ශ්රියානි විජේසිංහ –
කොළඹ ජාතික අක්ෂි රෝහලේ ප්රධාන පරිපාලන නිලධාරීනිය රෝහලේ සම්පත් අයථා ලෙස භාවිත කරමින් කටයුතු කිරිම හේතුවෙන් ඇය පිලිබඳව වහාම පරික්ෂණයක් පවත්වන්නැයි ඉල්ලා රෝහලේ වෛද්යවරු අද (14) දින ආරම්භ කිරීමට නියමිතව තිබූ සංකේත වැඩ වර්ජනය සෞඛ්ය ලේකම්වරයාගේ මැදිහත්වීම මත තාවකාලීකව අත්හිටවු බව රජයේ වෛද්ය නිලධාරීන්ගේ සංගමයේ රෝහල් ශාඛාව සඳහන් කරයි.
සෞඛ්ය ලේකම්වරයා රෝහල් වෛද්යවරුන්ට මේ සම්බන්ධයෙන් සාකච්ඡාවක් ලබා දී ඇති බැවින් එම සාකච්ඡාව අවසන් වන තෙක් වැඩවර්ජනය තාවකාලිකව නතර කල බවත් එම සාච්ඡාවෙන් සාධාරණ විසදුමක් නොලැබුණහොත් වර්ජනය නැවත ආරම්භ කරන බවත් සංගමය සදහන් කරයි.
මෙම පරිපාලන නිලධාරිනිය රාජකාරිය අවසන් කර රෝහලෙන් පිටව යාම සදහා රෝහලේ ගිලන්රථය භාවිත කිරීම, රෝහලේ ගොඩනැගිලි ඉදිකිරීමේදී ඇතැම් කොන්ත්රාත් බලහත්කාරයන් ඇය වෙත පවරා ගැනීම ආදී අයතා කටයුතු බොහෝමයක් සිදුකරන බැවින් ඇයගේ ක්රියාකලාපය පිලිබඳව වහාම පරික්ෂණයක් පවත්වන්නැයි සංගමයේ රෝහල් ශාඛාව සෞඛ්ය සේවා අධ්යක්ෂ ජනරාල්වරයාගෙන් කීප විටක් ඉල්ලීම් කළද එය මේ වන විටත් ඉටුකර නොමැති බවත් ඇගේ ස්වාමියා සෞඛ්ය සේවා අධ්යක්ෂ ජනරාල්වරයාගේ ගජමිතුරෙකු බැවින් මෙම පරික්ෂණය යටගසන බව සංගමය චෝදනා කරයි.
මෙම පරික්ෂණය යට ගැසීමට සෞඛ්ය අමාත්යංශයේ නියෝජ්ය සෞඛ්ය සේවා අධ්යක්ෂ ජනරාල්වරයෙකුගේද සහය ලැබෙන බවට තොරුතුරු අනාවරණය වී ඇති බව පැවසේ.
කෙසේ නමුත් ඇය සම්බන්ධයෙන් ස්වාධීන පරික්ෂණයක් සිදුකරන තෙක් ඇයව අක්ෂි රෝහලෙන් තාවකාලිකව වෙනත් ස්ථානයකට මාරුකරන ලෙසට සංගමය ඉල්ලා සිටියි.
