අනතුරු ඇඟවීම යාවත්කාලීන කෙරේ…. දිස්ත්‍රික්ක රැසකට නායයෑම් අනතුරු ඇඟවීම්!

ජාතික ගොඩනැගිලි පර්යේෂණ ආයතනය නායේ යෑම් අනතුරු ඇඟවිම් යාවත්කාලීන කර තිබේ. අද උදෑසන 09ට පැය 24ක් පුරා වලංගුවන පරිදි  නිකුත් කර ඇති එම නිවේදනයට අනුව  ප්‍රදේශ ගණනාවකට පළමු මට්ටමේ  සහ දෙවැනි මට්ටමේ අනතුරු ඇඟවීම් නිකුත් කර ඇත.

පළමු ම්ටමේ අනතුරු ඇඟවීම්

බදුල්ල දිස්ත්‍රික්කයේ බණ්ඩාරවෙල සහ හාලි ඇල ප්‍රදේශිය ලේකම් කොට්ඨාසවලටත්, ගාල්ල දිස්ත්‍රික්කයේ  තවලම, ඇල්පිටිය සහ නියගම ප්‍රාදේශීය ලේකම් කොට්ඨාසවලටත්, කළුතර දිස්ත්‍රික්කයේ ඉංගිරිය සහ බුලත්සිංහල ප්‍රාදේශීය ලේකම් කොට්ටාසවලටත්,  නුවර දිස්ත්‍රික්කයේ පූජාපිටිය, තුම්පනේ, දෙල්තොට, උඩුනුවර, හතරලියැද්ද සහ හාරිස්පත්තුව ප්‍රාදේශීය ලේකම් කොට්ඨාසවලටත්,  කෑගල්ල දිස්ත්‍රික්කයේ බුලත්කොහුපිටිය, මාවනැල්ල, කෑගල්ල, අරනායක, යටින්තොට, වරකාපොල සහ රඹුක්කන ප්‍රාදේශීය ලේකම් කොට්ඨාසවලටත්, කුරුණෑගල රිදියගම ප්‍රාදේශීය ලේකම් කොට්ඨාසයට ත් පළමු මට්ටමේ අනතුරු ඇඟවීම් නිකුත් කර ඇත.

තවද මාතලේ දිස්තික්කයේ රත්තොට, නාවුල සහ අඹන්ගඟ කොරෙලේ, මාතර දිස්ත්‍රික්කයේ පිටබැද්දර, මොනරාගල දිස්ත්‍රික්කයේ වැල්ලවාය සහ බඩල්කුඹුර, නුවරඑළිය දිස්ත්‍රික්කයේ නෝර්වුඩ්, අඹගමුව කොරලේ සහ කොත්මලේ බටහිර ප්‍රදේශීය ලේකම් කොට්ඨාවලටත්, රත්නපුර දිස්ත්‍රික්කයේ ඇහැලියගොඩ, කලවාන, කුරුවිට, ගොඩකවෙල, කිරිඇල්ල සහ අයගම ප්‍රදේශීය ලේකම් කොට්ඨාසවලටත් මෙම නායේ යෑමේ පළමු මට්ටමේ අනතුරු ඇඟවීම නිකුත් කර ඇත.

මිලි මීටර 75ට වඩා වැඩි වර්ෂාවක් මෙම  ප්‍රදේශවලට ලැබි තිබුනු බැවින් වර්ෂාව තව දුරටත් පවතී නම් නායේ යෑමේ බෑවුම් කඩා වැටීමේ, ගල් පෙරළීමේ, පස් කණ්ඩි කඩා වැටීමේ සහ පොළොව ගිලා බැසිමේ අවදානම සම්බන්ධව විමසිලිමත් වෙන ලෙස එම ප්‍රදේශවාසී ජනතාවට ගොඩනැගිල පර්යේෂණ ආයතනය අවවාද කරයි.

දෙවැනි මට්ටමේ අනතුරු ඇඟවීම්

මෙම අනතුරු  ඇඟවීම සිද්ධ වන්නේ පසුගිය පැය 24 තුළ මිලි මීටර 100 ඉක්මවූ වර්ෂාපතනයක් සහිත කඳුකර ප්‍රදේශවල ජනතාවටය.  වර්ෂාව තවදුරටත් පවතින්නේ නම් නාය යෑම්, බෑවුම් කඩා වැටීම්, ගල් පෙරලීම් පොළොව ගිලා බැසීම්, පස් කණ්ඩා කඩා වැටීම්  පිළිබඳ අවධානයෙන් සිටින ලෙසත් අවශ්‍ය වුවහොත් ආරක්ෂිත ස්ථානයකට යෑමට සූදානම් වෙන ලෙසත්  එම අනතුරු ඇඟවීම් කර ඇති ප්‍රදේශවල ජනතාවට උපදෙස් ලබා දෙයි.

දෙවැනි මට්ටමේ වැඩිම  අනතුරු ඇඟවීම් ලැබෙන්නේ නුවර දිස්ත්‍රික්කයටය.  නුවර දිස්ත්‍රික්කයේ පස්බාගේ කොරලේ, යටිනුවර, උඩපලාත, පාතහේවාහැට, පන්විල, ගඟ ඉහළ කෝරලේ, ගඟවට කෝරලේ, සහ අකුරණ ප්‍රදේශීය ලේකම් කෝඨාසවටල සහ අවට ප්‍රදේශවලට මෙම අනතුරු ඇඟවීම් ලැබී තිබේ.

රත්නපුර දිස්ත්‍රික්යේ පැල්මඩුල්ල, රත්නපුර ප්‍රාදේශීය ලේකම් කොට්ඨාසත් ඇත්තේ දෙවැනි මට්ටමේ අනතුරු ඇඟවීමකය.

බදුල්ල දිස්ත්‍රික්කයේ පස්සර ප්‍රාදේශීය  ලේකම් කොට්ඨාසයට, ගාල්ල දිස්ත්‍රික්කයේ නෙළුව ප්‍රාදේශීය ලේකම් කොට්ඨාසයට, කලුතර දිස්ත්‍රික්කයේ  අගලවත්ත, බදුරලිය, මතුගම, හොරණ සහ වලල්ලාවිට ප්‍රාදේශීය ලේකම් කොට්ඨාසවලටත් මෙම දෙවන මට්ටමේ අවදානමක් සහිත අනතුරු ඇඟවීම් ප්‍රකාශිතය.

අවධානයෙන් පසුවන ලෙස ජනතාවගෙන් ඉල්ලා ඇත.