දිනසේන රතුගමගේ –
ඉන්දියාවේ නාගපට්ටන සිට යාපනයේ කන්කසන්තුරේ දක්වා යාත්රා කෙරෙන ”චෙරියපානී ” නැව් සේවාව කළින් සැලසුම් කළ පරිදි අද (10) ආරම්භ නොවන බව ඉන්දීය මාධ්ය නිවේදනය කළේය.
මෙම ගමන සදහා යොදා තිබුණු යාත්රාවේ ඇතිවූ හදිසි කාර්මික දෝෂයක් හේතුවෙන් මෙම ගමන් ආරම්භය 12 වෙනිදා දක්වා කල් දමන ලද බවද වාර්තාවේ.
කෙසේ වෙතත් දෙරට අතර සිදු වන මෙම යාත්රා සේවාවේ පර්යේෂණ චාරිකාව 8 දා සිදු වූ අතර අතිසුඛෝපභෝගී වායු සමනය කළ යාත්රාවක් ඉන්දියාවේ නාගපට්ටන සිට කන්කසන්තුරේ වරාය දක්වා සේන්දු විය.
ඉන්දියාව හා යාපනය අතර සිදු කෙරෙන මෙම යාත්රා සේවය ” චෙරියපානී ” ලෙස නම් කොට තිබේ.
මෙම පර්යේෂණ චාරිකාවට ඉන්දියාවේ විවිධ තරාතිරම් වලට අයත් 17 දෙනෙකු එක්ව සිටි අතර ඔවුන් යාත්රාවේ ගමන් මග කාලගුණික තත්ත්වය යාත්රාවේ වේගය වැනි කාරණා රැසක් සැලකිල්ලට ගෙන තිබුණි.
ඔවුන්ගේ සමීක්ෂණය හා නිරීක්ෂණය මත ඔක්තෝබර් මස 23 වෙනිදායින් පසුව උතුරු මුහුදේ වර්ධනය වන අයහපත් කාලගුණික තත්ත්වය හේතුවෙන් මෙම යාත්රා සේවය ඔක්තෝබර් මස 23 වෙනිදා දක්වා පමණක් සිදු කිරීමට තීරණය කොට තිබේ.
ඒ අනුව මෙම ”චෙරියපානී ” යාත්රා සේවය මගින් දෙරටේම වැසියන්ට ඔක්තෝබර් මස 12 වෙනිදා සිට 23 වෙනිදා දක්වා කාලය තුළ යාත්රා සේවය ලබා ගත හැකිය.
අනතුරුව මෙම යාත්රා සේවය යළි ආරම්භ වන්නේ 2024 වසරේ ජනවාරි මාසයේදීය.
මගීන් 170 කට එකවර ගමන් කළ හැකි මෙම යාත්රාවේ ගාස්තුව වශයෙන් ගමන් දෙකටම රුපියල් 53500 ක මුදල අය කෙරෙන අතර තනි ගමනක් සදහා ගාස්තුව රුපියල් 27000 කි.
යාත්රාවේ ගමන් කරණ එක් මගියෙකුට කිලෝ ගෑම් 40 ක බරක් රැගෙන යාමට අවසරය හිමි වෙයි.
