ශ්රී ලංකාවේ සාමය සහ සහජීවනය තහවුරු කිරීමේ අරමුණින් සංවිධානය කරනු ලබන ‘Walk for Peace Program in Sri Lanka’ හෙවත් ‘ඒහි පස්සිකො’ (Come and See) සාම පාද යාත්රාවට සහභාගී වීම සඳහා පූජ්ය පඤ්ඤාකර ස්වාමීන් වහන්සේ ප්රමුඛ භික්ෂූන් වහන්සේලා සිව් නමක් අද (21) උදෑසන කටුනායක බණ්ඩාරනායක ජාත්යන්තර ගුවන්තොටුපොළින් මෙරටට වැඩම කළහ.
ඇමරිකානු සාම පාගමන සඳහා නායකත්වය ලබාදුන් පූජ්ය පඤ්ඤාකර ස්වාමීන් වහන්සේ සමඟ ලොව පුරා කාගේත් ආදරයට පාත්ර වූ ‘ආලෝකා’ (Aloka) සුනඛයා ද මෙම සංචාරයට එක්ව සිටීම විශේෂත්වයකි. ගුවන්තොටුපොළ වෙත වැඩම කළ මහා සංඝරත්නය පිළිගැනීම සඳහා බුද්ධශාසන, ආගමික සහ සංස්කෘතික කටයුතු අමාත්ය ආචාර්ය හිනිදුම සුනිල් සෙනෙවි සහ ජනාධිපති ලේකම් ආචාර්ය නන්දික සනත් කුමානායක එක්ව සිටියහ.
ශ්රී මහා බෝ සමිඳුන් අභියස ආශිර්වාද පූජාව
මෙම සාම පාගමනට සහභාගී වන තවත් භික්ෂූන් වහන්සේලා කණ්ඩායමක් පසුගිය 18 වනදා මෙරටට වැඩම කළ අතර, අද පස්වරු 3.00ට ඓතිහාසික අනුරාධපුර ජය ශ්රී මහා බෝ සමිඳුන් අභියසදී පාද යාත්රාව වෙනුවෙන් ආශිර්වාද ලබා ගැනීම සිදු කෙරේ. එහිදී අටමස්ථානාධිපති හිමියන් ප්රමුඛ මහා සංඝරත්නය විසින් පූජ්ය පඤ්ඤාකර ස්වාමීන් වහන්සේ වෙත ශ්රී මහා බෝධි අංකුරයක් පූජා කිරීමට නියමිතය. අනතුරුව පස්වරු 4.00ට රුවන්වැලි මහා සෑ රඳුන් අභියස විශේෂ ආගමික වතාවත් පැවැත්වේ.
පාද යාත්රාවේ ගමන් මග
අප්රේල් 22 වනදා උදෑසන පවත්වනු ලබන සංඝගත දක්ෂිණාවෙන් පසු දඹුල්ල පූජා නගරයෙන් මෙම සාම පාගමන නිල වශයෙන් ආරම්භ වේ. එය නාඋල, මාතලේ, මහනුවර, කඩුගන්නාව, කෑගල්ල, තෝලංගමුව, කජුගම, යක්කල, මහර සහ කැලණිය යන ප්රදේශ පසු කරමින් අප්රේල් 28 වනදා කොළඹ නිදහස් චතුරස්රය වෙත ළඟා වීමට නියමිතය.
සමාප්ති උළෙල සහ රාජ්ය ගෞරවය
පාද යාත්රාවේ නිමාව සනිටුහන් කරමින්, වැඩම කරවන ලද ශ්රී මහා බෝධි අංකුරය ජනාධිපති අනුර කුමාර දිසානායක අතින් රාජ්යතාන්ත්රික මට්ටමින් ඇමරිකාවේ සිට වැඩම කළ මහා සංඝරත්නය වෙත පූජා කරනු ඇත. ඉන් පසු මහා සංඝරත්නය පෙරහැරකින් ගංගාරාම විහාරස්ථානය වෙත වැඩම කරවන අතර, එහිදී ජාතික මෝස්තර මධ්යස්ථානය සංවිධානය කරන ‘We are the Design’ වැඩසටහන ආරම්භ කිරීමට ද කටයුතු යොදා තිබේ.
ජනාධිපති ලේකම් කාර්යාලය, ක්ලීන් ශ්රී ලංකා ලේකම් කාර්යාලය, බුද්ධශාසන හා ආගමික කටයුතු අමාත්යාංශය ඇතුළු රාජ්ය හා පෞද්ගලික ආයතන රැසක පූර්ණ දායකත්වයෙන් මෙම පුණ්ය මහෝත්සවය සංවිධානය කර ඇත.
