තමන්ට ඉල්ලා අස්වන ලෙස බලකරමින් රුහුණු විශ්වවිද්යාලයේ අනධ්යයන කාර්ය මණ්ඩලය, ශිෂ්ය සංගම්, විශ්වවිද්යාල ආචාර්යවරුන්ගේ සමිති සම්මේලනය සාමුහික තීරණයක් මත අඛණ්ඩ වැඩ වර්ජනයක් ආරම්භ කර ඇතත් එම කිසිම සංගමයක අවශ්යතාවය මත තමන් රුහුණු විශ්වවිද්යාලයේ උප කුලපති ධූරයෙන් ඉල්ලා අස් නොවන බව ජ්යෙෂ්ඨ මහාචාර්ය සුජීව අමරසේන උසස් අධ්යාපන විෂය භාර අමාත්යවරිය මෙන්ම අගමැතිවරයද වන ආචාර්ය හරිනි අමරසූරිය වෙත ලිඛිතව දන්වා තිබේ.
උපකුලපති ලෙස ජ්යෙෂ්ඨ මහාචාර්ය සුජීව අමරසේන මේ ලිඛිත දැන්වීම සිදුකරන්නේ මුග්ධ අනම්ය මෙන්ම අශාස්ත්රීය හැසිරීම් සහිත ඉතිහාසයක් ඇති බව කියමින් රුහුණු විශ්වවිද්යාලයේ උප කුලපතිවරයා එම ධූරයෙන් ඉවත් කරන ලෙස බලකෙරෙන අඛණ්ඩ වැඩ වර්ජනයක් අද උදෑසන 9 සිට රුහුණු විශ්වවිද්යාලයේ අනධ්යයන කාර්ය මණ්ඩලය විසින් ආරම්භ කර ඇති පසුබිමකය.
ශිෂ්ය සංගම්වල මැර මානසිකත්වයට, වෘත්තීය සංගම්වල අසාධාරණ වෘත්තීය ඉල්ලීම්වලට, මැරකම්වලට හෝ වෙනත් බලපෑම්වලට තමන් බියට පත්නනොවන බව ප්රකාශ කරමින් උපකුලපතිවරයා අගමැතිවරියට ලිඛිතව දන්වන්නේ වැඩ වර්ජනය සම්බන්ධයෙන් අද පස්වරු 4.30ට අග්රාමාත්ය හරිනි අමරසූරිය සමග සාකච්ඡාවක් සිදුකිරීමට නියමිත බව විශ්වවිද්යාල වෘත්තීය සමිති ඒකාබද්ධ කමිටුවේ සම සභාපති ධම්මික එස්. ප්රියන්ත විසින් මාධ්ය දැනුම්වත් කර ඇති අවස්ථාවේදී ය.
උපකුලපතිවරයා අගමැතිවරියට පවසන්නේ පීඨ කීපයක් එක්ව මෙම වර්ජනය ආරම්භ කර ඇති බවත්, වරදක් නොකළ තමන් වෘත්තීය සමිති, ගුරු සංගම් ප්රකාශ කරන ආකාරයට ඉල්ලා අස් වීමට සූදානම් නොවන බවත්ය.
ඕනෑම තීරණයක් ගත යුත්තේ තමන්ගේ නිදොස් බව ඔප්පු කිරීමට ප්රබල සාක්ෂි ගෙන ඒම සඳහා තමන්ගේ කතාවටත් සවන් දීමෙන් පසුව පමණක් බව පවසන ජ්යෙෂ්ඨ මහාචාර්යවරයා විශ්වවිද්යාල ආචාර්ය සමිති සම්මේලනය ට තමන්ට එරෙහිව චෝදනා ගොනු කිරීමට බොහෝ අවස්ථා දී ඇති අගමැතිවරිය මෙම චෝදනාවලට පිළිතුරු දීමට තබා සාකච්ඡාවකටවත් තමා කැඳවා නැතැයි චෝදනා කරයි. තමන් ඉල්ලා අස් නොවන්නා සේම මැරකම්වලට තමන් බිය නොවන බව ද නීති රෙගුලාසි අනුව වැඩ කරන බව ද ජ්යෙෂ්ඨ මහාචාර්යවරයා අගමැතිනියට පවසයි.
තමන්ගේ දක්ෂතාවය සහ කුසලතාව පිළිබඳ වූ දීර්ඝ විස්තරයක් ද ඔහු අගමැතිවරිය වෙත ඉදිරිපත් කර තිබේ. තමන් විමර්ශන 07කට ලක්ව නිදොස් වී ඇති බවත් මේ තරම් විමසීමකට සහ පරීක්ෂාවකට ලක් කළ කුලපතිවරයෙක් ඉතිහාසේ සිටින්නට නැති බවත් ඔහු දන්වයි. ඉදිරියේදීත් ඕනෑම පරීක්ෂණයකට මුහුණ දීමට තමන් සූදානම් බවත්, තමන් ඉල්ලා සිටින්නේ මේ පරීක්ෂණ පැවැත්වීමේ සාධාරණත්වය පමණක් බවත් ඔහු පවසයි.
රුහුණු විශ්වවිද්යාලයේ උසස්වීම් සඳහා ව්යාජ හෝ කොල්ලකාරී ප්රකාශන භාවිතය ඉවත් කර සියලුම බඳවා ගැනීමේ සම්මුඛ පරීක්ෂණවල සාධාරණත්වය විනිවිදභාවය තහවුරු කිරීමට වීඩියෝ පටිගත කර අනීතික ක්රියා අවම කීරීම රුහුණු විශ්වවිද්යාලයේ ප්රසම්පාදන ක්රියාවලියේ සියලුම දූෂිත ක්රියාවන් නැවැත්වීමට පියවර ගැනීම, තමන්ගේ නායකත්වයෙන් යුත් කවුන්සිලයේ දූෂණය සම්බන්ධයෙන් සමහර කාර්ය මණ්ඩල සාමාජිකයින්ට දඬුවම් කර සේවයෙන් පහ කිරීමට කටයුතු කිරීම මෙම විරෝධතාව පිටුපස ඇති සැබෑ හේතු බව ද උපකුලපතිවරයා පවසිය.
රුහුණු විශ්වවිද්යාලයේ උප කුලපතිවරයා උසස් අධ්යාපන විෂය ද භාර අගමැතිවරිය වෙත යැවූ ලිපිය පහත දැක්වේ.
