අශෝක රන්වල හිටපු කතානායකවරයා සම්බන්ධ සිද්ධිය මේ වනවිට ඇත්තේ අධිකරණයේ බැවින් පූර්ව නිගමනවලට එළඹෙන්නේ නැතිව සිදුවන දේ සම්බන්ධව අවධානයෙන් සිටින ලෙස කැබිනට් මාධ්ය ප්රකාශක සෞඛ්ය සහ ජනමාධ්ය ඇමති නලින්ද ජයතිස්ස පැවසුවේය.
ඔහු පෙන්වා දුන්නේ රිය අනතුරක් සම්බන්ධයෙන් පොලිසිය, අධිකරණය සහ රෝහල් පද්ධතිය ක්රියාත්මකවන ක්රමවේදයක් පවතින බවය. අශෝක රන්වල මන්ත්රීවරයා බීමත්ව රිය ධාවනය කළා නම් ඔහු සම්බන්ධව කිරිබත්ගොඩ සහ කොළඹ ජාතික රෝහලේ වෛද්යවරුන් තබන සටහන අධිකරණයට ගෙන්වා ගතහැකිවා සේම ඔහුගෙන් ලබා ගත් රුධිර සහ මුත්රා සාම්පල පරීක්ෂණ වාර්තා ද ඉදිරිපත් කෙරෙන බව කී ඇමතිවරයා ඒ සියල්ල අධිකරණයට භාර දෙන බව පැවසුවේය.
අනතුරුව අශෝක රන්වල සම්බන්ධව තීන්දුවක් ගනු ලබන්නේ නම් එම තීන්දුව ගන්නේ කැබිනට් මණ්ඩලය නොව පක්ෂයක් ලෙස ස්වකීය පාර්ලිමේන්තු කණ්ඩායම බව ද කැබිනට් මාධ්ය ප්රකාශකවරයා පෙන්වා දුන්නේය.
මේ සිදුවීම රිය අනතුරක් බවත්, රිය අනතුරට ලක් වූ අශෝක රන්වල මෙන්ම අනතුරට ලක් වුන තවත් පුද්ගලයෙක් මේ වනවිටත් ජාතික රෝහලේ ප්රතිකාර ලබමින් සිටින බව ඇමතිවරයා කීවේය.
” මේක අධිකරණ කටයුත්තක්. 19 වැනිදා මේ ගැන අධිකරණයට කරුණු ඉදිරිපත් කරන්න නියමිතයි. ඒ අනුව අපට කියන්න පුලුවන් වරදක් කොතැනද සිදුවෙලා තිබෙන්නේ කියලා.”
” ඒ වගේම මම කියන්න කැමතියි රජය හැටියට අපට මූලිකවම ජනතාවගේ විශ්වාසය ආරක්ෂා කිරීම වැදගත් වෙනවා. මොකද ජනතාවගේ විශ්වාසය ආරක්ෂා කිරීම තමයි අංක එක. ඒ නිසා රජයට සම්බන්ධ පුද්ගලයෙකුගෙන් වරදක් වෙලා තිබෙනවා නම් ඒ සම්බන්ධව කටයුතු කිරීමට අපි පැකිලෙන්නේ නෑ.”
” ඒ වගේම මෙවැනි සිදුවීමක දී නීතිය ක්රියාත්මක කිරීමේ දී යම් අඩුපාඩු හෝ ප්රමාදයන් සිදුවී තිබෙනවා නම් ඒ ගැනත් අපි කටයුතු කරන්න සූදානම්. ඒ සියලු කරුණුවලින් තමයි රජයක විනිවිද භාවය සහ ජනතාවට වගවීම පෙන්නුම් කරමින් යන්නේ.”
” මේ සිදුවීමේ දී එය දැකපු ඒ ආසන්නයේම නිරීක්ෂණය කළ අය ඉන්නවා. ඔවුන්ද ප්රකාශ සිදුකර තිබෙනවා. මේ සියල්ල පැත්තක තිබ්බත් මෙවැනි රිය අනතුරක දී නීතිය සහ රෝහල් පද්ධතියක් ක්රියාත්මකවන ආකාරයක් පවතිනවා. අධිකරණයක් ක්රියාත්මකවන ආකාරයක් පවතිනවා.
“මම හිතන්නේ අපට කලබල වෙන්න දෙයක් නෑ . මේක අධිකරණයේ තිබෙන කටයුත්තක් නිසා එම කටයුතුවල ප්රගතිය පිළිබඳ බලාගෙන ඉන්න පුලුවන්කමක් තියනවා. මේ සිද්ධියේ දී සමහර පාර්ශවවලින් චෝදනා එල්ල වුන නිසා පොලිසිය පැත්තෙන් යම් අඩුපාඩුවක් සිදුවුනා කියලා පොලිස්පතිවරයාගේ නියෝගයෙන් පොලිසිය පැත්තෙන් යම් අඩුපාඩුවක් සිදුවුනාද කියලා විමර්ශනයක් සිදුවෙමින් තියනවා.”
“මේ සියලු වාර්තා අධිකරණයට ඉදිරිපත් කරනවා. අධිකරණයේ දී ඒ ගැන ලැබෙන තීන්දුව බලා ගන්න පුලුවන්. ඒ නිසා අශෝක රන්වල මන්ත්රීවරයා වරදක් කළා ද නැද්ද යන පූර්ව නිගමනයක සිට කටයුතු නොකර ඒ අවස්ථාව විවෘතව තබන ලෙස මා ඉල්ලා සිටිනවා. ”
” සමහර දේවල් ඇති. ඒ වගේම අපි දන්න දේවලුත් තියෙනවා. ඔහු ගමන් කරමින් සිටියේ බිගම ප්රාදේශීය සභා මන්ත්රීවරුන්ගේ රැස්වීමකට හවස 6.30ට සහභාගී වෙලා. එතන බියගම ප්රාදේශීය සභාවේ සභාපති උප සභාපති ඇතුළු මන්ත්රීවරු 32ම එකතු වෙලා හිටියා. මාවරමණ්ඩියේ මේ ස්ථානයේ ඉඳලා බොහොම කෙටි වෙලාවක් තමයි ඒ ස්ථානයට තිබුණේ.”
” අපි දන්නවා මෙවැනි ආපදා අවස්ථාවක දී අපේ මන්ත්රීවරු කටයුතු කරමින් ඉන්නේ කොහොමද කියන එක. ඒ වගේම මෙවැනි ආකාරයේ වැඩ යොදා ගත්තම කටයුතු සිදුවන ආකාරය පිළිබඳ අපට අවබෝධයක් තියනවා. මම සියලු දේවල් මෙතන කියන්න සූදානම් නෑ මේක කැබිනට් ප්රෙස් එක නිසා. ”
“නමුත් මම කියන්න කැමතියි ඔබට ඇඟිල්ල දිගු කළ හැකි වන්නේ රජය පාර්ශවයෙන් මේ නීතිමය කටයුතු කිරීමට බාධා කළා කියලා කියන්න පුලුවන් කමක් තිබෙනවා නම්. ”
“එහෙම කිසි දෙයක් සිද්ධ වෙලා නැතිනම් රාජ්ය නිලධාරීන්ගේ පැත්තෙන් අඩුපාඩුවක් වෙලා ඇතිනම් ඒ සම්බන්ධව අපි සොයා බලනවා. ”
“කිරිබත්ගොඩ රෝහලේදීත්, කොළඹ ජාතික රෝහලේදීත් ඔහු ඇතුළත් කරගැනීමේ දී අදාල වෛද්යවරයා මුලින්ම රෝගියා සම්බන්ධයෙන් සටහන් කරනවා. සටහන් පරික්ෂා කරන්න පුලුවන්. එය අධිකරණයට ගෙන්වා ගන්න පුලුවන්. ඊට පස්සේ අධිකරණ වෛද්ය නිලධාරීවරයා පරීක්ෂා කරලා බලනවා. අදාල රුධිර සහ මුත්රා සාම්පල් යවලා තියනවා. ඒවායේ ප්රතිඵල අධිකරණයට 19 වැනිදා ඉදිරිපත් කරාවි.”
“ඒ සියල්ලගෙන් ඔබට බලා ගන්න පුලුවන් මොකක්ද වෙන්නේ කියලා. අපි එක් එක් පූර්ව නිගමනවල සිට මේ ගැන විග්රහ කිරීම තේරුමක් නෑ දැනට මෙය නීතියට භාරදී තිබෙන නිසා.”
