කපිල කේ හීනටියන –
අමෙරිකානු යුද හමුදා මාණ්ඩලික ප්රධානී ජෙනරාල් රැන්ඩි ජෝර්ජ් වහාම ක්රියාත්මක වන පරිදි ධුරයෙන් ඉවත් කර ඇත්තේ ඉරානයට එරෙහිව සැලසුම් කර ඇති අමෙරිකානු පාබල හමුදා ආක්රමණයකට (Ground Invasion) විරුද්ධව කරුණු දැක්වීම හේතුවෙන් බව හමුදා අභ්යන්තර ආරංචි මාර්ග උපුටා දක්වමින් විදෙස් මාධ්ය වාර්තා කරයි.
ආරක්ෂක ලේකම් පීට් හෙග්සෙත් විසින් 2026 අප්රේල් 3 වන දින ගොඩබිම් ආක්රමණය ගැන මෙම තීරණය ගෙන තිබිණි. එහෙත් මෙවැනි ආක්රමණයකදී අමෙරිකානු සෙබළුන් දහස් ගණනක් මිය යා හැකි බවත් එය බරපතල උපායමාර්ගික අවදානමක් බවත් පවසමින් ජෝර්ජ් ඊට විරුද්ධත්වය පළ කර තිබුණු බව එම වාර්තා අනාවරණය කරයි.
හමුදා අණදීමේ දාමයට එරෙහිව සිය හෘද සාක්ෂියට එකඟව ඔහු ගත් මෙම ස්ථාවරයත් සමඟ, ඔහු ඇතුළු තවත් ජ්යෙෂ්ඨ ජෙනරාල්වරුන් වන ඩේවිඩ් හොඩ්න් සහ විලියම් ග්රීන් ද පෙන්ටගනයේ නායකත්ව වෙනස්කම් යටතේ ඉවත් කර ඇති බව වාර්තා වේ.
කෙසේ වෙතත් බටහිර ආසියාවේ යුදමය උණුසුම උච්චතම අවස්ථාවකට පැමිණ ඇති මොහොතක සිදුවූ මෙම ඉවත් කිරීම් සම්බන්ධයෙන් පෙන්ටගනය මෙතෙක් නිල වශයෙන් සවිස්තරාත්මක හේතු දක්වා නැත. ඔවුන් පවසන්නේ එය “නායකත්ව වෙනසක් සඳහා කාලය” බව පමණි.
එහෙත් ට්රම්ප් පරිපාලනයට හිතැති පාර්ශව පවසන්නේ හමුදා නායකත්වය රජයේ ප්රතිපත්ති සමඟ සමපාත විය යුතු බවය. විවේචකයින් පෙන්වා දෙන්නේ සක්රීය යුද ගැටුම් පවතින අවස්ථාවක සන්නද්ධ හමුදාව මෙලෙස දේශපාලනීකරණය කිරීම යුද මෙහෙයුම්වලට දැඩි බලපෑමක් එල්ල කළ හැකි බවය.
විශේෂයෙන්ම අමෙරිකානු F-15E යානයක් බිම හෙළීම සහ එහි කාර්ය මණ්ඩලය බේරා ගැනීමේ මෙහෙයුම් වැනි තීරණාත්මක ගැටුම් පවතින පසුබිමක මෙම තීරණය ගෙන ඇත.
ඉරාන තානාපති කාර්යාලයෙන් “පාලන තන්ත්රය වෙනස් කිරීමේ” පණිවුඩයක්
මෙම අභ්යන්තර ගැටුම හමුවේ දකුණු අප්රිකාවේ පිහිටි ඉරාන තානාපති කාර්යාලය සිය X (ට්විටර්) ගිණුම හරහා අමෙරිකානු බලධාරීන් දැඩි උපහාසයට ලක් කර තිබේ. අමෙරිකානු හමුදා නායකයින්ගේ රැස්වීමක ඡායාරූපයක් සංස්කරණය කරමින්, ඉවත් කළ නිලධාරීන් සලකුණු කර ඔවුන් පළ කර තිබූ සටහනක දැක්වුණේ “පාලන තන්ත්රය වෙනස් කිරීම සාර්ථකව සිදු විය” (The regime change happened successfully) යනුවෙනි.
මෙහිදී ඉරානය විසින් ට්රම්ප්ගේ මැතිවරණ සටන් පාඨය වන “MAGA” සහ සිනාසෙන ඉමෝජියක් ද යොදා ගනිමින් වොෂින්ටනයට රිදවන සුලු පණිවුඩයක් නිකුත් කර ඇත.
ටෙහෙරානයේ පාලනය වෙනස් කිරීමට පෙර අමෙරිකාවේ හමුදා පාලනය වෙනස් වී ඇති බව ඉරානය මින් අදහස් කරයි. මෙම පෝස්ටුව මේ වන විට ජාත්යන්තර මාධ්ය තුළ දැඩි කතාබහට ලක්ව තිබේ.
ජනාධිපති ට්රම්ප් ඉරානයේ පාලන තන්ත්රය වෙනස් කිරීමේ අරමුණින් දිගින් දිගටම කටයුතු කරන අතර, ඉරානය පවසා ඇත්තේ ඕනෑම ප්රහාරයක් කලාපීය මඩගොහොරුවක් බවට පත් කරන බවය.
යුධ සමයක මෙවැනි ඉහළ පෙළේ හමුදා ප්රධානීන් වෙනස් කිරීම මෙහෙයුම්වලට කෙසේ බලපානු ඇත්ද යන්න පිළිබඳව දේශපාලන විශ්ලේෂකයින් විමසිල්ලෙන් පසුවේ. 2026 අප්රේල් 5 වන දින වන විටත් පෙන්ටගනයෙන් හෝ ජෙනරාල් ජෝර්ජ්ගෙන් සෘජු ප්රකාශයක් ලැබී නොමැති අතර, ඉදිරි දින කිහිපය තුළ පෙන්ටගනය නිල නිවේදනයක් නිකුත් කරනු ඇතැයි අපේක්ෂා කෙරේ.
