නැෂනල් ඩිවෙලොප්මන්ට් බෑන්ක් පීඑල්සී (NDB) හි සිදුවූ අභ්යන්තර වංචාව සම්බන්ධයෙන් සමාජ මාධ්ය සහ විවිධ පාර්ශව පතුරුවන අසත්ය ප්රකාශවලට නොරැවටෙන ලෙස ශ්රී ලංකා මහ බැංකුව මහජනතාවගෙන් විශේෂ ඉල්ලීමක් කරයි. මෙම සිදුවීම හේතුවෙන් මෙරට වෙනත් කිසිදු මූල්ය ආයතනයකට බලපෑමක් වී ඇති බවට සාක්ෂි නැති බව මහ බැංකුව අවධාරණය කරයි.
මහ බැංකුව නිකුත් කළ නිවේදනයට අනුව, මෙම වංචාව සම්බන්ධයෙන් පුළුල් වෝහාරික විගණනයක් (Forensic Audit) සිදු කිරීම සඳහා ජාත්යන්තර විශේෂඥ ආයතනයක සහාය ලබා ගැනීමට මේ වන විට කටයුතු යොදා ඇත. වංචාව සිදුවූ ආකාරය පමණක් නොව, එම කාලසීමාව තුළ බැංකුවේ අභ්යන්තර පාලන පද්ධතියේ හෝ යහපාලන ප්රතිපත්තිවල කිසියම් බිඳවැටීමක් සිදුව ඇත්දැයි මෙහිදී සවිස්තරාත්මකව විමර්ශනය කෙරේ.
එමෙන්ම, NDB බැංකුවේ ප්රතිපත්ති සහ පද්ධතිවල ඵලදායීතාවය ඇගයීම සඳහා ස්වාධීන තෙවන පාර්ශවීය පරීක්ෂණයක් පවත්වන ලෙසද මහ බැංකුව නියෝග කර තිබේ. බැංකුව දැනටමත් සිය ප්රාග්ධන සහ ද්රවශීලතා අවශ්යතා නිසි පරිදි සපුරා ඇති බැවින් තැන්පත්කරුවන්ට අනියත බියක් ඇති කරගත යුතු නොවන බවත්, මූල්ය පද්ධතියේ ස්ථායීතාවය සුරැකීමට අවශ්ය ඕනෑම පියවරක් ගැනීමට තමන් සූදානම් බවත් මහ බැංකුව වැඩිදුරටත් සඳහන් කරයි.
