔහු වැඩිදුරටත් මෙසේ ද කීවේය.
” 2021 ඔක්තෝබර් මාසයේ රජය සහල් ආනයන බද්ද කිලෝවකට සත විසිපහක් පැනවූ වකවානු තුළ සිට මේ දක්වා අපේ රටට සහල් මෙට්රික් ටොන් ලක්ෂ හතක් ආනයනය කර තිබෙනවා. රටට සහල් හිඟයක් හෝ වී හිඟයක් නොමැති කාලයක කෘෂිකර්ම ඇමැතිවරයා, වෙළඳ ඇමතිවරයාගේ, අත්තනෝමතික ක්රියාකලාපයන් සහ නොසැලකිලිමත් කම නිසා අනවශ්ය ලෙස සහල් රටට ආනයනය කර තිබෙනවා.“
මේ සියල්ල කොමිස් මුදල් පදනම් කරගෙනයි සිදුවෙන්නේ. 2021 /2022 රසායනික පොහොර තහනම නිසා මහ කන්නයේ වී නිෂ්පාදනය පසුබෑමක් ඇති වුණා. රනිල් වික්රමසිංහ ජනාධිපතිවරයා රසායනික පෝර ගෙන්වීමත් සමඟ 2022 යල කන්නයේ යම් සාර්ථකත්වයක් පෙන්නුම් කළා. 2021 / 22 යල කන්නයේ වී අස්වනුවල සියයට 50ක් පසුබෑම් නිසා අපේ රටට සහල් මෙට්රික් ටොන් ලක්ෂ නවයක් අහිමි වී තිබෙනවා,
“ඒත් සමගම මෙවැනි විට අපේ රටට රජය මගින් සහල් මෙට්රික් ටොන් ලක්ෂ හතක් ආනයනය කර තිබෙනවා. මේ නිසා අපේ රට තුළ වී සහ සහල් අතිරික්තයක් ඇති වුණා. “
“රටට අනවශ්ය පරිදි සහල් ආනයනය කිරීම නිසා වර්තමානයේ ගැටලු ගොඩක් සිදුවෙලා තිබෙනවා. විශේෂයෙන් සහල් නිෂ්පාදන කර්මාන්ත සේවකයන්ගේ රැකියා අහිමි වීම සහ ආදායම පහළ බැසීම, සහල් නිෂ්පාදකයින්ට බැංකු ණය ගෙවීමට ඇති අපහසුතාවය, සත්ව ආහාර නිෂ්පාදනය අඩුවීම නිසා පශු සම්පත් කර්මාන්තයට බලපෑම් ඇතිවී තිබීම උදාහරණ. “
“දේශීය සහල් නිෂ්පාදනය කලොත් සාමාන්යයෙන් සත්ව ආහාර මෙට්රික් ටොන් දාහක් දවසට නිෂ්පාදනය වෙනවා. දැන් ඒ සියල්ල අඩපණ වෙලා. මේ තත්වය නිසා කුකුල් මස් සහ බිත්තර මිල ඉහළ ගොස් තිබෙනවා. ඒ කර්මාන්තවල නියැලී සිටින සේවකයින්ට යන එන මං නැති වෙලා. “
“මේ තත්ත්වයන් සැලකිල්ලට ගෙන අපි ජනාධිපතිතුමාගෙන් ඕනෑකමින් ඉල්ලා සිටින්නේ සහල් ආනයනය නතර කරන ලෙසයි. ඒ වගේම ඒ සහල් ආනයනය කිරීමට යන වියදම කෘෂිකර්මාන්තයේ යෙදවුම් සඳහා ගොවින්ට ලබාදීමේ වැඩසටහනක් ක්රියාත්මක කරන්න කියලත් අපි ඉල්ලීමක් කරනවා.“
පෙරේරා සඳහන් කළේය.
