යුගයක් නිමා කරමින් බැස ගිය අසම සම ක්‍රියාදාම තරුව – “චක් නොරිස්” ගැන පුංචි සටහනක්!

උපේක්ෂා උඩුවැරැල්ල –

ලොවක් හඳුනන සුප්‍රකට සටන් කලා ශිල්පියෙකු, දක්ෂ නළුවෙකු, ලේඛකයෙකු සහ සංස්කෘතික සංකේතයක් වූ කාලෝස් රේ “චක්” නොරිස් (Carlos Ray “Chuck” Norris) වයස අවුරුදු 86ක්ව සිටියදී අභාවප්‍රාප්ත විය.

1940 මාර්තු 10 වන දින උපත ලැබූ ඔහු,  2026 මාර්තු 19 වන දින මෙලොවින් සමුගත්තේ සිනමාව සහ සටන් කලාව තුළ නොමැකෙන සලකුණක් තබමිනි. ඔහුගේ සුවිශේෂී සටන් කලා කුසලතාවය සහ අසමසම ක්‍රියාදාම රංගන පෞරුෂය හේතුවෙන් ඔහු ලොව පුරා අතිශය ජනප්‍රියත්වයට පත් විය.

දුක්ඛිත ළමා කාලය

ඔක්ලොහෝමා ප්‍රාන්තයේ රයන් හි උපත ලැබූ කාලෝස් රේ නොරිස්, විල්මා ලී සහ රේ ඩී නොරිස් යන යුවළගේ දරුවන් තිදෙනාගෙන් වැඩිමලා විය. ඔහුගේ පියා දෙවන ලෝක යුද්ධයට සහභාගී වූ හමුදා නිලධාරියෙකු වූ අතර පසුව කාර්මික ශිල්පියෙකු සහ රියදුරෙකු ලෙස සේවය කළේය.

චක් නොරිස්ගේ ළමා කාලය බෙහෙවින් අසීරු එකක් විය. තම පියා දැඩි ලෙස මත්පැන් පානයට ඇබ්බැහි වී සිටි බවත්, දෙමාපියන් දික්කසාද වීමෙන් පසු පියා පවුලෙන් ඈත් වූ බවත් ඔහු පවසා ඇත. ලැජ්ජාශීලී සහ ඉගෙනීමට එතරම් දක්ෂ නොවූ දරුවෙකු ලෙස තමන්ව හඳුන්වා දුන් ඔහු, වයස අවුරුදු 10 දී පවුල සමඟ කැලිෆෝනියාවේ ටොරන්ස් වෙත පදිංචියට ගියේය.

1958 දී, එනම් වයස අවුරුදු 18 දී, නොරිස් එක්සත් ජනපද ගුවන් හමුදාවට බැඳුණු අතර දකුණු කොරියාවේ ඔසාන් ගුවන් හමුදා කඳවුරේ සේවය කළේය. ඔහුගේ ජීවිතය වෙනස් කළ සටන් කලාව ඔහුට මුලින්ම හමු වූයේ එහිදීය. ඔහු එහිදී ‘ටැං සූ ඩෝ’ (Tang Soo Do) නැමැති කොරියානු සටන් ක්‍රමය ප්‍රගුණ කිරීමට පටන් ගත්තේය. 1962 දී හමුදා සේවයෙන් ඉවත් වී නැවත ඇමරිකාවට පැමිණි ඔහු, කරාටේ පාසල් ජාලයක් ආරම්භ කළේය. එහිදී ස්ටීව් මැක්වීන් සහ ප්‍රිසිලා ප්‍රෙස්ලි වැනි ප්‍රසිද්ධ පුද්ගලයින්ට ද ඔහු සටන් කලාව ඉගැන්වීය. පසුව රංගන ක්ෂේත්‍රයට යොමු වීමට ඔහුට දිරිගැන්වීමක් ලැබුණේ ද ස්ටීව් මැක්වීන්ගෙනි.

ලෝක කරාතේ ශූරයා  රංග ශිල්පියෙක් වීම

1960 දශකයේ අගභාගයේ සහ 70 දශකයේ මුල් භාගයේදී නොරිස් වෘත්තීය ලෝක මධ්‍යම බර පන්තියේ කරාටේ ශූරතාවය (Professional World Middleweight Karate Championship) පිට පිටම හය වතාවක් හෝ හත් වතාවක් දිනා ගනිමින් සටන් ලොව ආධිපත්‍යය පැතිරවීය. ඔහු ටැං සූ ඩෝ (10 වන ශ්‍රේණිය) සහ ටයිකොන්ඩෝ (8 වන ශ්‍රේණිය) ඇතුළු විවිධ සටන් ක්‍රම රැසක කළු පටි හිමිකරුවෙකි. පසුව ඔහු ‘චුන් කුක් ඩෝ’ (Chun Kuk Do) නමින් තමන්ගේම සටන් කලා ක්‍රමයක් ද හඳුන්වා දුන්නේය.

ඔහුගේ සිනමා ජීවිතය කුඩා චරිතවලින් ආරම්භ වුවද, 1972 දී බෲස් ලී සමඟ ‘වේ ඔෆ් ද ඩ්‍රැගන්’ (Way of the Dragon) චිත්‍රපටයේ රඟපෑමත් සමඟ ඔහු ජාත්‍යන්තර අවධානයට ලක් විය. එහි රෝමයේ කොලෝසියම්හි පැවැත්වෙන ඔවුන් දෙදෙනාගේ සටන් දර්ශනය සිනමා ඉතිහාසයේ විශිෂ්ටතම සටන් දර්ශනයක් ලෙස අදටත් සැලකේ.

ඉන් පසුව 1980 දශකයේදී ‘මිසින් ඉන් ඇක්ෂන්’ (Missing in Action), ‘ද ඩෙල්ටා ෆෝර්ස්’ (The Delta Force) සහ ‘කෝඩ් ඔෆ් සයිලන්ස්’ (Code of Silence) වැනි අතිශය සාර්ථක ක්‍රියාදාම චිත්‍රපට රැසකට ඔහු දායක විය. මෙමඟින් යුක්තිය වෙනුවෙන් පෙනී සිටින, පරාජය කළ නොහැකි වීරයෙකුගේ ප්‍රතිරූපය ඔහු තුළ ගොඩනැගුණි.

1990 දශකයේදී ‘වෝකර්, ටෙක්සාස් රේන්ජර්’ (Walker, Texas Ranger) නැමැති රූපවාහිනී කතා මාලාව හරහා ඔහු නැවතත් ඉමහත් ජනප්‍රියත්වයක් ලැබීය. වසර අටක් පුරා විකාශය වූ මෙම වැඩසටහන ඔහුව නව පරපුරේ රසිකයින් අතරට ද රැගෙන ගියේය.

භක්තිමත් කිතුණුවා

රංගනයට අමතරව නොරිස් භක්තිමත් කිතුනුවෙකු වූ අතර සටන් කලාව, යෝග්‍යතාවය, දර්ශනය සහ දේශප්‍රේමය පිළිබඳ පොත් කිහිපයක්ම රචනා කළේය. ඔහු 1958 දී ඩයෑන් හෝල්චෙක් සමඟ විවාහ වූ අතර ඔහු දරුවන් කිහිප දෙනෙකුගේ පියෙකි. ඔහු පුණ්‍යායතන රැසකට සම්බන්ධ වෙමින් සමාජ සේවා කටයුතුවල ද නිරත විය.

අන්තර්ජාලය තුළ “චක් නොරිස් ෆැක්ට්ස්” (Chuck Norris Facts) නමින් ඔහු ගැන නිර්මාණය වූ හාස්‍යජනක මෙන්ම අතිශයෝක්තියෙන් යුත් මීම් (Memes) හරහා ද ඔහු විශාල ප්‍රසිද්ධියක් ලැබීය.

ඔහුගේ 86 වන උපන්දිනය සැමරීමෙන් ටික දිනකට පසු ඇති වූ හදිසි වෛද්‍ය තත්ත්වයක් හේතුවෙන් හවායි හි කවුආයි (Kauai) හිදී ඔහු මෙලොවින් සමුගත්තේය. ඔහුගේ පවුලේ සාමාජිකයින් ඉන්ස්ටග්‍රෑම් හරහා පණිවිඩයක් නිකුත් කරමින් ප්‍රකාශ කළේ, තම ආදරණීය චක් නොරිස්ගේ හදිසි වෙන්වීම පිළිබඳව දැඩි ශෝකයට පත්වන බවයි.

සටන් කලා ලොවේ පුරෝගාමියෙකු, සිනමා තාරකාවක් සහ විනයගරුක ජීවිතයකට ආදර්ශයක් වූ චක් නොරිස්ගේ නාමය සදාකාලිකවම ඉතිහාසයට එක් වනු ඇත.