-
නොමේරූ ළදරු ඒකකයේ ET ටියුබ් හිඟය ගැන යැවුවෙ එක් පණිවිඩයක් පමණයි… ලෝකය වටේ ලාංකිකයන්ගෙන් ආධාර කරන හැටි කරන විමසුම්වලට මග හැරුණු ඇමතුම් 400යි…. පිළිතුරු දුන් ඇමතුම් 500යි…
නොමේරු දරු උපත් තත්වයක් යටතේ අලුත උපන් බිලිඳුන් ගේ ජීවිත බේරා ගැනීමේ දී අත්යවශ්ය වන ඊ.ටී ටියුබ් හිඟය පිළිබඳව තමන් සිය වෛද්ය මිතුරන් අත යැවුණු පනිවිඩය ලෝකය පුරා ඉතා වේගයෙන් පැතිර ගොස් ඇති බවත් මේ වනවිට එම අවශ්ය උපකරණ කඩිනමින් ලබා දීමට අති විශාල ප්රමාණයක් ලොව සතර දිගින් ඉදිරිපත්ව ඇති බවත් කාසල් වීදිය කාන්තා රෝහලේ නොමේරු දරු උපත් පිළිබඳව විශේෂඥ වෛද්ය සමන් කුමාර මහතා පවසයි.
ඔහුට දිවා රාත්රි මුළුල්ලේ මේ පිළිබඳව අවශ්යතා විමසමින් දුරකථන ඇමතුම් දහසකට ආසන්න ප්රමාණයක් ලැබී ඇති අතර එයින් 500කට පමණ පිළිතුරු දුන්නද තවත් ඇමතුම් 400කට අධික පුමාණයක් ගිලිහි ඇති බව ද ඔහු සඳහන් කරයි.
මේ වනවිට ප්රමාණවත් තරම් ඊ.ටී ටියුබ් රෝහලට ලැබී ඇති බැවින් ඉදිරියේදී අවශ්ය වෙනත් වෛද්ය ආධාර වෙතොත් ලබා ගැනීමට අවශ්ය සහය ලබා දෙන ලෙස කෘතව්ව ඉල්ලා සිටී.
ඔහු සමාජ මාධ්ය ජාල හරහා එවා තිබූ පණිවිඩය සැකෙවින් මෙසේය.
“ මම ශ්රී ලංකා නොමේරු දරු උපත් පිළිබඳ සංගමයේ සභාපතිවරයා ලෙස මගේ ඉල්ලීමට වේගවත් දැවැන්ත ප්රතිචාරයක් දැක්වීම ගැන පළමුව මා ඔබට බෙහෙවින් ස්තූතිවන්ත වෙනවා. මෙම හඬ පණිවිඩය සම්බන්ධයෙන් මට ඔබට යමක් පැවසීමට අවශ්යයි.“
“මා කිසිසේත්ම සමාජ මාධ්ය ප්රචාරයක් කිරීමට අදහස් කළේ නෑ. නමුත් එය මගේ කණ්ඩායමේ මිතුරන්ගේ whatsapp සමූහයට යැව්වා. ඒත් සමහරු ඊට මගේ නම සහ ජංගම දුරකථන අංකය ටැග් කොට බෙදා හැරලා. එය වේගයෙන් ලොව පුරා ව්යාප්ත වෙලා.
මට ලොව වටින්ම ඇමතුම් ලැබෙන ගත්තා. දිවා රාත්රී පුරා එක දිගට එන ඇමතුම්වලින් 500 කට ආසන්න ප්රමාණයකට පිළිතුරු දුන්නා. මග හැරුණු ඇමතුම් 400 කට වැඩි ප්රමාණයක්.
අද තත්ත්වයද එසේමයි. මා ඉතාමත් රෝගී තත්ත්වයේ පසුවන ළදරුවන් බලා ගන්නා කාර්යබහුල විශේෂඥ වෛද්යවරයෙක්. මට මේ ඇමතුම් සහ පණිවිඩ පරිමාව හැසිරවීම ඉතාමත් අසීරුයි. ප්රතිචාර නොදැක්වීම නිසා ඇතැමුන් මා සමඟ තරහින් සිටින බවත් මා දන්නවා.
නමුත් මාත් මිනිසෙක්. ඊයේ පණිවිඩවලට ප්රතිචාර දක්වමින් පාන්දර 3 වන තෙක් නිදි වරන්නට සිදුවුණා. ඔබ සියලු දෙනාම රටට උදව් කිරීමට උත්සාහ කරන බව මා දන්නවා. ඒ විශිෂට කැපවීම මට සිතාගන්ටත් නොහැකියි.
මට ඔබ සියලු දෙනා ගැන ආඩම්බරයි… ශ්රී ලාංකීය රුධිරය මෙතරම් කරුණාවන්ත යැයි මම කිසි විටෙකත් සිතුවේ නෑ… එය පැහැදිලි කිරීමට මට වචනත් නෑ…
පැය 24ක් ඇතුළත ලොව පුරා සිටින ඔබ සැම ප්රමාණවත් තරම් ET ටියුබ් ලබා දීමට අපට පොරොන්දු වී තිබෙනවා. . එබැවින් කරුණාකර ET ටියුබ් ගැන තවදුරටත් කරදර වෙන්න එපා.
නමුත් අපට තවත් ප්රධාන ගැටලු කිහිපයක් තිබෙනවා.
ඔබට තවදුරටත් රටට උපකාර කළ හැකියි. ළමා රෝග විශේෂඥ වෛද්ය විද්යායතනය සහ Perinatal Society මගින් අපි ඉක්මනින්ම වෙබ් අඩවි කිහිපයක් ආරම්භ කරනවා. අප ඉක්මනින් විස්තර බෙදා දෙන්නම්.
සෑම ඇමතුමකටම සහ පණිවිඩයකටම ප්රතිචාර නොදැක්වීම ගැන නැවත වරක් මගේ අවංක කණගාටුව ප්රකාශ කරනවා.
මේ තීරණාත්මක මොහොතේ අපේ මව්බිමට උපකාර කිරීම ගැන
ඔබට බොහෝම ස්තූතියි. තෙරුවන් සරණයි.! දෙවි පිහිටයි.!
