ජයකාන්ත ලියනගේ – බළපිටිය –
දකුණු පළාත් ජේෂ්ඨ නියෝජ්ය පොලිස්පති කොට්ඨාසයට අයත් උසස් පොලිස් නිලධාරින් 50% කට ආසන්න ප්රමාණයක් කොට්ඨාසයෙන් පිටස්තර දිවයිනේ වෙනත් පොලිස් කොට්ඨාස සදහා ස්ථාන මාරුවීම් ඉල්ලා පොලිස් මූලස්ථානයට ලිපි යොමුකර තිබෙන බව පොලිස් මූලස්ථානයට සම්බන්ධ ආරංචි මාර්ග සදහන් කරයි.
මෙම සියළු ලිපි පෞද්ගලික ඉල්ලීම් ලෙස පොලිස් මූලස්ථානයට යොමුකර ඇතත් දකුණු පළාත් ජේෂ්ඨ නියෝජ්ය පොලිස්පති කොට්ඨාසයේ රාජකාරී කිරීමේදී ඇතිව තිබෙන දැඩි මානසික පීඩනය හා ඔරොත්තු නොදෙන රාජකාරී පැවරුම් හේතුවෙන් යොමුකර තිබෙන බව දකුණු පළාතේ ජේෂ්ඨ පොලිස් නිලධාරීන් ප්රකාශ කරයි.
දකුණු පළාතේ පොලිස් ප්රධානීන් ඇතුළු පොලිස් ස්ථානාධිපතිවරුන් මානසික ආතතියක් හා පීඩනයක් නොමැතිව රාජකාරී කරන බවට ඔවුන්ගේ අත්සනින් යුතු ලිපි දකුණු පළාත් ජේෂ්ඨ නියෝජ්ය පොලිස්පති කිත්සිරි ජයලත් විසින් මේ දිනවල ලබා ගනිමින් සිටින බවද දකුණේ පොලිස් නිලධාරින් වැඩි දුරටත් ප්රකාශ කළේය.
මෙයට පෙරද දකුණු පළාත තුළ සිදුවන අපරාධ මර්දනය කිරීමට 2020 සිට 2025 දක්වා තම පොලිස් බල ප්රදේශයන් තුළ සිදු වූ බල අපරාධ සියල්ල අදාල පොලිස් ප්රධානීන් මතකයේ තබා ගතයුතු බවත් විමසන ඕනෑම අවස්ථාවකදී එම තොරතුරු කටපාඩමින් ඉදිරිපත් කිරීමට හැකිවිය යුතු බවත් දකුණු පළාත් ජේෂ්ඨ නියෝජ්ය පොලිස්පතිවරයා දැනුම් දී තිබුණි.
මෙම වසර 05 තුළ ඒ ඒ පොලිස් බල ප්රදේශයන්හි සිදු වූ බල අපරාධ, එම අපරාධ සිදු වූ දිනය, ඒවායේ පැමිණිලිකරුවන් හා සැකකරුවන් මෙන්ම අපරාධයේ ස්වභාවය ආදී සියළු තොරතුරු මතකයේ තබාගත යුතු බවද ජ්ය්ෂ්ඨ නියෝජ්ය පොලිස්පතිවරයා වැඩි දුරටත් දැනුම් දී තිබුණි.
මෙම කටයුත්ත ප්රායෝගික නොවන බවට දකුණේ පොලිස් ප්රධානීන් විසින් කරන ලද හෙලිදරව් කිරීම් වලට අදාල තොරතුරු පුවත්පත් වල සහ සමාජ මාධ්යයේ ප්රචාරය වීම හේතුවෙන් කටපාඩම් කිරීමේ කටයුත්ත සහ කරුණු ඉදිරිපත් කිරීමේ රැස්වීම් අවලංගු කිරීමට දකුණු පළාත් ජ්යෙෂ්ඨ නියෝජ්ය පොලිස්පති කිත්සිරි ජයලත් පියවර ගෙන තිබුණි.
2025 මැයි 15 සහ 16 දිනයන්හි ගාල්ල, ඇල්පිටිය, මාතර හා තංගල්ල යන ජේෂ්ඨ පොලිස් අධිකාරී කොට්ඨාසවල නිලධාරින් කැඳවා කරන ලද මෙම දැනුම් දීම 20 දින වට්ස්ඇප් පනිවුඩයක් යොමු කරමින් අවලංගු කිරීමට නියෝජ්ය පොලිස්පතිවරයා කටයුතු කළේය.
නමුත් මෙම ක්රියාවලිය නැවත වතාවක් වෙනත් මුහුණුවරකින් ක්රියාවට නැංවෙමින් තිබෙන බවත් එම පීඩනය හේතුවෙන් දකුණු පළාතේ පොලිස් ප්රධානීන් මෙසේ ස්ථාන මාරු ඉල්ලා සිටින බවත් පොලිස් ආරංචි මාර්ග සදහන් කරයි.
රාජකාරී කිරීමේ ගැටලු පෙන්වා දෙමින් ස්ථාන මාරු ඉල්ලන්නේ හෙරොයින් ජාවාරමට සම්බන්ධ රාජ්ය නිලධාරීන් බවට දකුණේ පොලිස් ප්රධානියෙක් මෑතකදි කරන ලද ප්රසිද්ධ ප්රකාශයක් හේතුවෙන්ද තමන් දැඩි අපහසුතාවයට පත්ව තිබෙන බවත් මේ හේතුවෙන් වෙනත් ප්රදේශවලදී තමන් කුඩු කාරයින්ගේ මුදල් වලින් යැපෙන්නන් බවට මතයක් තහවුරු වෙමින් තිබෙන බවත් ස්ථාන මාරු ඉල්ලා සිටින පොලිස් ප්රධානීන්ගේ මතය වි තිබේ.
දකුණු පළාත් ජ්යෙෂ්ඨ නියෝජ්ය පොලිස්පති කොට්ඨාසය ගාල්ල, ඇල්පිටිය, මාතර හා තංගල්ල යන ජ්යෙෂ්ඨ පොලිස් අධිකාරි කොට්ඨාස 04 කින් සමන්විතය. මෙම කොට්ඨාස 04 තුළ ජ්යෙෂ්ඨ පොලිස් අධිකාරීන් 04 ක් පොලිස් අධිකාරීන් 04 ක් සහකාර පොලිස් අධිකාරීන් 15 ක් රාජකාරී කරනු ලබයි.
ජ්යෙෂ්ඨ නියෝජ්ය පොලිස්පති කොට්ඨාසය තුළ මූලස්ථාන පොලිස් ස්ථානාධිපතිවරුන් හා පොලිස් ස්ථානාධිපතිවරුන් 44 දෙනෙකු පොලිස් ස්ථාන 44 ක් යටතේ රාජකාරියේ නිරත වි සිටිති.
මෙතරම් විශාල උසස් පොලිස් නිලධාරීන් ප්රමාණයකගෙන් සැලකිය යුතු පිරිසක් එකවර ජේෂ්ඨ නියෝජ්ය පොලිස්පති කොට්ඨාසයෙන් පිටතට ස්ථානමාරුවීම් ඉල්ලීම ලෙහෙසියෙන් බැහැර කල නොහැකි බවද පෙලිස් මූලස්ථානයේ ප්රකාශකයෙක් සදහන් කළේය.
