ශ්රී ලංකාවේ උපත ලැබූ, දැනට රොචෙස්ටර් විශ්ව විද්යාලයේ කාර්මික ඉංජිනේරු විද්යාව පිළිබඳ සහකාර මහාචාර්ය රංග ඩයස් ලොව සුප්රකට Time සඟරාව මගින් නම් කරන, වසරේ නැගී එන නායකයන් නම් කරන ‘මීළඟ සියදෙනාගේ ලැයිස්තුවට නම් කර තිබේ.
විනෝදාස්වාදය, සෞඛ්යය, දේශපාලනය, ව්යාපාර සහ තවත් බොහෝ ක්ෂේත්රවල අනාගතය හැඩගස්වන නවෝත්පාදන කළ නැගී එන නායකයින් ලෙස හඳුනාගන්නා 100 දෙනෙකු මෙම ලැයිස්තු මඟින් නම් කෙරේ.
ටයිම් සඟරාව මෙම සිය දෙනාගේ ලැයිස්තුව ප්රකාශයට පත් කරන ලද්දේ පසුගිය 17දා යි .
හයිඩ්රජන් රසායන මූලද්රව්ය ලෝහයක් බවට පත් කළ හැකිය යන්න පසුගිය වසර 80 ක හෙවත් දශක අටක පමණ කාලය පුරාවට සිද්ධාන්තයක් පමණක්ව තිබිණි. ඒ සිද්ධාන්තය ප්රායෝගික කරගැනීම උදෙසා ලෝකයේ බොහෝ විද්වත්හු නිරන්තරයෙන් පර්යේෂණ සහ පරික්ෂණ සිදුක නමුත් කිසිවකුට එය ප්රායෝගික කරගැනීමට නොහැකි වූ සිද්ධාන්තයක් විය.
මුළු ලොවටම සිද්ධාන්තයක් පමණක් වී තිබූ මෙය ප්රායෝගික බවට හෙළිදරව් කරමින් හයිඩ්රජන් නමැති රසායන මූලද්රව්යය ලෝහයක් බවට පත්කළ හැකිය යන්න ලෝකයට සොයා දීමට මේ ශ්රී ලාංකීය මහාචාර්යවරයාට හැකි විණි. කාමර උෂ්ණත්වයේ දී හයිඩ්රජන් අධික පීඩනයකට අසුවුණොත් ඊළඟට එය ලෝහයක් බවට පත්වන අතර එහි ගුණය වන්නේ සුපිරි සන්නායකයක් බිහිවීම බව ඔහු ප්රායෝගිකව ඔප්පු කර ඇත.
මෙම නව සොයාගැනීම ඔස්සේ අනාගත ප්රවාහන ක්ෂේත්රය, විදුලි නිෂ්පාදනය, විද්යුත් මෙන්ම තාක්ෂණික ක්ෂේත්රයේ කටයුතු උදෙසා ද වැය කළ පිරිවැය බිලියන ගණනකින් ඉතිරි කර ගැනීමට මිනිසාට හැකිවනු ඇත. රංග මීළඟ 100 දෙනාගේ ලැයිස්තුවට එක්වන්නේ මෙම සොයාගැනීම වෙනුවෙනි.
ඩයස් ශ්රී ලංකාවේ කොළඹ විශ්ව විද්යාලයේ භෞතික විද්යා අංශයෙන් උපාධිය ලබා ඇත. 2007 දී ඇමරිකා එක්සත් ජනපදයේ වොෂිංටන් වෙත යන ඔහු එහිදී ආචාර්ය උපාධිය ලබා ගත්තේය. මේ වනවිට ඔහු ජීවත් වන්නේ අමෙරිකාවේ ය.
