තුෂාරී කළුබෝවිල –
ප්රවීණ වේදිකා රංග ශිල්පයෙක් මෙන් ම චිත්රපට හා ටෙලි නාට්ය රංගවේදියෙක් ද වූ සම්පත් තෙන්නකෝන් සිය ජීවන රඟමඩලින් සදහට ම බැස ගියේ ය.
කලක් තිස්සේ අක්මාව ආශ්රිත රෝගී තත්ත්වයකින් පෙලුණු ඔහු අක්මා බද්ධ සැත්කමට ද සූදානමින් සිටියේ ය. මීට මාසයකට පමණ පෙර හදිසියේ රෝගී තත්ත්වය උත්සන්න වූයෙන් නොවැම්බර් 05 වැනිදා කොළඹ ජාතික රෝහලේ අක්මා බද්ධ කිරීමේ ඒකකයේ නතර වී ප්රතිකාර ලබමින් සිටියදී ඔහු මිය ගියේය.
ඔහුගේ ආදරණීය බිරිඳ වන ජනප්රිය රංගන ශිල්පී ගීතා කාන්ති ජයකොඩි තම ආදරණීය සැමියා පිළිබඳ කීවේ මෙසේ ය.
“සම්පත්ට අක්මා බද්ධයක් කළයුතු බවට වෛද්ය නිර්දේශය ලැබුණ දවසේ ඉඳලා ඒ සැත්කමට අපි සූදානම් වුණා. බී පොසිටිව් වර්ගයේ අක්මාවක් ලැබෙන තුරු අපි බලාගෙන හිටියා. අවශ්ය කාලෙදි එය ලැබුණා නම් තව කාලයක් ඔහුට අපිත් එක්ක ඉන්න තිබුණා. ඒත් ඔහු රැගෙන ආ කාලය නිම වෙන්න ඇති.” ඇය කීවා ය.
1956 ජුනි 20 වැනිදා උපත ලද සම්පත් තෙන්නකෝන් මියයන විට 62 වැනි වියේ පසුවිය. කොළඹ ඉසිපතන විද්යාලයයෙන් අධ්යාපනය හැදෑරූ ඔහු දයාරත්න රටගෙදරගේ “ගුරු ලිපි” වේදිකා නාට්යයෙන් පසුව ඩග්ලස් සිරිවර්ධනගේ “අඹුසැමියෝ” ද පසුව ඒකා-අධිපති, ජගන්මා, මාල වළලු, මායාදේවි, රෝමය ගිනිගනී, සුබ සන්ධ්යාවක්, සුදු රෙදි හොරු මෙන් ම ජයලත් මනෝරත්නයන්ගේ ගුරු තරුව, පුත්ර සමාගම, තල මල පිපිලා ආදී වශයෙන් වේදිකා නාට්ය 50කට වැඩි ප්රමාණයක රංගනයෙන් දායක වී ඇත.
රත්නා ලාලනී ජයකොඩි ඔහුට හමුවන්නේ පුත්ර සමාගම වේදිකා නාට්යයේ දී ය.
සම්පත් පුරුද්දක් ලෙස ලුම්බිණි රඟහලේ වේදිකාගත වන නාට්ය නැරඹීමට යොමු වූ අයෙකි. 1990 දී විජය ධර්ම ශ්රී ගේ හිමගිර චිත්රපටයට සම්බන්ධ වූ පසු ගිනි අවි සහ ගිනි කෙළි, සරෝජා, සිරි රජ සිරි, සිරි පැරකුම්, පත්තිනි, ප්රසිඩන්ට් සුපර් ස්ටාර්, එක ගෙයි සොකරි, නිම්හිම්, මහාචාර්ය සුනිල් ආරියරත්නයන්ගේ කදිර දිව්ය රාජ නම් නවත ම චිත්රපටය ද ඇතුළු ව චිත්රපට 12කට පමණ රංගනයෙන් දායක විය.
“2013 දී සම්පත් සහ මම එකතුවෙලා දින හතක් පුරා නව නගර ශාලාවේ දී අපි දෙන්නා රඟපෑ නාට්ය හතක් ප්රදර්ශනය කළා. අපි එය “අභිනයන සම්පත් – රත්නා රංග භූමිකා” ලෙස නම් කළා. අපි දෙන්නාගේ තිස් වසරක නාට්ය රංග ජීවිතය එයින් සැමරුවා.” යැයි රත්නා ලාලනී සිහිපත් කළා ය.
ජනප්රිය රංග ශිල්පීන් වන ගීතා කාන්ති ජයකොඩි, පබෝධා සන්දීපනී, බිමල් ජයකොඩි, සුජානි මේනකා සම්පත්ගේ සමීපතම ඥාතීන් වන අතර සම්පත් කලාකරුවන් බොහෝ පිරිසකගේ ආදරය දිනාගත් නිහතමානි, සැබෑ මිත්රශීලී, ලෙන්ගතු, මිතුරෙකි.
නිතර ම විනෝදෙන්, සැහැල්ලුවෙන් ජීවත් වීමට ප්රිය කළ අයෙකි. මේ සුහදශීලී කලාකරුවාට නිවන් සුව පතමු.
