-
පුද්ගලයින් පොරවල් කරන්න බොරු නිමිති හදාගෙන බාල් නටලා රටේ වෛද්ය සේවයට හෝ වෛද්ය වෘත්තිකයින්ට අත්කර දෙන සෙත කුමක් දැයි වෛද්ය වෘත්තිකයෝම අසති…
සියවස් පූර්ණයක් ලෙස නම් කර ශ්රී ලංකා වෛද්ය සභාව රුපියල් කෝටි ගණනක් වියදම් කර බාල් නටන්නට හදන්නේ වෛද්ය සභාවට සියවස සැපිරී අවුරුදු 101කින් පසු බව අනාවරණය වී තිබේ.
මේ වනවිට ශ්රී ලංකා වෛද්ය සභාවේ සභාපති ධූරය දරමින් සිටින මහාචාර්ය වජිර දිසානායකගේ මූලිකත්වයෙන් රුපියල් කෝටි තුනට අධික මුදලක් වියදම් කරමින් මෙම ජෝගිය නටන්ට හදන්නේ කුමණ අරමුණක් ඉෂ්ඨ කරගැනීමට ද යන්න නොවැටහෙන බවත්, වර්ෂ 1905 අංක 2 දරන ශ්රි ලංකාවේ වෛද්ය විද්යාව සහ ශල්යකර්ම ක්ෂේත්රයේ නියැලීමට නීත්යානුකූලව සුදුසුකම් ලත් පුද්ගලයින් ලියාපදිංචි කිරීම සඳහා විධිවිධාන සලසමින් පනවන උක්ත ආඥා පනත සම්මතවී නිල වශයෙන් ශ්රි ලංකා වෛද්ය කවුන්සිලය ආරම්භ වී දැනට වර්ෂ 120ක් පසුවී ඇති බවත් අභ්යන්තර ආරංචි මාර්ග පවසයි.
අනෙක් අතින් “1905 ලංකා වෛද්ය විද්යාල ආඥා පනත” සංශෝධනය කරමින් 1924 අංක 25 දරන ලංකා වෛද්ය විද්යාල (සංශෝධන) ආඥා පනත සම්මත කරගන්නේ වර්ෂ 1924 දීය. ඒ නිමිත්ත ශ්රී ලංකා වෛද්ය සභාවට ගලපා ගන්නේ නම් එම පනත සම්මත කරගෙන 2025ට අවුරුදු 101ක් බවත් එම ආරංචි මාර්ග පෙන්වා දෙයි.
ශ්රී ලංකා වෛද්ය සභාව සියවස සැමරීමට යැයි ප්රකාශිත මේ මහා උත්සවයට නිමිත්තක් නැතිවා සේම රාජ්ය ව්යවස්ථාපිත ආයතනයක්වන එම ආයතනය මෙම මුදල් වියදම් කිරීම සම්බන්ධව පූර්ව අනුමැතයක් ලබාගෙන තිබුණා ද?, සෞඛ්යය අමාත්යාංශයේ අත්යාවශ්ය පරිපාලන කටයුතු වෙනුවෙන් පවා මුදල් වියදම් කිරීමට භාණ්ඩාගාර අනුමැතිය ලබා ගැනීම අතිශය දුෂ්කර වී ඇති පරිසරයක මෙවැනි මුදලක් ජාතියට තීරණාත්මක වැදගත්කමක් නැති පුද්ගලයින් වෘද්ධිමත් කරන උත්සව සඳහා වැය කරන්නේ කෙසේ ද යන්න මේ වනවිට ශ්රී ලංකා වෛද්ය සභාව තුළින්ම ප්රශ්න කරමින් ඇති බව වාර්තා වේ.
මහජන මුදල් නිස්කාරණ උත්සව සඳහා වියදම් නොකරන බවට තහවුරුවක් දී ඇති ආණ්ඩුවක් යටතේ වෘත්තිකයින් කීප දෙනෙකුගේ අභිමතය පරිදි කෝටි ගණන් මුදලක් වියදම් කර ශ්රී ලංකා වෛද්ය සභාවේ ශත සංවත්සරය සැමරීමෙන් ශ්රී ලංකාවේ ප්රශස්ථ වෛද්ය සේවය තහවුරු කරගැනීමට ලබා ගත හැකි අවස්ථා මොනවාද යන්න ගැනත් ඉන් ශ්රී ලංකා වෛද්ය සභාවේ ලියාපදිංචි හතලිස් දහසකට අධික වෛද්යවරුන්ට අත්වන ප්රතිලාභය කුමක් ද යන්නත් පැහැදිලි නැතැයි අභ්යන්තර ආරංචි මාර්ග කියයි.
