අනුර කුමාර දිසානායක යාපනයේ ජනතාවට තර්ජනය කර ඇති බවත් ඔහු වහාම සමාව ගත යුතු බවත් ජනාධිපති රනිල් වික්රමසිංහ ඊයේ (08) යාපනයේ පැවති ජන රැළියක් අමතමින් ප්රකාශ කළේය.
යාපනයේ පැවති ජන හමුවක් අතර ජාතික ජන බලවේගයේ නායක අනුර කුමාර දිසානායක කළ ප්රකාශයක් සම්බන්ධව ස්වාධීන ජනාධිපති අපේක්ෂක රනිල් වික්රමසිංහ මෙසේ පැවසීය.
අනුර දසානායක ඇවිත් ඔබේ ඡන්දය ඉල්ලුවා. මොකක්ද එයා කිව්වේ… “දකුණේ වෙනසක් සඳහා ජනතාව පෙළ ගැසී තිබිය දී එම වෙනසට එරෙහි වන්නන් බවට ඔබ පත් වුනොත් කුමණ මනෝ භාවයක් දකුණේ ජනතාව තුළ ස්ථාපිත වේදැයි සිතන්න. ඒ වෙනසට එරෙහි වූවන් ලෙස ඒ වෙනසට විරුද්ධ වූවන් ලෙස යාපනය හඳුන්වන එකට ඔබ කැමති ද?. උතුර හඳුන්වන එකට ඔබ කැමති ද?
මම ඔබට නැවත සහතික කරන්නම්. අපි ජයග්රහණය කරනවා. හැබැයි ජයග්රහණයේ පංගුකරුවන් බවට ඔබ පත්වන්න ඕන. ඊට එරෙහිවූවන් ලෙස ඔබ පත්වන්න එපා කවදාවත්.”
“මේ කියන්නේ අනුර දිසානායක යාපනේ ජනතාවට තර්ජනය කරනවා. මට ඡන්දෙ දුන් නැතිනම් බලාගනින් කියනවා. ඒක මම හෙළා දකිනවා.”
“අපි 2010 ජනාධිපතිවරණයට මෙහෙ ආවා. මෙහෙ ජනතාවට අපි කිව්වා ෆොන්සේකට ඡන්දය දෙන්න කියලා. ඒ ජනතාව ෆොන්සේකට ඡන්දය දුන්නා. දකුණෙ ජනතාව මහින්ද රාජපක්ෂට ඡන්දය දුන්නා. දකුණේ ජනතාව ඔයගොල්ලන්ට ගැහුව ද?. මුකුත් සිදුවුනේ නෑ. ඒ වගේම ගියා. අන්තිමට ඩග්ලස් දේවානන්දට ඇමති කමකුත් දුන්නා. ඉතින් තව මොනව ද කරන්නේ.
2015 මොනවද අපි කරන්නේ. මම කිව්වා දෙන්න මෛත්රීපාල සිරිසේනට. දකුණේ ජනතාව දුන්නා මහින්ද රාජපක්ෂට. අපි දින්නා. මොකුත් වුනේ නෑ.”
“2019 මොකක් ද වුනේ. යාපනය දුන්නා සජිත් ප්රේමදාසට. සිංහල මිනිස්සු දුන්නා ගෝඨාභය රාජපක්ෂට. ගෝඨාභය හමුදාව අරන් ආවෙ නෑ මෙහාට. අපි හැම වෙලාවෙම ඒ ප්රතිඵලය අරන් ඇවිත් තියනවා.”
“අනුර දිසානායක දිනන්නේ නෑ. ඒක මම සහතික කරන්නම්. දකුණෙ මිනිස්සුත් බය කරන්න හදනවා. උතුරෙ මිනිස්සුත් බය කරන්න හදනවා ජනතා විමුක්ති පෙරමුණේ ස්ටයිල් එකට.”
“මගේ මිත්ර අනුර දිසානායකට මම කියනවා වහාම යාපනයේ ජනතාවගෙන් උතුරෙ ජනතාවගෙන් සමාව ඉල්ලන්න කියලා මම කියනවා. සිංහල මිනිස්සුන්ගේ නම පාවිච්චි කරලා කැත කරපු නිසා සිංහල මිනිස්සුන්ගෙනුත් සමාව ඉල්ලන්න කියනවා.”
“ඊට පස්සේ ගිහින් විපක්ෂයේ වාඩිවෙන්න කියනවා. යාපනයට එන්න බෑ නෙ. මේක කැතයි කැතයි කැතයි කියනවා මම..”
ජනාධිපති රනිල් වික්රමසිංහ පැවසුවේය.
