සිංහල සහ දමිළ අලුත් අවුරුදු උත්සව සමය වෙනුවෙන් තාවකාලිකව ලිහිල් කර තිබූ ඉන්ධන නිකුත් කිරීමේ සීමාවන් අවසන් කරමින්, අද (18) මධ්යම රාත්රියේ සිට යළිත් QR ක්රමවේදය බලාත්මක කිරීමට ලංකා ඛනිජ තෙල් නීතිගත සංස්ථාව පියවර ගෙන ඇත.
අලුත් අවුරුදු නිවාඩු කාලසීමාව තුළ ජනතාවගේ ගමන් බිමන් පහසු කිරීම සඳහා ඉකුත් 11 වැනිදා මධ්යම රාත්රියේ සිට පෙට්රල් වාහන සඳහා පනවා තිබූ QR කෝටා සීමාවන් තාවකාලිකව ඉවත් කිරීමට රජය තීරණය කර තිබුණි. කෙසේ වෙතත්, එම සහන කාලය අදින් අවසන් වන බැවින් යළිත් පැවති සාමාන්ය ක්රමවේදයම ක්රියාත්මක වන බව ලංකා ඛනිජ තෙල් නීතිගත සංස්ථාවේ සභාපති ඩී.ජේ රාජකරුණා සඳහන් කළේය.
ඒ අනුව, අද මධ්යම රාත්රියේ සිට ක්රියාත්මක වන නව නීතියට අනුව සියලුම පෙට්රල් වාහන සඳහා ඉන්ධන නිකුත් කරනු ලබන්නේ ලියාපදිංචි QR කේතය සහ මීට පෙර හඳුන්වා දී තිබූ ‘ඔත්තේ ඉරට්ටේ’ අංක තහඩු ක්රමවේදය මත පදනම්ව පමණි. මීට පෙර එක් එක් වාහන කාණ්ඩ සඳහා වෙන් කර තිබූ සතිපතා ඉන්ධන කෝටාවන් කිසිදු වෙනසකින් තොරව එලෙසම ක්රියාත්මක වන බව ද සංස්ථාව අවධාරණය කරයි.
උත්සව සමය අවසන් වී ජනතාව යළි සේවා ස්ථාන කරා වාර්තා කරන මෙම අවධියේදී ඉන්ධන පෝලිම් ඇතිවීම වැළැක්වීම සහ තොග කළමනාකරණය විධිමත් කිරීම මෙලෙස යළි සීමා පැනවීමේ ප්රධාන අරමුණ වී තිබේ
