අනුර කුමාර දිසානාය රනිල්ගේ බෑනාට ඇඳගෙන සමෘද්ධි ව්යාපාරය වළ පල්ලට යවන පාපකර්මයට කර ගසා ඇතැයි සමස්ත ලංකා සමෘද්ධි මහා සංගම් ප්රධාන සභාපති එම්.එම්.අයි.බී අබේසිංහ පැවසුවේය.
ජනතාව මේ රජය බලයට පැවරුවේ සප්පරක් බලාපොරොත්තු සහිතව බව කී සභාපතිවරයා සමෘද්ධි ව්යාපාරයට මේ ආණ්ඩුව සලකන ආකාරය ආණ්ඩුවේ ඉරණම තිරීණය කරනු ඇතැයි අවධාරණය කළේය.
සමෘද්ධි ව්යාපාරය ව්යසනයට ලක්වෙමින් ඇති ආකාරය සම්බන්ධව මහනුවර දී අද (28) මාධ්ය හමුවක් කැඳවමින් වැඩිදුරටත් අදහස් දැක්වූ සභාපතිවරයා මෙසේද පැවසුවේය.
ජනතාව මේ ආණ්ඩුව බලයට පත්කළේ කප්පරක් බලාපොරොත්තු ඇතිවයි. මේ ව්යාපාරය සතුව තිබුණු සහනාධාර වැඩපිළිවෙළ හිටපු ජනපති රනිල් වික්රමසිංහ වාණිජ බැංකු වලට පැවරුවා. එය වෙනස් කරනවා කියලා පොරොන්දු දී බලයට පැමිණි අනුර කුමාර දිසානායක අද රනිල් ගේ බෑණා මෙන් කටයුතු කරමින් පැරණි වැඩපිළිවෙළ ඒ විදිහටම ඉදිරියට ගෙන යමින් සිටිනවා. මේ වනවිට අද සමෘද්ධි බැංකු ජාලය තුළ ක්රියාත්මක වූ කිසිදු වැඩසටහනක් ක්රියාත්මක නොවන තත්ත්වයක් ඇතිවෙලා.
සමෘද්ධිය හරහා ක්රියාත්මක සමාජ ආරක්ෂණ අරමුදල මිනිස්සුනට උපතේ දී විපතේ දී මඟුලේ දී මරණයේ දී මුදල් දෙන ඉතා වටිනා රක්ෂණ ක්රමවේදයක්. එය සහමුලින්ම රනිල් වික්රමසිංහ නැති කළා. මේ ආණ්ඩුවත් ඒ විදිහටම ඒක ක්රියාත්මක කරගෙන යනවා.
අද සමෘද්ධි නිලධාරීන්, සමෘද්ධි කළමනාකරුවෝ ගත්තම 90 % ක් විතර මේ ආණ්ඩුවට ඡන්දය දුන්නා. පසුගිය ආණ්ඩුව සමෘද්ධි ව්යාපාරය පරපතළ ලෙස රෝගි කළා. මේ ආණ්ඩුව කිසිදු ප්රතිකාරයක් නොකර ස්වාභාවික මරණයක් අත්වූ ලෙස සමෘද්ධි ව්යාපාරය මරා දැමීමට තමයි මේ උත්සහ කරන්නේ.
ආණ්ඩුවේ විෂයභාර ඇමැතිවරායාගේ අමාත්යාංශයට ප්රධාන විෂය අයිති ආයතනය නැහැ. සමාජ සුබසාධන හා ප්රතිලාභ මණ්ඩලය මගින් තමයි අස්වැසුම ක්රියාත්මක වෙන්නේ. ඒක තිබෙන්නේ ජනාධිපති යටතේයි. පසුගිය දෙසැම්බර් 27 වැනිදා ඇමැතිවරයාම මේ බව අප සමඟ පැවසුවා. මේ විදිහට කොහොමද සමෘද්ධි ව්යාපාරය තුළ ජනතාව සවිබල ගැන්වීම් කරන්නේ. අද කළමනාකරුවෝ සහ සමෘද්ධි නිලධාරීන් ගත්ම 3000-4000 ක හිඟයක් තිබෙනවා. ඒක රජය පිළිගන්නවා. ආණ්ඩුවට කේවට්ටකම් කරන වෘත්තිය සමිති මේවා ගැන නිහඬයි. සමෘද්ධි ව්යාපාරය වල්පල්ලට යන එක ගැන මේ අය කටක් අරන්නේ නැහැ.
ව්යාපාරයම වළපල්ලට යවන වට්ස් ඇප් ගෲප් –
සමෘද්ධි ව්යාපාරයට අද අත්ව තිබෙන්නේ ඉතාම ඛේදනීය ඉරණමක්.කේවට්ටයින් ගේ වුවමනාවට සංවර්ධන නිලධාරීන් අද බැංකු වලට ස්ථාපිත කරමින් ඉන්නවා. අධ්යක්ෂ ජනරාල් සියලු ප්රශ්න වලට විසඳුම් සොයන්න උත්සහ කරන්නේ වට්ස් ඇප් ගෘෘප් ඔස්සේයි. මේ වට්ස් ඇප් ගෘෘප් තමයි සමෘද්ධියට හෙනේ වෙලා තිබෙන්නේ. වට්ස් ඇප් ගෘෘප් 10 ක් විතර තිබෙනවා. වෘත්තිය සමිති වලට සාකච්ඡා නොදී මේවා මගින් තමයි තොරතුරු හුවමාරු කරන්නේ. විෂයභාර නියෝජ්ය ඇමැතිගේ නමවත් දන්නේ නැහැ.
සමෘද්ධි දෙපාර්තුමේන්තුවේ නිත්ය වගකිව යුතු තනතුරු රැසක් අද හිස්වෙලා. බැංකු මූල්ය අධ්යක්ෂ තනතුරේ වැඩ ආවරණය කරන්නේ සහකාර අධ්යක්ෂවරයෙක් ඉන්නේ. නියෝජ්ය බැංකු මූල්ය අධ්යක්ෂවරු හතර දෙනෙක් ඉන්න ඕන. දැන් අවුරුදු ගණනාවක් තිස්සේ මේ පුටු හිස්. රනිල් ගේ කාලයේ ඉඳන් එන මේ ප්රශ්නය විසඳන්න වත්මන් ආණ්ඩුවටත් වුවමනාවක් නැහැ. ගැලරිය චූන් කරන කතා කිය කිය ඉන්න එපා කියලා අපි ආණ්ඩුවට කියනවා.
සමෘද්ධි ව්යාපාරය ගමේ ජනතාව සමඟ තිබුණු සම්බන්ධතාව බිද වැටිලා. රාජ්ය අනුග්රහයට අවම වීම තමයි මේකට හේතුව. සමාජ ආරක්ෂණ මණ්ඩලයේ ප්රතිලාභ අද ගමේ ජනතාවට නැහැ. රනිලුල් සේමසිංහයි අස්වැසුම ප්රතිලාභ ගන්න කාඩ් එකක් දුන්නා. දැන් කාඩ් එක දීලා අරක්කු බෝතලයක් වුනත් ගන්න පුළුවන්. මේ මුදල් බැංකුව හරහා දෙන්න කියලයි අපි යෝජනා කරන්නේ.
සංගමයේ ප්රධාන ලේකම් බී.එම්.ඒ. වී බස්නායක ප්රකාශ කළේ බැංකු 1090 ක දැවැන්ත පද්ධතියක් සහ ලක්ෂ 18 ක සාමාජික පිරිසක් සමෘද්ධි බැංකු පද්ධතිය සතු බවත්, එදා තිබුණු 17 % ක අඩු ආදායම්ලාභින් ගේ ප්රතිශතය 6 % දක්වා ගේන්න මේ ව්යාපාරයට හැකියාව ලැබුණු බවත්ය. ලේකම් වරයා වැඩි දුරටත් කීවේ රුපියල් බිලියන 55 ක් අඩු ආදායම්ලාභීන් වෙනුවෙන් පොලී රහිත හා අඩු පොලී ණයක් දෙන බව ආණ්ඩුව කියන්නේ සමෘද්ධි බැංකු පද්ධතිය සතු මුදල් දෙස බලානෙ බවත්, මේ බැංකුවල ඇති දුප්පත් ජනතාවගේ අරමුදල්වලට වගකීම් රහිතව අත තබන්නට මේ ආණ්ඩුවට ඉඩ නොදෙන බවත් ය.
සමස්ත ලංකා සමෘද්ධි මහා සංගම් සුබ සාධන ලේකම් ඩී.එම්.කේ.බී දිසානායක මාධ්ය ඉදිරියේ දී අවධාරණය කළේ මේ ආණඩුවට ස්වකීය දේශපාලන ගමන මේ වාරයෙන් නිමා කරගැනීමට අවශ්ය නැතිනම් සමෘද්ධි ව්යාපාරය වලපල්ලට ගෙන යමින් ගමේ ජනතාව ගේ ප්රශ්න උග්ර කිරීමේ අපරාධයෙන් ඉවත් විය යුතු බවය.
