හැටන් රංජිත් රාජපක්ෂ –
ශ්රී ලංකා පොදුජන පෙරමුණේ රත්නපුර දිස්ත්රික් පාර්ලිමේන්තු මන්ත්රී ප්රේමලාල් ජයසේකර (චොකා මල්ලි) නුවරඑළිය පොලිස් අපරාධ විමර්ශන අංශය මගින් අත්අඩංගුවට ගෙන තිබේ.
බලපත්ර නොමැති ගිනි අවියක් ළඟ තබා ගැනීම මෙම අත්අඩංගුවට ගැනීමට හේතුව වී ඇත.
මෙම සිද්ධිය 2026 අප්රේල් 21 වන අඟහරුවාදා දින නුවරඑළිය ප්රදේශයේදී සිදුව තිබේ. වාර්තා වන අන්දමට ජයසේකර තම පවුලේ සාමාජිකයන් සහ ඥාතීන් සමඟ නුවරඑළියේ සංචාරයක නිරත වී ඇති අතර, එම අවස්ථාවේදී අවිස්සාවෙල්ල ප්රදේශයේ සිට පැමිණි තවත් පිරිසක් සමඟ ආරවුලක් හටගෙන ඇත.
එම පිරිස නුවරඑළිය පොලිසියට ගොස් පැමිණිලි කර තිබුනේ ජයසේකර විසින් තමන්ට ගිනි අවියක් පෙන්වා තර්ජනය කළ බවය
ඒ අනුව ප්රධාන පොලිස් පරීක්ෂක රවීන්ද්ර ප්රේමලාල් ඇතුළු නිලධාරී කණ්ඩායමක් විසින් කළ විමර්ශනයක දී හෙළි වන්නේ අදාළ ගිනි අවිය සඳහා ආරක්ෂක අමාත්යාංශය මගින් බලපත්රයක් නිකුත් කර තිබුණද, එහි වලංගු කාලය 2025 වසර අවසානයේදී අවසන් වී ඇති බවය.
සැකකාර හිටපු මන්ත්රීවරයා ඒ අනුව අත් අඩංගුවට ගෙන ඇත. ඔහුව නුවරඑළිය මහේස්ත්රාත් අධිකරණයට ඉදිරිපත් කිරීමට නියමිතය.
ප්රේමලාල් ජයසේකරගේ පසුබිම
1974 නොවැම්බර් 16 දින උපත ලැබූ හල්කේඩලිය ලේකම්ලාගේ නොහොත් මහවෙල ලේකම්ලාගේ ප්රේමලාල් ජයසේකර වසර ගණනාවක සිට රත්නපුර දිස්ත්රික්කය නියෝජනය කරන පාර්ලිමේන්තු මන්ත්රීවරයෙකි. ඔහු පසුගිය රජයන්හි නියෝජ්ය අමාත්ය ධුරයක් ද හෙබවූ ශ්රී ලංකා පොදුජන පෙරමුණේ ජ්යෙෂ්ඨ සාමාජිකයෙකි. දේශපාලන ක්ෂේත්රය තුළ ඔහු වඩාත් ප්රචලිතව ඇත්තේ “චොකා මල්ලි” යන නමිනි.
අපරාධ ඉතිහාසය පිළිබඳ සාරාංශයක්
ජයසේකර සම්බන්ධ වූ බරපතළම අපරාධ නඩුව වාර්තා වන්නේ 2015 ජනාධිපතිවරණ සමයේදීය. 2015 ජනවාරි 8 වන දින රත්නපුර කහවත්ත ප්රදේශයේ එවකට විපක්ෂයේ පොදු අපේක්ෂක මෛත්රීපාල සිරිසේනට සහාය පළ කරමින් වේදිකාවක් ඉදිකරමින් සිටි පිරිසකට වෙඩි ප්රහාරයක් එල්ල විය. එම අවස්ථාවේදී ඔහු මහින්ද රාජපක්ෂ රජයේ නියෝජ්ය අමාත්යවරයෙකු ලෙස කටයුතු කළේය.
මෙම වෙඩි තැබීමෙන් වේදිකාව අලංකාර කරමින් සිටි ආධාරකරුවෙකු මියගිය අතර තවත් දෙදෙනෙකු තුවාල ලැබීය. මෙම සිද්ධිය සම්බන්ධයෙන් රත්නපුර මහාධිකරණයේ පැවති නඩු විභාගයෙන් පසු 2020 ජූලි 31 දින ඔහු ඇතුළු තිදෙනෙකුට මරණ දඬුවම නියම විය.
මරණ දඬුවම නියම වන විටත් ඔහු 2020 මහ මැතිවරණයෙන් තේරී පත්ව සිටි අතර, ශ්රී ලංකා ඉතිහාසයේ මරණ දඬුවම නියම වූ පුද්ගලයෙකු පාර්ලිමේන්තු මන්ත්රීවරයෙකු ලෙස දිවුරුම් දුන් පළමු අවස්ථාව ලෙස එය ඉතිහාසයට එක්විය. ඒ අනුව ඔහු 2020 සැප්තැම්බර් මාසයේදී බන්ධනාගාරයේ සිට පාර්ලිමේන්තුවට කැඳවාගෙන එනු ලැබීය.
කෙසේ වෙතත්, අභියාචනාධිකරණයට ඉදිරිපත් කළ අභියාචනයක් විභාග කිරීමෙන් අනතුරුව 2022 මාර්තු 31 දින ඔහු ඇතුළු තිදෙනාම නිදොස් කොට නිදහස් කිරීමට නියෝග කෙරිණි. මහාධිකරණය ලබා දුන් මරණ දඬුවම නීත්යානුකූල නොවන බව එහිදී අභියාචනාධිකරණය තීන්දු කළේය. නිදහස් වීමෙන් පසු ඔහු යළිත් දේශපාලන කටයුතුවල නිරත විය.
