දිනසේන රතුගමගේ –
යාපනය විශ්ව විද්යාලය හා එහි මණ්ඩපයක් වූ කිළිනොච්චිය මණ්ඩපය එක්ව සංවිධානය කළ විරෝධතවයකදී විශ්ව විද්යාල සිසුන් හතර දෙනෙකු කිළිනොච්චිය පොලිසිය විසින් අද (4) අත් අඩංගුවට ගත්තේය.
කිලිනොච්චිය නගරයේදී ‘කළු නිදහස් දින‘ සැමරුම නමින් විරෝධතාවයක නිරත වූ අවස්ථාවේදී සිසුන් මෙසේ පොලිස් අත් අඩංගුවට පත්වූහ.
උතුර හා නැගෙනහිර ජනතාවගේ ගැටලු වෙනුවෙන් ස්ථිර නිදහසක් නොලැබීම, මාධ්ය නිදහසට බාධා කිරීම, අදහස් ප්රකාශ කිරීමේ නිදහසට බාධා ඇතිවන පනත් සම්මත කර ගැනීම හා වර්තමානයේ ජනතාවට දරා ගැනීමට නොහැකි ගැටලු වෙනුවෙන් විසඳුම් නොලැබීම යන කාරණා හේතුවෙන් නිදහස් දිනය සැමරීමට නොහැකි තත්වයක් උදාවි ඇති බව මේ කළු නිදහස් දිනයේ දී සිසුහු ප්රකාශ කළහ. උද්ඝෝෂණය සඳහා යාපනය විශ්වවිද්යාල සිසුන්, අතුරුදහන්වූවන්ගේ ඥාතීන් හා සිවිල් සංවිධාන එක්ව සිටියහ.
යාපනය නුවර ප්රධාන මාර්ගය අවහිර කරමින් විරෝධතාවය පැවැත් වූ අතර විරෝධතාකරුවන් විසුරුවා හැරීමට පොලිසිය කටයුතු කිරීමට උත්සාහ කිරීමේදී නොසන්සුන්තාවයක් ඇති විය. තත්ත්වය පාලනය කිරීමට ජල ප්රහාරක බවුසර හා පොලිස් කැරලි මර්දන ඒකකයද කැඳවා තිබුණි.
විරෝධතා වැඩසටහන වෙනුවෙන් ඉලංගෙයි තමිල් අරසු කච්චි පක්ෂයේ නව නායක එස්.ශ්රීධරන්, පාර්ලිමේන්තු මන්ත්රී චාර්ල්ස් නිර්මලනාදන් ඇතුළු දේශපාලන පක්ෂ නියෝජිතයින් පිරිසක්ද එක්ව සිටියහ.
වර්තමානයේ නිදහස් දිනයක් සැමරීමට හැකි වාතාවරණයක් නොමැති බව සඳහන් කරමින් යාපනය විශ්ව විද්යාලයේ කළු කොඩි ඔසවා තිබුණි.
අත් අඩංගුවට ගත් සිසුන්ගෙන් කිළිනොච්චිය පොලීසිය ප්රශ්න කරගෙන යන අතර ඔවුන්ව කිළිනොච්චිය මහෙස්ත්රාත්වරයා හමුවට ඉදිරිපත් කිරීමට පියවර ගෙන ඇත.
