-
නොබෙල් ත්යාගය කිසිවෙක් සමග බෙදා ගැනීමට හෝ කිසිවෙකුට පැවරීමට නොහැකි බව නෝර්වීජියානු නොබෙල් ආයතනය ප්රකාශ කරයි…
වෙනිසියුලාවේ දේශපාලන අනාගතය හැඩගැස්වීමේ උත්සාහයන් කෙරෙහි බලපෑම් කිරීම සම්බන්ධව සිය කෘතඥතාවය පළ කරමින් වෙනිසියුලානු විපක්ෂ නායිකා මාරියා කොරිනා මචාඩෝ (Maria Corina Machado) ඊයේ (15) ධවල මන්දිරයේ පැවති හමුවකදී සිය නොබෙල් සාම ත්යාග පදක්කම අමෙරිකානු ජනාධිපති ඩොනල්ඩ් ට්රම්ප් වෙත පිරිනැමුවාය.
ට්රම්ප් එම පදක්කම තමා සන්තකයේ තබා ගැනීමට අදහස් කරන බව ධවල මන්දිර නිලධාරියෙක් තහවුරු කළ බව රොයිටර් පුවත් සේවය වාර්තා කළේය.
බ්රහස්පතින්දා සවස් වරුවේ සමාජ මාධ්ය සටහනක් තබමින් ට්රම්ප් මෙසේ සඳහන් කළේය: “මා කළ සේවය වෙනුවෙන් මාරියා ඇයගේ නොබෙල් සාම ත්යාගය මට පිරිනැමුවා. එය අන්යෝන්ය ගෞරවය පිළිබඳ අපූරු සංකේතයක්. ස්තූතියි මාරියා!”
මෙම හමුව “විශිෂ්ට” එකක් ලෙස හැඳින්වූ මචාඩෝ ප්රකාශ කළේ, වෙනිසියුලානු ජනතාවගේ නිදහස වෙනුවෙන් ට්රම්ප් දක්වන කැපවීම අගයමින් මෙම තෑග්ග පිරිනැමූ බවයි. ධවල මන්දිරය පසුව ට්රම්ප් සහ මචාඩෝ සිටින ඡායාරූපයක් ප්රකාශයට පත් කළ අතර, එහි ජනාධිපතිවරයා එම පදක්කම ප්රදර්ශනය කර ඇති විශාල රන් පැහැති රාමුවක් අල්ලාගෙන සිටිනු දක්නට ලැබුණි.
එහි ඇතුළත් පාඨයේ සඳහන් වූයේ, “ශක්තිය තුළින් සාමය ප්රවර්ධනය කිරීමේදී ඔබ දැක්වූ අසාමාන්ය නායකත්වය වෙනුවෙන් ජනාධිපති ඩොනල්ඩ් ජේ. ට්රම්ප් වෙත කෘතඥතාව පළ කරමු” යනුවෙනි. එය වෙනිසියුලානු ජනතාව වෙනුවෙන් පිරිනැමුණු පුද්ගලික කෘතඥතා සංකේතයක් ලෙසද හඳුන්වා දී තිබුණි.
පදවියෙන් පහ කරන ලද නිකොලස් මදුරෝ වෙනුවට මචාඩෝ වෙනිසියුලාවේ නායිකාව ලෙස පත් කිරීමේ අදහස ට්රම්ප් ප්රතික්ෂේප කිරීමෙන් පසුව, ඔහු තමා වෙත නම්මා ගැනීමට ඇය ගත් උත්සාහයක් ලෙස මෙය සැලකේ. ට්රම්ප් මීට පෙර නොබෙල් සාම ත්යාගය දිනා ගැනීම සඳහා ප්රසිද්ධියේ උත්සාහ කළ අතර, පසුගිය මාසයේ මචාඩෝට එම ත්යාගය හිමි වූ විට ට්රම්ප් ඒ පිළිබඳව දැඩි ලෙස නොසතුට පළ කර තිබුණි.
නොබෙල් ත්යාග ලාභීන්ට ලැබෙන රන් පදක්කම මචාඩෝ විසින් ට්රම්ප්ට ලබා දුන්නද, එම ගෞරවය තවමත් ඇය සතු වන බවත් නොබෙල් ත්යාගය වෙනත් අයෙකුට පැවරීමට, හවුලේ බෙදා ගැනීමට හෝ අවලංගු කිරීමට නොහැකි බව නෝර්වීජියානු නොබෙල් ආයතනය ප්රකාශ කර ඇති බවත් රොයිටර් වාර්තාවේ සලකුණු කරයි.
පැයකට මඳක් වැඩි කාලයක් පැවති මෙම දිවා භෝජන සංග්රහය, ඔවුන් දෙදෙනා පෞද්ගලිකව මුණගැසුණු පළමු අවස්ථාවය. ඉන් අනතුරුව ඇය කැපිටල් හිල්හිදී රිපබ්ලිකන් සහ ඩිමොක්රටික් සෙනෙට් සභිකයින් පිරිසක් හමු වූවාය.
ධවල මන්දිර මාධ්ය ලේකම් කැරොලින් ලෙවිට් පැවසුවේ, ට්රම්ප් මචාඩෝ මුණගැසීමට උනන්දුවෙන් සිටි නමුත්, කෙටි කාලීනව රට මෙහෙයවීමට අවශ්ය සහයෝගය ඇයට දැනට නොමැති බවට ඔහු දරන “යථාර්ථවාදී” ස්ථාවරයෙහි තවදුරටත් රැඳී සිටින බවය.
පසුගිය දෙසැම්බර් මාසයේදී මුහුදු මාර්ගයෙන් වෙනිසියුලාවෙන් පලා ආ මචාඩෝ, එරට රජයේ සාමාජිකයන් සමඟ තරඟ කරමින් ට්රම්ප්ගේ අවධානය දිනා ගැනීමටත්, අනාගත පාලනය තුළ තමාට භූමිකාවක් තහවුරු කර ගැනීමටත් උත්සාහ කරමින් සිටියි. (රොයිටර්)
